Mga Awit 103:1-22
Awit ni David.
103 Pupurihin ko si Jehova;Pupurihin ng buong pagkatao ko ang kaniyang banal na pangalan.
2 Pupurihin ko si Jehova;Huwag ko nawang kalimutan ang lahat ng ginawa niya.+
3 Pinatatawad niya ang lahat ng pagkakamali mo+At pinagagaling ang lahat ng karamdaman mo;+
4 Inililigtas* niya ang buhay mo mula sa hukay,*+At kinokoronahan ka niya ng kaniyang tapat na pag-ibig at awa.+
5 Binubusog ka niya ng mabubuting bagay+ sa buong buhay mo,Kaya nananatili kang bata at malakas na gaya ng isang agila.+
6 Si Jehova ay makatuwiran+ at makatarunganSa lahat ng inaapi.+
7 Ipinaalám niya ang mga daan niya kay Moises,+Ang mga gawa niya sa mga anak ni Israel.+
8 Si Jehova ay maawain at mapagmalasakit,*+Hindi madaling magalit at sagana sa tapat na pag-ibig.*+
9 Hindi niya patuloy na aalalahanin ang mga pagkakamali natin,+At hindi siya maghihinanakit magpakailanman.+
10 Hindi niya tayo pinaparusahan ayon sa mga kasalanan natin,+At hindi niya tayo ginagantihan ayon sa nararapat sa mga pagkakamali natin.+
11 Dahil kung paanong ang langit ay mas mataas kaysa sa lupa,Gayon kalaki ang kaniyang tapat na pag-ibig sa mga natatakot sa kaniya.+
12 Kung gaano kalayo ang sikatan ng araw sa lubugan ng araw,Gayon niya inilalayo sa atin ang mga kasalanan natin.+
13 Kung paanong nagpapakita ng awa ang ama sa mga anak niya,Si Jehova ay nagpapakita ng awa sa mga natatakot sa kaniya.+
14 Dahil alam na alam niya ang pagkakagawa sa atin;+Inaalaala niyang tayo ay alabok.+
15 Ang mga araw ng taong mortal ay gaya ng sa damo;+Namumukadkad siyang gaya ng bulaklak sa parang.+
16 Pero kapag humihip ang hangin, naglalaho iyon,Na para bang hindi iyon kailanman tumubo roon.*
17 Pero ang tapat na pag-ibig ni Jehova ay walang hanggan*Para sa mga natatakot sa kaniya,+At ang kaniyang katuwiran para sa mga anak ng mga anak nila,+
18 Para sa mga tumutupad sa kaniyang tipan+At sa mga maingat na sumusunod sa mga utos niya.
19 Itinatag ni Jehova nang matibay ang trono niya sa langit;+At naghahari siya sa lahat.+
20 Purihin ninyo si Jehova, lahat kayong mga anghel niya+ na makapangyarihan,Na tumutupad sa salita niya,+ nakikinig sa tinig niya.*
21 Purihin ninyo si Jehova, lahat kayong mga hukbo niya,+Ang mga lingkod niya na gumagawa ng kalooban niya.+
22 Purihin ninyo si Jehova, lahat kayong mga gawa niya,Sa lahat ng lugar na pinaghaharian niya.*
Pupurihin si Jehova ng buong pagkatao ko.
Talababa
^ O “Binabawi.”
^ O “libingan.”
^ O “magandang-loob.”
^ O “maibiging-kabaitan.”
^ Lit., “At hindi na ito kilala ng lugar nito.”
^ O “mula sa panahong walang pasimula hanggang sa panahong walang wakas.”
^ Lit., “sa tinig (tunog) ng salita niya.”
^ O “na nasa ilalim ng soberanya niya.”