ʻIo, ʻoku tokoni maʻu pē ʻa e Kau Fakamoʻoni ʻa Sihová ʻi he taimi ʻoku tō ai ha fakatamaki. ʻOku mau tokonaki ʻa e tokoni ʻaonga fakatouʻosi ki he Kau Fakamoʻoní mo e ʻikai Fakamoʻoní, ʻo fehoanaki mo e fakahinohino ʻa e Tohi Tapú ʻi he tohi Kalētia 6:10: “Tuku ke tau fai ha ngāue ʻoku leleí ki he tokotaha kotoa, kae tautautefito ki he faʻahinga ʻoku fekauʻaki mo kitautolu ʻi he tuí.” ʻOku mau toe feinga ke ʻoatu ʻa e poupou fakaeongo mo fakalaumālie ʻoku fiemaʻu lahi ʻe he kau maʻukoviá ʻi he ngaahi taimi peheé.—2 Kolinitō 1:3, 4.

 Hili ha fakatamaki, ko e kau mātuʻa ʻi he ngaahi fakatahaʻanga ʻi he feituʻu ʻoku uesiá ʻoku nau feinga ke fetuʻutaki ki he kotoa ʻoku nau feohi mo e fakatahaʻangá ke sio pe ʻoku nau malu pea ke ʻiloʻi ʻa e tokoni ʻoku nau fiemaʻú. ʻOku līpooti leva ʻe he kau mātuʻá ʻa e ola ʻenau saveá mo ʻenau fiemaʻu tefitó ki he ʻōfisi vaʻa fakalotofonua ʻo e Kau Fakamoʻoni ʻa Sihová.

 Kapau ko e fiemaʻu tokoní ʻoku fakalaka atu ia ʻi he meʻa ʻe lava ke tokonaki ʻe he ngaahi fakatahaʻanga ʻi he feituʻú, ʻe fokotuʻutuʻu ʻe he Kulupu Pule ʻo e Kau Fakamoʻoni ʻa Sihová ke tokonaki ʻa e meʻa ʻoku fiemaʻú. ʻOku meimei tatau eni mo e founga naʻe fengāueʻaki ai ʻa e muʻaki kau Kalisitiané lolotonga ha taimi honge. (1 Kolinitō 16:1-4) ʻOku fokotuʻu ʻe he ʻōfisi vaʻa fakalotofonuá ha Kōmiti Tokoni Fakatamaki ke fokotuʻutuʻu mo tataki ʻa e tokoní. ʻOku foaki loto-lelei ʻe he Kau Fakamoʻoni mei he ngaahi feituʻu kehé honau taimí mo ʻenau koloá ke tokoni.—Palōveepi 17:17.

 Ko e taha ʻo e ngaahi founga ʻoku ngāueʻaki ai ʻa e paʻanga ʻoku ʻave ki he ngaahi ʻōfisi vaʻa ʻo e Kau Fakamoʻoni ʻa Sihová ko e tokoni ki he kau maʻukovia ʻi he fakatamakí. (Ngāue 11:27-30; 2 Kolinitō 8:13-15) Koeʻuhi ko e ngāué ʻoku fakahoko ia ʻe he kau ngāue pole taʻetotongi, ko e paʻangá ʻoku ʻalu hangatonu pē ki he tokoní, ʻo ʻikai ko e fakamole ki he kau ngāué. ʻOku mau tokangaʻi lelei ʻa e kotoa ʻo e ngaahi tokoní.—2 Kolinitō 8:20.