1. Ko e hā ʻa e kehekehe ʻo e meʻa ʻoku tau fiemaʻú mo e meʻa ʻoku tau loto ke maʻú?

 ʻOKU siʻisiʻi pē ʻa e ngaahi meʻa ʻoku tau fiemaʻú kae lava ke tau kei moʻui. Ko e fakatātaá, ʻoku tau fiemaʻu ʻa e meʻakai, vala mo ha feituʻu ke tau nofo ai. Ka heʻikai ke toe ʻosi ʻa e ngaahi meʻa ia ʻoku tau loto nai ke maʻú. Pea ʻoku ʻikai ke fakatokangaʻi ʻe he kakai tokolahi ʻoku ʻikai ke nau fiemaʻu moʻoni ʻa e ngaahi meʻa kotoa ʻoku nau loto ke maʻú.

2. Ko e hā ʻa e niʻihi ʻo e ngaahi meʻa ʻoku loto ke maʻu ʻe he kakaí?

² Ko e meʻa ʻoku loto ke maʻu nai ʻe ha taha ʻoku nofo ʻi ha fonua masivesiva, ʻe kehe ʻaupito ia mei he meʻa ʻoku loto ke maʻu nai ʻe ha taha ʻoku nofo ʻi ha fonua tuʻumālie. ʻI he ngaahi fonua ʻe niʻihi, ʻoku saiʻia ʻa e kakaí ke nau maʻu ha telefoni toʻotoʻo, ko ha motopaiki pe ko ha kiʻi konga kelekele. ʻI he ngaahi feituʻu kehé, ʻoku loto ʻa e kakaí ke nau maʻu ʻa e ngaahi vala totongi mamafa, ko ha fale ʻoku lahi angé pe ko ha meʻalele ʻoku totongi mamafa angé. Kae tatau ai pē pe ko fē ʻa e feituʻu ʻoku tau nofo aí pe lahi ʻo e paʻanga ʻoku tau maʻú, ʻe kamata nai ke tau holi ke toe lahi ange ʻa e ngaahi meʻa ʻoku ʻikai ke tau fiemaʻú pe ʻoku ʻikai lava ke aʻu ki ai hotau ivi fakapaʻangá.

3. Ko e hā ʻa e tuli ki he meʻa fakamatelié?

³ Ko e hā ʻa e tuli ki he meʻa fakamatelié? Ko ha tokotaha ʻoku hā mei heʻene fakakaukaú ʻoku lahi ange ʻene tokanga ʻaʻana ki he ngaahi meʻa kehé ʻi hono vahaʻangatae mo e ʻOtuá. ʻOku ʻikai ke ne fiemālie pē ʻi he meʻa ʻokú ne fiemaʻú, ka ʻokú ne loto maʻu pē ke maʻu ʻa e meʻa lahi ange. Naʻa mo e faʻahinga ʻoku ʻikai ke lahi ʻenau paʻangá pe ko e faʻahinga ʻoku ʻikai ke nau fakatau mai ʻa e ngaahi meʻa totongi mamafá, ʻe lava ke nau hoko ʻo tuli ki he meʻa fakamatelié. ʻOku ʻikai nai ke nau kei fakamuʻomuʻa ʻa e Puleʻangá ʻi heʻenau moʻuí.​—Hep. 13:5.

4. ʻOku anga-fēfē hono ngāueʻaki ʻe Sētane ʻa e “holi ʻo e matá”?

⁴ ʻOku loto ʻa Sētane ke tau tui ʻe lava ke tau toki maʻu pē ʻa e fiefiá kapau ʻe lahi ʻa e koloa te tau maʻú. Ko ia, ʻokú ne ngāueʻaki hono māmaní mo e “holi ʻo e matá” ke ʻai kitautolu ke tau holi maʻu pē ki ha meʻa lahi ange. (1 Sio. 2:15-17; Sēn. 3:6; Pal. 27:20) ʻOku tau sio mo fanongo maʻu pē ʻi he ngaahi tuʻuakí, ʻi heʻenau feinga ke fakalotoʻi kitautolu ke fakatau mai ʻa e ngaahi koloa foʻou ko iá. Kuó ke fakatau mai ha meʻa koeʻuhí pē naʻe fakamānako ʻene hā ʻi he fale koloá pe koeʻuhí naʻá ke sio ai ʻi he tuʻuakí? Kapau ko ia, te ke fakatokangaʻi ki mui ai naʻe ʻikai ke ke fiemaʻu moʻoni ia. ʻI he taimi ʻoku tau toutou fakatau mai ai ʻa e ngaahi meʻa ʻoku ʻikai ke tau fiemaʻú, ʻoku tau ʻai ai ke faingataʻa ʻetau moʻuí. ʻOku lava ʻe he ngaahi meʻa ko iá ke ne fakahohaʻasi ʻetau tauhi kia Sihová. Ko e fakatātaá, heʻikai nai ke tau maʻu ha taimi feʻunga ke ako ʻa e Tohi Tapú, teuteu mo maʻu ʻa e ngaahi fakatahá pea ʻalu maʻu pē ʻi he ngāue fakafaifekaú. Manatuʻi ʻa e fakatokanga naʻe ʻomai ʻe he ʻapositolo ko Sioné: “ʻOku fakaʻaʻau ke mole atu ʻa e māmaní pea pehē ki he holi ʻaʻaná.”

5. Ko e hā ʻe lava ke hoko ki he faʻahinga ʻoku nau ngāueʻaki ʻa e lahi taha hono honau iví ke maʻu ha ngaahi meʻa lahi angé?

⁵ ʻOku loto ʻa Sētane ke tau ngāueʻaki hotau iví ke maʻu mai ha paʻanga mo ha ngaahi meʻa lahi ange kae ʻikai ke ngāueʻaki hotau iví maʻa Sihova. (Māt. 6:24) Ka ʻo kapau ʻoku tau mahuʻingaʻia pē ʻi he feinga ke lahi ange ʻa e ngaahi meʻa ʻoku tau maʻú, ʻoku ʻikai leva ke ʻi ai ha taumuʻa ʻo ʻetau moʻuí. ʻE lava ke tau hoko ai ʻo loto-mamahi pe faingataʻaʻia fakapaʻanga. Pe ko e toe kovi angé, ʻe lava ke mole ai ʻetau tui kia Sihova mo hono Puleʻangá. (1 Tīm. 6:9, 10; Fkh. 3:17) Naʻe pehē ʻe Sīsū ko e “ngaahi holi ki he ngaahi meʻa kehe kotoa ko eé” ʻoku hangē ia ko e ngaahi ʻakau talatala ʻokú ne kāsia ha tengaʻi ʻakau mei haʻane tupu ʻo laku fua mai.​—Mk. 4:14, 18, 19.

6. Ko e hā ʻa e lēsoni ʻoku tau ako meia Palukí?

⁶ Kiʻi fakakaukau ange kia Palukí, ko e sekelitali ʻa e palōfita ko Selemaiá. ʻI he taimi naʻe kamata ai ʻa Paluki ke ne ‘kumi ha ngaahi meʻa lalahi’ maʻaná, naʻe fakamanatu ange ʻe Sihova kiate ia ʻoku vavé ni ke fakaʻauha ʻa Selusalema. Ka naʻá ne talaʻofa kia Paluki te ne fakahaofi ʻene moʻuí. (Sel. 45:1-5) Naʻe totonu ke ʻoua ʻe feinga ʻa Paluki ke maʻu ha meʻa lahi ange. Heʻikai fakahaofi ʻe Sihova ʻa e ngaahi meʻa ʻoku maʻu ʻe he kakaí. (Sel. 20:5) ʻI he ʻahó ni, ʻoku tau moʻui ʻo ofi atu ki he ngataʻanga ʻo e māmani ʻo Sētané. Ko ia ʻoku ʻikai ko ha toe taimi eni ia ke tau feinga ke maʻu ha meʻa lahi ange. Pea ʻoku ʻikai totonu ke tau ʻamanekina ko e hili ʻa e fuʻu mamahi lahí, te tau kei maʻu pē ʻa e ngaahi meʻa ʻoku tau lolotonga maʻu he taimi ní, neongo kapau ʻoku mahuʻinga ia kiate kitautolu.​—Pal. 11:4; Māt. 24:21, 22; Luke 12:15.

7. Ko e hā te tau lāulea ki aí, pea ko e hā hono ʻuhingá?

⁷ Ko ia, ʻe lava fēfē ke tau tokangaʻi kitautolu mo hotau ngaahi fāmilí pea kei nofoʻaki tokangataha ki he meʻa ʻoku mahuʻinga taha ʻi he moʻuí? ʻE lava fēfē ke tau fakaʻehiʻehi mei he tuli ki he meʻa fakamatelié? Pea ko e hā ʻe lava ke ne tokoniʻi kitautolu ke ʻoua te tau hohaʻa tōtuʻa ki heʻetau ngaahi fiemaʻú? Naʻe ʻomai ʻe Sīsū ʻa e faleʻi lelei taha fekauʻaki mo e meʻá ni ʻi heʻene Malanga ʻi he Moʻungá. (Māt. 6:19-21) Tau lau mo sivisiviʻi angé ʻa e Mātiu 6:25-34. ʻE fakapapauʻi mai heni kiate kitautolu ʻa e mātuʻaki mahuʻinga ke tau hanganaki kumi ki he Puleʻangá, ʻikai ki he ngaahi meʻá.​—Luke 12:31.

8, 9. (a) Ko e hā ʻoku totonu ai ke ʻoua te tau hohaʻa tōtuʻa ki he ngaahi meʻa ʻoku tau fiemaʻú? (e) Ko e hā naʻe ʻiloʻi ʻe Sīsū fekauʻaki mo e faʻahinga ʻo e tangatá mo ʻenau ngaahi fiemaʻú?

⁸ Lau ʻa e Mātiu 6:25. Naʻe ʻiloʻi ʻe Sīsū naʻe hohaʻa ʻene kau ākongá fekauʻaki mo e meʻa ke nau kai, inu mo e vala ke nau tuí, ko ia ʻi heʻene Malanga ʻi he Moʻungá, naʻá ne tala ange kiate kinautolu: “Tuku hoʻomou loto-moʻua fekauʻaki mo hoʻomou moʻuí.” Naʻe loto ʻa Sīsū ke tokoniʻi kinautolu ke nau mahinoʻi ʻa e ʻuhinga ʻoku totonu ai ke ʻoua te nau hohaʻa ki he ngaahi meʻa kotoa ko ení. Naʻá ne ʻiloʻi kapau te nau hohaʻa tōtuʻa ki ai, naʻa mo e ngaahi meʻa ʻoku nau fiemaʻu moʻoní, ʻe lava ke ngalo ai ʻiate kinautolu ʻa e meʻa ʻoku mahuʻinga ange ʻi he moʻuí. Naʻe tokanga lahi ʻaupito ʻa Sīsū ki heʻene kau ākongá, pea naʻe tuʻo fā ʻene ʻoange ʻa e fakatokanga kiate kinautolu fekauʻaki mo e fakatuʻutāmaki ʻo e meʻá ni ʻi heʻene malangá.​—Māt. 6:27, 28, 31, 34.

⁹ Ka ko e hā naʻe tala ai ʻe Sīsū ke ʻoua te tau hohaʻa ki ha meʻa ke tau kai, inu pe vala ke tau tuí? ʻIkai ʻoku tau fiemaʻu ʻa e meʻakaí mo e valá? Ko ia! Pea kapau ʻoku ʻikai ke tau maʻu ha paʻanga feʻunga ke fakatau mai ʻaki ʻa e ngaahi meʻa ko ení, ʻoku fakanatula pē ke tau hohaʻa. Naʻe mahinoʻi ia ʻe Sīsū. Naʻá ne ʻiloʻi ʻa e meʻa naʻe fiemaʻu ʻe he kakaí. Pea naʻá ne ʻiloʻi ʻe moʻui ʻene kau ākongá “ʻi he ngaahi ʻaho fakaʻosí” ko ha ngaahi taimi mātuʻaki faingataʻa ia. (2 Tīm. 3:1) Ko hono moʻoní, ko e kakai tokolahi ʻi he ʻahó ni ʻoku ʻikai lava ke nau maʻu ha ngāue pea ʻoku ʻalu ke toe mamafa ange ʻa e totongi ʻo e ngaahi koloá. ʻI he ngaahi fonua lahi, ʻoku masiva ʻaupito ʻa e kakaí mo siʻisiʻi pe aʻu ʻo ʻikai ha meʻakai ke nau maʻu meʻatokoni mei ai. Ka naʻe toe ʻiloʻi ʻe Sīsū ʻoku mahuʻinga ange ʻa e moʻui ʻa ha taha ʻi he meʻakaí pea mo e sinó ʻi he valá.

10. ʻI hono akoʻi ʻe Sīsū hono kau muimuí ki he founga ke nau lotu aí, ko e hā naʻá ne leaʻaki ʻoku totonu ke mahuʻinga taha ʻi heʻenau moʻuí?

¹⁰ Ki muʻa aí, naʻe akoʻi ʻe Sīsū ʻene kau ākongá ko e taimi te nau lotu aí, ʻoku totonu ke nau kole ki heʻenau Tamai ʻi hēvaní ke ne foaki mai ʻenau ngaahi fiemaʻú. ʻE lava ke nau lotu: “ʻOmai muʻa he ʻahó ni haʻamau mā ki he ʻaho ko ení.” (Māt. 6:11) ʻI he taimi ʻe taha, naʻá ne tala ai kiate kinautolu ke nau lotu: “ʻOmai muʻa haʻamau mā ki he ʻahó ni ʻo fakatatau ki he fiemaʻu ʻo e ʻaho ko ení.” (Luke 11:3) Ka ʻoku ʻikai ʻuhinga iá ʻoku totonu ke tau fakakaukau maʻu pē fekauʻaki mo hono maʻu mai ʻa e ngaahi meʻa ʻoku tau fiemaʻú. Ko hono moʻoní, naʻe tala ʻe Sīsū ki hono kau muimuí ʻoku mahuʻinga ange ʻa e lotu ke hoko mai ʻa e Puleʻanga ʻo e ʻOtuá ʻi he lotu ki heʻenau ngaahi fiemaʻú tonu. (Māt. 6:10; Luke 11:2) Ke tokoniʻi ʻa e kau ākongá ke tuku ʻenau hohaʻá, naʻe ʻoatu ʻe Sīsū ʻa e fakafiemālie ʻaki ʻene fakamanatu ange kiate kinautolu ʻa e anga hono tokangaʻi ʻe Sihova ʻene ngaahi meʻa fakatupu kotoa pē.

11, 12. Ko e hā ʻoku tau ako mei he anga hono tauhi ʻe Sihova ʻa e fanga manupuna ʻo e langí? (Sio ki he ʻuluaki fakatātā ʻi he kupú ni.)

¹¹ Lau ʻa e Mātiu 6:26. ʻOku totonu ke tau “siofi fakalelei ʻa e fanga manupuna ʻo e langí.” Neongo ko e fanga manupuná ko e meʻamoʻui iiki kinautolu, ʻoku nau kai lahi. Kae kehe, kapau naʻe lalahi ʻa e fanga manupuná ʻo hangē ko e tangatá, ʻe lahi ange ʻenau kaí ʻi he tangatá. ʻOku kai ʻe he fanga manupuná ʻa e fuaʻiʻakaú, tengaʻi ʻakaú, ʻinisēkité mo e ʻunufé. Ka ʻoku ʻikai fiemaʻu ke nau tūtuuʻi tenga mo tō haʻanau ngoue. ʻOku tokonaki ʻe Sihova ʻa e meʻa kotoa ʻoku nau fiemaʻú. (Saame 147:9) Ko e moʻoni, ʻoku ʻikai te ne ʻai ʻa e meʻakaí ki honau ngutú! Kuo pau ke ʻalu ʻa e fanga manupuná ʻo kumi ia, ka kuo ʻosi ʻi ai pē ʻa e meʻakaí ke nau maʻu.

¹² Naʻe ʻikai ha veiveiua ʻa Sīsū kapau ʻoku tokangaʻi ʻe heʻene Tamaí ʻa e fanga manupuná, te ne toe tokangaʻi foki ʻa e kakaí. ^[1] (1 Pita 5:6, 7) Ko ia ai, hangē ko e fanga manupuná, ʻoku totonu ke ʻoua te tau fakapikopiko. Kuo pau ke tau tō haʻatau ngoue pe ngāue ke maʻu ha paʻanga ke fakatau mai ʻaki ia. ʻOku lava ʻe Sihova ke ne tāpuakiʻi ʻetau ngaahi feingá. Pea ʻi he taimi ʻoku ʻikai ai ke tau maʻu ha paʻanga pe meʻakai feʻunga, ʻoku lava ke kei tokonaki mai ʻe Sihova ʻetau ngaahi fiemaʻú. Ko e fakatātaá, ʻe vahevahe nai ʻe ha niʻihi mo  kitautolu ʻa e meʻa ʻoku nau maʻú. ʻOku toe tokonaki mai ʻe Sihova ʻa e feituʻu ke nofo ai ʻa e fanga manupuná. Kuó ne ʻoange kiate kinautolu ʻa e malava ke nau faʻu ʻa e ngaahi pununga, pea kuó ne ngaohi ʻa e ngaahi meʻa ʻoku ngāueʻaki ʻe he fanga manupuná ke faʻu ʻaki ʻa e ngaahi pununga ko ení. ʻI he tuʻunga meimei tatau, ʻoku malava ʻe Sihova ke ne tokoniʻi kitautolu ke tau maʻu ha feituʻu ʻoku feʻunga ke nofo ai hotau fāmilí.

13. Ko e hā ʻokú ne fakamoʻoniʻi ʻoku tau mahuʻinga ange kitautolu ʻi he fanga manupuna ʻo e langí?

¹³ Hili hono fakamanatu ange ʻe Sīsū ki heʻene kau ākongá fekauʻaki mo hono fafanga ʻe Sihova ʻa e fanga manupuná, naʻá ne ʻeke ange: “ʻIkai ʻoku mou mahuʻinga ange kimoutolu ʻiate kinautolu?” (Fakafehoanaki mo e Luke 12:6, 7.) ʻI he taimi naʻe leaʻaki ai eni ʻe Sīsuú, ngalingali naʻá ne fakakaukau fekauʻaki mo e ofi ke ne foaki atu ʻene moʻuí maʻá e faʻahinga kotoa ʻo e tangatá. Ko hono moʻoní, naʻe ʻikai pekia ʻa Sīsū maʻá e fanga manupuná pe ko ha toe fanga manu kehe. Naʻá ne pekia maʻa kitautolu koeʻuhí kae lava ke tau moʻui taʻengata.​—Māt. 20:28.

14. Ko e hā heʻikai ʻaupito ke lava ʻe he tokotaha loto-moʻuá ʻo faí?

¹⁴ Lau ʻa e Mātiu 6:27. Ko e hā ʻa e ʻuhinga ʻa Sīsū ʻi heʻene pehē ʻoku ʻikai lava ʻe he loto-moʻuá ke tau tānaki atu ha kiupite ʻe taha ki heʻetau moʻuí? Naʻá ne ʻuhingá heʻikai lava ʻe heʻetau hohaʻa ki he ngaahi meʻa ʻoku tau fiemaʻú ʻo fakalōloa atu ʻetau moʻuí. Ko e moʻoni, kapau te tau loto-moʻua tōtuʻa, ʻe lava ke tau puke pea aʻu ʻo mate.

15, 16. (a) Ko e hā ʻoku tau ako mei he anga hono tokangaʻi ʻe Sihova ʻa e ngaahi lile ʻo e vaó? (Sio ki he ʻuluaki fakatātā ʻi he kupú ni.) (e) Ko e hā ʻa e ongo fehuʻi ʻoku fiemaʻu ke tau ʻeke hifo nai kiate kitautolú, pea ko e hā hono ʻuhingá?

¹⁵ Lau ʻa e Mātiu 6:28-30. ʻOku tau fiefia ʻi he taimi ʻoku tau maʻu ai ha vala lelei ke tui, tautefito  ʻi he taimi ʻoku tau ʻalu atu ai ʻi he ngāue fakafaifekaú pe ki heʻetau ngaahi fakatahá mo e ʻasemipilií. Ka ʻoku fiemaʻu ke tau ‘loto-moʻua ki he valá’? Naʻe toe fakamanatu ʻe Sīsū ki heʻene kau ākongá ʻa e anga hono tokangaʻi ʻe Sihova ʻene ngaahi meʻa fakatupú. Naʻe ngāueʻaki ʻe Sīsū ʻa e fakatātā mei he “ngaahi lile ʻo e vaó.” ʻE ʻuhinga nai ʻa e ‘ngaahi lilé’ ki he ngaahi matalaʻiʻakau hangē ko e kalatiolá, haiasiní, misimisí mo e tiulipé. Kuo ʻikai ʻaupito ha taha ʻi he ngaahi lilé ni naʻe ngaohi filo ke nau teungaʻaki. Ka ʻoku nau fuʻu fakaʻofoʻofa ʻaupito pea naʻe pehē ai ʻe Sīsū “naʻa mo Solomone ʻi he kotoa ʻo hono lāngilangí naʻe ʻikai ke teungaʻia ia ʻo hangē ko ha taha ʻo e ngaahi lilé ni”!

¹⁶ Fakakaukau ki he meʻa hono hoko naʻe leaʻaki ʻe Sīsuú: “Kapau leva kuo fakateunga pehē ʻe he ʻOtuá ʻa e ʻakau ʻo e vaó, . . . , ʻikai ʻe lahi ange ʻene fakateunga kimoutolú, ʻa kimoutolu ʻa e kau tui vaivai?” Ko e moʻoni, ʻe fai ia ʻe Sihova! Ka naʻe fiemaʻu ki he kau ākonga ʻa Sīsuú ha tui ʻoku lahi ange. (Māt. 8:26; 14:31; 16:8; 17:20) ʻOku fiemaʻu ke nau falala ʻoku finangalo ʻa Sihova ke ne tokangaʻi kinautolu pea te ne fakahoko moʻoni ia. Fēfē kitautolu? ʻOku tau tui ʻe tokangaʻi kitautolu ʻe Sihova?

17. Ko e hā ʻa e meʻa te ne maumauʻi nai hotau vahaʻangatae mo Sihová?

¹⁷ Lau ʻa e Mātiu 6:31, 32. Ko e tokolahi ʻoku ʻikai ke nau ʻiloʻi ʻa Sihová ʻoku nau tokanga pē kinautolu ke maʻu ha paʻanga mo e ngaahi meʻa lahi ange. Ka ʻo kapau naʻa tau fai ʻa e meʻa tatau, ʻe lava ke maumauʻi ai hotau vahaʻangatae mo iá. ʻOku tau ʻiloʻi ko Sihova ʻetau Tamaí pea ʻokú ne ʻofa ʻiate kitautolu. Pea ʻoku tau tuipau kapau ʻoku tau fai ʻa e meʻa ʻokú ne kole maí mo fakamuʻomuʻa hono Puleʻangá ʻi heʻetau moʻuí, te ne ʻomai ʻa e meʻa kotoa ʻoku tau fiemaʻú ʻo toe lahi ange. ʻOku tau toe ʻiloʻi ko hono maʻu ha vahaʻangatae lelei mo Sihová te ne ʻai ai kitautolu ke tau maʻu ʻa e  fiefia moʻoní, pea ʻe tokoniʻi heni kitautolu ke tau fiemālie pē ʻi he meʻa ʻoku tau fiemaʻú, ʻa e “meʻakai mo ha vala.”​—1 Tīm. 6:6-8.

18. Ko e hā ʻoku ʻafioʻi ʻe Sihova fekauʻaki mo kitautolu fakafoʻituituí, pea ko e hā te ne fai maʻa kitautolú?

¹⁸ Lau ʻa e Mātiu 6:33. Kapau te tau fakamuʻomuʻa ʻa e Puleʻangá, ʻe tokonaki mai leva ʻe Sihova ʻa e meʻa kotoa pē ʻoku tau fiemaʻú. Naʻe fakamatalaʻi ʻe Sīsū ʻa e ʻuhinga ʻe lava ke tau fakapapauʻi ai ʻa e talaʻofa ko iá. Naʻá ne pehē: “ʻOku ʻafioʻi ʻe hoʻomou Tamai fakahēvaní ʻoku mou fiemaʻu ʻa e ngaahi meʻá ni kotoa.” ʻOku ʻafioʻi ʻe Sihova ʻa e meʻa ʻokú ke fiemaʻú naʻa mo e ki muʻa ke ke ʻiloʻi ʻokú ke fiemaʻu iá. (Fil. 4:19) ʻOkú ne ʻafioʻi ʻa e vala te tau fiemaʻú. ʻOkú ne toe ʻafioʻi ʻa e meʻakai te ke fiemaʻú. Pea ʻokú ne ʻafioʻi ʻokú ke fiemaʻu mo ho fāmilí ha feituʻu ke mou nofo ai. ʻE fakapapauʻi ʻe Sihova ʻokú ke maʻu ʻa e meʻa ʻokú ke fiemaʻu moʻoní.

19. Ko e hā ʻoku totonu ai ke ʻoua te tau hohaʻa ki ha meʻa ʻe hoko nai ʻi he kahaʻú?

¹⁹ Lau ʻa e Mātiu 6:34. Naʻe toe tala ʻe Sīsū ki heʻene kau ākongá: “ʻOua ʻaupito naʻa loto-moʻua.” ʻE tokonaki mai ʻe Sihova ʻa e meʻa ʻoku tau fiemaʻu ʻi he ʻaho taki taha. Ko ia ai, ʻoku ʻikai fiemaʻu ke tau hohaʻa tōtuʻa ki ha meʻa ʻe hoko nai ʻi he kahaʻú. Kapau ʻoku tau fai pehē, ko e kamata ia ke tau falala pē kiate kitautolú, pea ʻe hoko ia ke ne maumauʻi hotau vahaʻangatae mo Sihová. ʻI hono kehé, kuo pau ke tau falala kakato kiate ia.​—Pal. 3:5, 6; Fil. 4:6, 7.

20. (a) Ko e hā ha taumuʻa te ke fokotuʻu nai ʻi he ngāue ʻa Sihová? (e) Ko e hā ʻe lava ke ke fai ke fakafaingofuaʻi ai hoʻo moʻuí?

²⁰ He meʻa fakamamahi ē kapau naʻe ʻikai ke tau maʻu ha ivi feʻunga ke tauhi kakato ai kia Sihova, koeʻuhí naʻa tau feinga ke maʻu ha ngaahi meʻa lahi ange! ʻI hono kehé, ʻoku totonu ke tau ʻoatu hotau lelei tahá kia Sihova. Ko e fakatātaá, ʻe lava ke ke hiki ʻo tokoni ki ha fakatahaʻanga ʻoku fiemaʻu ha kau malanga tokolahi ange? ʻE lava ke ke tāimuʻá? Pe kapau ʻokú ke ʻosi tāimuʻa, kuó ke fakakaukau ke ke tohi kole ki he Ako Maʻá e Kau ʻEvangeliō ʻo e Puleʻangá? ʻE lava nai ke ke vaheʻi ha kiʻi ʻaho ʻi he uiké ke ke tokoni ai ki Pēteli pe ki he ʻōfisi liliu leá? Pe mahalo ʻe lava ke ke pole ki he Ngāue Langá mo ngāueʻaki ha niʻihi ho taimí ke tokoni ai ki he langa ʻo e ngaahi Fale Fakatahaʻangá. Fakakaukau fekauʻaki mo e meʻa ʻe lava nai ke ke fai ke fakafaingofuaʻi ange ai hoʻo founga moʻuí, koeʻuhí kae lava ke lahi ange ho taimi mo e ivi ki he ngaahi ngāue ʻo e Puleʻangá. Ko e puha “ Founga ke Fakafaingofuaʻi Ai Hoʻo Moʻuí” ʻoku ʻomai ai ha ngaahi fokotuʻu. Lotu kia Sihova ke ne tokoniʻi koe ke ke fakapapauʻi ʻa e meʻa ʻoku fiemaʻu ke ke faí. Pea kamata leva ke fai ʻa e ngaahi liliu ʻoku fiemaʻú.

21. Ko e hā te ne tokoniʻi koe ke ke ʻunuʻunu ofi ange ai kia Sihová?

²¹ Naʻe akoʻi kitautolu ʻe Sīsū ke tau fuofua kumi ki he Puleʻangá. ʻI heʻetau fai peheé, te tau hao ai mei he hohaʻa tōtuʻa ki he ngaahi meʻa ʻoku tau fiemaʻú. ʻOku tau ʻunuʻunu ofi ange ai kia Sihova koeʻuhí ʻoku tau falala te ne tokangaʻi kitautolu. ʻOku tau ako ai ke mapuleʻi kitautolu pea heʻikai ai ke tau fakatau mai ʻa e meʻa kotoa pē ʻoku tau holi ki aí pe meʻa kotoa pē ʻoku tuʻuaki mai ʻe he māmaní, neongo kapau ʻoku tau malava ke fakatau mai ia. Kapau te tau fakafaingofuaʻi he taimí ni ʻetau moʻuí, ʻe tokoni ia kiate kitautolu ke tau nofoʻaki faitōnunga kia Sihova pea ke “piki maʻu ki he moʻui moʻoní” ʻa ia kuó ne talaʻofa mai kiate kitautolú.​—1 Tīm. 6:19.