Awa. Titesesa kujipereka kugwira nchitu yidu yakupharazga kunyumba ndi nyumba. Kweni tigomezga kuti kugwira nchitu yeniyi ndiku kwazakutipaska umoyu wambula kumala cha. (Ŵaefesu 2:8) Chifukwa wuli?

 Ŵanaŵaniyani chakuyeruzgiyapu ichi: Yeruzgiyani kuti munthu munyaki walisungu walayizga kupereka chawanangwa chamampha ukongwa ku munthu weyosi yo wangachifika pamalu nganyaki pa zuŵa lo wangakamba. Asani mutimugomezga munthu yo wakulayizgani, kumbi mulutengi cha ku malu ngo? Mwambula kukayika ndivu muchitengi! Ndipu mungayanja so kukambiyaku anyinu ndipuso ŵanthu a m’banja linu mwaŵi wenuwu ndi chilatu chakuti nawu asaniyi mwaŵi wenuwu. Chinanga kuti ivi vingaŵa viyo kweni mwalonde chawanangwa chifukwa chakuti munguchifika kumalu ngo cha, kweni chifukwa chakuti munthu yo wakhumba kukupaskani chawanangwa.

 Mwakuyana waka Akaboni aku Yehova agomezga kuti Chiuta wazamupereka umoyu wambula kumala ku ŵanthu wo atimuvwiya. (Ŵaroma 6:23) Titijipereka kukambiyaku anyaki vo tigomezga ndi chilatu chakuti nawu azilonde umoyu wambula kumala wo Chiuta wakulayizga. Kweni tigomezga kuti nchitu yidu yakupharazga ndiyu yazamuchitiska kuti tizilonde umoyu wambula kumala cha. (Ŵaroma 1:17; 3:28) Palivi nchitu yo munthu wangagwira, yo chingachitiska kuti wazilonde umoyu wambula kumala kwaku Chiuta. Wazakutitaska chifukwa cha nchitu zidu zamampha cha, kweni chifukwa cha lisungu laki​.—Tito 3:5.