SAMBIRU 38
Muwongengi Mphasu ya Umoyu
Pe vinthu vinandi vakukondwesa vo tingachita chifukwa cha umoyu wo tenawu. Chinanga kuti tingakumana ndi masuzgu, kweni tikondwa mbwenu ndi umoyu mu vakuchitika vinyaki. Kweni kumbi tingalongo wuli kuti tiwonga mphasu ya umoyu wo tenawu? Nanga pe chifukwa wuli chikulu cho tikhumbikiya kuwonga mphasu yeniyi?
1. Ntchifukwa wuli tikhumbika kuwonga mphasu ya umoyu?
Titenere kuwonga mphasu ya umoyu wo tenawu chifukwa Ada ŵidu achanju a Yehova ndiwu akutipaska. Yiwu ndiwu “chisimi cha umoyu” chifukwa akulenga vinthu vosi vamoyu. (Salimo 36:9) “Iyu mweneku ndiyu wapaska ŵanthu wosi umoyu, mvuchi ndi vinthu vosi.” (Machitidu 17:25, 28) Yehova watitipaska vosi vakukhumbika kuti tije ndi umoyu. Kweniso, iyu watitichitiya vinthu vo vititiwovya kuti tikondwengi ndi umoyu.—Ŵerengani Machitidu 14:17.
2. Kumbi tingamulongo wuli Yehova kuti tiwonga mphasu ya umoyu wo wakutipaska?
Yehova wakwamba kukuphweriyani kutuliya waka pa nyengu yo anyinamwi angujaliya ndi nthumbu yinu. Mwakulongozgeka ndi mzimu waku Chiuta, mteŵeti waki munyaki, zina laki Davidi wangukamba kuti: “Masu nginu ngangundiwona ndichiyamba ŵaka kupangika.” (Salimo 139:16) Yehova wawona kuti umoyu wa munthu ngwakuzirwa ukongwa. (Ŵerengani Mateyu 10:29-31.) Vitimuŵaŵa ukongwa Yehova asani wawona kuti munthu wabaya munthu munyaki, pamwenga asani munthu watijibaya. a (Ekisodo 20:13) Vitimuŵaŵa so ukongwa Yehova asani tichitiya dala vinthu vo vingaŵika umoyu widu pangozi pamwenga asani tichita vinthu mwambula kuphwere umoyu wa ŵanthu anyaki. Asani tiphwere umoyu widu ndipuso asani titumbika umoyu wa ŵanthu anyaki ndikuti tilongo kuti tiwonga mphasu yapade ya umoyu wo tenawu.
SAMBIRANI VINANDI
Wonani nthowa zinyaki zo mungalongore kuti muwonga mphasu ya umoyu.
3. Muchitengi vinthu mwakuphwere kuti muleki kutamatama
Mkhristu weyosi yo wakujipereka kwaku Yehova wayesesa kumuteŵete ndi umoyu waki wosi. Asani wachita viyo, vija nge kuti wapereka sembi ya liŵavu laki kwaku Chiuta. Ŵerengani Aroma 12:1, 2, pavuli paki kambiskanani mafumbu yanga:
-
Ntchifukwa wuli mukhumbika kuphwere liŵavu linu?
-
Kumbi mungachita wuli venivi?
4. Muchitengi vinthu mwakuphwere kuti muleki kupwetekeka pamwenga kufwa.
Bayibolu litititcheŵeska kuti tingachitiyanga dala cha vinthu vo vingaŵika umoyu widu pangozi. Woneriyani VIDIYO kuti muwoni vinthu vinyaki vo mukhumbika kuchita kuti muleki kuchita ngozi.
Ŵerengani Nthanthi 22:3, pavuli paki kambiskanani mo mungachitiya vinthu mwakuphwere kuti muleki kuchita ngozi . . .
-
panyumba pinu.
-
kuntchitu.
-
asani muchita masaza.
-
asani mutendesa pamwenga mwakwera galimotu ndipuso njinga.
5. Mutumbikengi umoyu wa mwana yo weche mumoyu
Mu ndakatulu yaki, Davidi wangukambamu mo Yehova waphwere mwana yo wayamba waka kupangika mumoyu mwa anyina. Ŵerengani Salimo 139:13-17, pavuli paki kambiskanani fumbu ili:
-
Kumbi Yehova wawona kuti umoyu wa munthu utambiya po munthukazi watole nthumbu pamwenga asani mwana wawaku?
Marangu ngaku Yehova mu nyengu ya Ayisirayeli ngavikiliyanga anyina a mwana kweniso mwana yo wechendaweku. Ŵerengani Ekisodo 21:22, 23, pavuli paki kambiskanani mafumbu yanga:
-
Kumbi Yehova wamuwonanga wuli munthu yo wabaya mwangozi mwana yo wechendaweku?
-
Nanga wamuwonanga wuli munthu yo wachitiya dala venivi? b
-
Kumbi yimwi mutuvwa wuli ndi mo Chiuta watiyiwone nkhani yeniyi?
Chinanga ndi munthukazi yo waziŵa umampha kuzirwa kwa umoyu, nyengu zinyaki nayu wangaŵanaŵana kuti watuzgi waka nthumbu chifukwa cha mo vinthu viliri. Ŵerengani Yesaya 41:10, pavuli paki kambiskanani mafumbu yanga:
-
Asani munthukazi wanthumbu wachichizgika kuti watuzgi nthumbu, kumbi watenere kuthemba yani kuti wamuwovyi? Nanga ntchifukwa wuli watenere kuchita viyo?
ŴANTHU ANYAKI AKAMBA KUTI: “Munthukazi we ndi wanangwa wakusankha kutuzga nthumbu pamwenga cha, chifukwa liŵavu ndaki.”
-
Ntchifukwa wuli muwona kuti Yehova watumbika umoyu wa mwana yo wechendaweku ndipuso wa anyina?
KUMBI MWASAMBIRANJI?
Bayibolu lititisambiza kuti umoyu ndi mphasu yo Yehova wakutipaska, ndipu titenere kuwuyanja ukongwa, kuwutumbika ndipuso kuwuvikiliya. Ivi ving’anamuwa umoyu wosi, widu ndipuso wa ŵanthu anyaki.
Kuweriyamu
-
Ntchifukwa wuli Yehova wawona kuti umoyu wa munthu ngwakuzirwa ukongwa?
-
Kumbi Yehova watuvwa wuli asani munthu wabaya munyaki?
-
Ntchifukwa wuli muwona kuti umoyu ndi mphasu yapade ukongwa?
FUFUZANI
Kumbi tingamuwonga wuli Yehova chifukwa cha mphasu ya umoyu wo wakutipaska?
Saniyani kwamuka kwa fumbu lakuti, Kumbi Chiuta wangamugowoke munthu yo wakutuzgapu nthumbu?
“Kumbi Bayibolu Likambanji pa Nkhani Yakutuzga Nthumbu?” (Nkhani ya pa webusayiti)
Kuziŵa mo Chiuta wawone umoyu kungakuwovyani kuti musankhengi masaza ngakwenere ngo mungachita.
“Kumbi Mukhumbika Kuchitaku ‘Masaza Ngakuŵika Umoyu pa Ngozi?’” (Jani Masu!, October 8, 2000)
Wonani mo Bayibolu lingawovye munthu yo wakhumba kuti wajibayi.
a Yehova watiŵaphwere ukongwa ŵanthu wo asweka mtima. (Salimo 34:18) Iyu wavwisa maŵanaŵanu ngakupweteka ngo munthu wangaŵa nangu, ngo ngangachitiska kuti wayambi kuŵanaŵana kuti wajibayi waka, ndipu wakhumbisiska kumuwovya. Kuti muwoni mo Yehova wangawovye munthu kuti waleki kujibaya, ŵerengani nkhani yakuti “Ndikhumba Kufwa—Kumbi Bayibolu Lingandiwovya Asani nde ndi Maŵanaŵanu Ngakukhumba Kujibaya?” yo yaŵikika pachigaŵa chakuti Fufuzani, mu sambiru lenili.
b Wo akutuzgapu nthumbu angajimbanga ukongwa mulandu cha chifukwa Yehova ngwakunozgeka kuŵagowoke. Kuti muziŵi vinandi, wonani nkhani yakuti “Kumbi Bayibolu Likambanji pa Nkhani Yakutuzga Nthumbu?” yo yaŵikika pachigaŵa chakuti Fufuzani, mu sambiru lenili.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
