Kweni anandi akayika kuti azamujapu ndi umoyu wamampha. Ve viyo chifukwa vinthu nge COVID-19, vachitika mwamabuchibuchi ndipu vakwaska ukongwa mo ŵanthu achitiya vinthu, vayambisa ukavu ndipuso kubaya ŵanthu anandi. Mwaviyo, yiwu afipa mtima kuti azamujapu cha ndi umoyu wamampha.

Chifukwa chakusoŵa pakuko, ŵanthu apenja ulongozgi wo ungaŵawovya kuziŵa vo angachita kuti azije ndi umoyu wamampha. Ŵanthu anyaki agomezga kuziŵiya limu vinthu vo vichitikengi kunthazi. Anandi apenjapenja masambiru ndipuso chuma, achiŵanaŵana kuti venivi viŵawovyengi kusaniya vo akhumba. Ndipu anyaki awona kuti kuja munthu wamampha ndiku kungaŵawovya kuja ndi umoyu wamampha.

Kumbi nthowa zenizi ndizu zingachitiska kuti muzije ndi umoyu wamampha wo mukhumba? Kuti muziŵi uneneska waki, mutenere kuŵanaŵaniya mafumbu yanga:

• Kumbi ntchinthu wuli cho chingakuwovyani kuti muzije ndi umoyu wamampha kunthazi?

• Kumbi masambiru kweniso ndalama, vingakuwovyani kuti muzije ndi umoyu wamampha?

• Kumbi kuja munthu wamampha kungachitiska kuti muzije ndi umoyu wamampha kunthazi?

• Kumbi ndi nunkhu ko mungasaniya ulongozgi wakovya kuti muzije ndi umoyu wamampha kunthazi?

Magazini iyi ya Chigongwi cha Alinda yingakuwovyani kusaniya kwamuka.