Vo Akuŵerenga Afumba

Kumbi Paulo wang’anamuwanga ayani pa lemba la 2 Akorinto 6:14, wachikamba kuti “ŵanthu ambula kugomezga”?

Pa 2 Akorinto 6:14, Paulo wakulemba kuti: “Mungamangikanga cha mugoli limoza ndi ŵanthu ambula kugomezga.” Mavesi ngapafupi ndi vesi ili, ngatitiwovya kuziŵa kuti Paulo wakambanga ŵanthu wo ŵenga kubwalu kwa mpingu wachikhristu. Mavesi nganyaki so nga mu Bayibolu ngo Paulo wakugwiriskiya ntchitu mazu ngakuti “munthu wambula kugomezga,” pamwenga ngakuti “ŵanthu ambula kugomezga,” ngasimikiziya so fundu yeniyi.

Mwakuyeruzgiyapu, Paulo wanguchenya Akhristu wo atoliyanga anyawu kukhoti “ku ŵanthu ambula kugomezga!” (1 Akorinto 6:6) Pa vesi ili, mazu ngakuti ŵanthu ambula kugomezga ngakamba akweruzga wo agwiranga ntchitu kumakhoti nga ku Korinto. Mukalata yaki yachiŵi, Paulo wangukamba kuti Satana “wabulumutizga maŵanaŵanu nga ŵanthu ambula kugomezga.” Wangukonkhoska kuti masu nga ŵanthu ambula kugomezga ŵenaŵa, ‘ngakubenekereka ndi salu’ ndipu ngatondeka kuwona uthenga wamampha. Ŵanthu ambula kugomezga ateŵete Yehova cha, chifukwa Paulo wangukonkhoska so kuti: “Kweni asani munthu wang’anamukiya kwaku Yehova, salu yo yibenulika.”—2 Akorinto 3:16; 4:4.

Ŵanthu anyaki ambula kugomezga achita ureŵi ndipuso achita vinthu vinyaki vambula kukoliyana ndi marangu ngaku Chiuta. (2 Akorinto 6:15, 16) Kweni mbanthu wosi cha ambula kugomezga wo asuska ateŵeti aku Yehova. Ndipu anyaki alongo kuti akhumba kusambira uneneska. Pe so ŵanthu ambula kugomezga anandi wo akutorana ndi Akhristu ndipu akhumba cha kumalisa nthengwa yawu. (1 Akorinto 7:12-14; 10:27; 14:22-25; 1 Peturo 3:1, 2) Kweni mumakalata ngaki ngosi, mazu ngakuti “ambula kugomezga” ngo Paulo wakugwiriskiya ntchitu, ngang’anamuwa ŵanthu wosi wo ŵe kubwalu kwa mpingu wachikhristu, wo mwe ŵanthu wo ‘agomezga mwa Ambuya.’—Machitidu 2:41; 5:14; 8:12, 13.

Lemba la 2 Akorinto 6:14, litovya Akhristu pa vigaŵa vakupambanapambana pa umoyu, kweni kanandi tiwona kuti le ndi fundu yakovya Akhristu wo apenja kusaniya munthu yo angatorana nayu. (Mateyu 19:4-6) Mkhristu wazeru wakubatizika wangatorana cha ndi munthu wambula kugomezga chifukwa apambana fundu zo atende, vilatu kweniso vinthu vo agomezga.

Nanga wuli munthu yo wasambira Bayibolu ndipu wawungana ndi mpingu wachikhristu? Kumbi apharazgi ambula kubatizika nawu so mbanthu ambula kugomezga? Awa. Apharazgi ambula kubatizika akuzomera uthenga wamampha ndipu ayesesa kusintha vinthu vinandi kuti aje akwenere kubatizika. Mwaviyo, tikhumbika cha kuŵadana kuti ŵanthu ambula kugomezga. (Aroma 10:10; 2 Akorinto 4:13) Kumbukani kuti Koneliyasi wechendabatiziki, wadanikanga kuti “munthu wakwanja kusopa kweniso wawopanga Chiuta”—Machitidu 10:2.

Sonu pakuti ulongozgi waku Paulo wo usanirika pa 2 Akorinto 6:14 ungagwira ntchitu cha pa mupharazgi wambula kubatizika, kumbi chingaŵa chinthu chazeru kuti Mkhristu wayambi chibwezi kweniso kutorana ndi mupharazgi wambula kubatizika? Awa! Ntchifukwa wuli tikamba viyo? Chifukwa cha ulongozgi unyaki wo Paulo wangukamba wakukwaskana ndi vyoko vachikhristu. Iyu wangulemba kuti: “[Munthukazi yo] ngwakufwatuka kuyirwa ku munthulumi weyosi yo wakhumba, kweni mwa Ambuya pe.” (1 Akorinto 7:39) Mwakukoliyana ndi ulongozgi wenuwu, Akhristu akujipereka kwaku Chiuta, achiskika kuto pamwenga kuyirwa “mwa Ambuya” pe.

Kumbi mazu ngakuti “mwa Ambuya” ndipuso nganyaki ngakuyanana nangu ngakuti “mwaku Khristu,” ngang’anamuwanji? Pa Aroma 16:8-10 ndipuso pa Akolose 4:7, Paulo wanguzumbuwapu ŵanthu wo ŵenga “mwaku Khristu” pamwenga “mwa Ambuya.” Asani mungaŵerenga mavesi ngenanga, muwonengi kuti ŵanthu yaŵa aziŵika so kuti ‘antchitu anyidu,’ ‘abali akwanjiwa,’ ‘ateŵeti akugomezgeka’ kweniso ‘akapolu anyidu.’

Kumbi mphanyengu niyi po munthu waja “kapolu . . . mwa Ambuya”? Venivi vichitika asani munthu wajikana mwakutuliya pasi pa mtima ndipu wayamba kuchita vo kapolu wakhumbika kuchita. Yesu wangukonkhoska kuti: “Asani munthu wapenja kundilondo, wajikani yija ndipu wapingi chimiti chaki chakutombozgekiyapu ndi kulutirizga kundilondo.” (Mateyu 16:24) Munthu watamba kulondo Khristu kweniso kuchita khumbu laku Chiuta asani wajipereka kwaku Chiuta. Pavuli paki, iyu wabatizika kuti waje mteŵeti wakusankhika kweniso wakuzomerezeka ndi Yehova Chiuta. * Mwaviyo, kuto pamwenga kuyirwa “mwa Ambuya,” kung’anamuwa kutorana ndi munthu yo wakubatizika kali pamwenga kuti yo wakujipereka kuja “kapolu waku Chiuta ndipuso wa Ambuya Yesu Khristu.”—Yakobe 1:1.

Munthu yo wasambira Bayibolu ndi Akaboni aku Yehova ndipu watesesa kuluta panthazi, wakhumbika kuwongeka. Kweni tikhumbika kukumbuka kuti munthu yo wechendafikepu pakujipereka kwaku Yehova kweniso ku uteŵeti wo ukhumba kujinola vinthu vinyaki. Iyu wakhumbika mbwenu kusintha vinthu vinyaki. Wakhumbika kusintha vinthu venivi kuti waje Mkhristu wakujipereka kweniso wakubatizika. Watenere kuchita venivi wechendayambi kuŵanaŵana za kuto pamwenga kuyirwa yo so ndi nkhani yikulu pa umoyu.

Kumbi chingaŵa chinthu chazeru kuti Mkhristu wachiti chibwezi ndi munthu yo wawoneka kuti waluta panthazi ukongwa kusambira Bayibolu ndipu waŵanaŵana kuti wamulindizi kuti azitorani asani wabatizika? Awa. Yapa vilatu va munthu yo wasambira Bayibolu vingasintha asani iyu wangaziŵa kuti Mkhristu wakubatizika wapenja kutorana nayu kweni walindizengi mpaka po iyu wabatizikiya.

Kweniso tikhumbika kukumbuka kuti munthu waja mupharazgi wambula kubatizika kwa nyengu yitali cha, asani waluta panthazi wabatizika. Mwaviyo, ulongozgi wakuto pamwenga kuyirwa mwa Ambuya pe ngwakukandirizga cha. Nanga wuli kuchita chibwezi ndi munthu yo wakukuliya mubanja lachikhristu, waja wachiwungana ndi mpingu kwa nyengu yitali ndipu ndi mupharazgi wambula kubatizika? Pa nkhani iyi mungajifumba kuti, kumbi ntchinthu wuli cho chamutondekesa kujipereka kwaku Yehova nyengu yosi iyi? Kumbi iyu we ndi maŵanaŵanu ngakukayikiya? Chinanga kuti iyu ndi munthu wambula kugomezga cha, kweni tingamukamba so cha kuti we “mwa Ambuya.”

Isi ndisi tiyanduwa ndi ulongozgi wo Paulo wakupereka pa nkhani ya nthengwa. (Yesaya 48:17) Asani ŵanthu wosi ŵaŵi wo apenja kutorana mbakujipereka kwaku Yehova, aja akukoliyana pa vinthu vauzimu ndipu chifukwa cha venivi nthengwa yawu yija yakukho. Yiwu aja ndi fundu kweniso vilatu vakuyanana. Venivi vitovya kuti akondwengi. Kweniso asani munthu wasankha kuto pamwenga kuyirwa “mwa Ambuya,” walongo kuti ngakugomezgeka kwaku Yehova ndipu venivi vichitiska kuti wasaniyi vitumbiku kwamuyaya. Veviyo chifukwa “munthu wakugomezgeka [Yehova watimuchitiya] . . . vinthu mwakugomezgeka.”—Salimo 18:25.

[Mazu ngamumphata]

[Chithuzi]

“Munthu wakugomezgeka [Yehova watimuchitiya] . . . vinthu mwakugomezgeka.”