NDERENI KUFUPI KWAKU CHIUTA
Lutilizgani ‘Kupempha Ndipu Kupaskikengi Kwaku Imwi’
“Ambuya, tirunguchizgeni ifwi kuromba.” (Luka 11:1) Akusambira aku Yesu ndiwu angukamba mazu ngenanga. Yesu wanguŵamuka mwakukonkhoska ntharika ziŵi, zo zititisambiza mo tingarombe kuti Chiuta wavwisiyengi marombu ngidu. Asani mukhumba kuziŵa kuti Chiuta wavwisiya nadi marombu nginu, mukondwengi kuvwa mo Yesu wangumukiya.—Ŵerengani Luka 11:5-13.
Ntharika yakwamba yikonkhoska ukongwa za munthu yo waromba. (Luka 11:5-8) munthu yo, wangulonde mulendu pakati pa usiku ndipu iyu wengavi chakurya chechosi. Nkhani iyi yakhumbikanga kuchitika mwaliŵi. Chinanga kuti wenga usiku, iyu wanguluta ku mubwezi waki kuchipempha chakurya. Pakwamba, mubwezi waki wanguzeleza chifukwa wagonanga pamoza ndi a m’banja laki ndipu wosi ŵenga mu tulu. Kweni munthu yo wangulonde mulendu wanguchita soni cha, wangulutirizga kupempha bwezi laki mpaka linguyuka kumupaska chakurya. a
Kumbi ntharika yeniyi yititisambizanji pa nkhani ya rombu? Yesu watitikambiya kuti tijengi ndi phamphu. Tikhumbika kulutirizga kupempha, kupenja ndipuso kugong’oska. (Luka 11:9, 10) Nchifukwa wuli tikhumbika kuchita viyo? Kumbi Yesu wang’anamuwanga kuti Chiuta wazeleza kumuka marombu ngidu? Awa. Iyu wang’anamuwanga kuti mwakupambana ndi bwezi lo lizeleza, Chiuta ngwakunozgeka kumuka marombu ngamampha nga ŵanthu wo agomezga kuti iyu wavwisiya marombu ngawu. Tilongo kuti titimugomezga asani tilutirizga kuromba. Asani tiromba kaŵikaŵi, tilongo kuti vo tipempha titivipenja nadi ndipuso tigomezga kuti Chiuta watipaskengi asani tipempha mwakukoliyana ndi khumbu laki.—Marko 11:24; 1 Yohane 5:14.
Ntharika yachiŵi yikonkhoska zaku Yehova yo ‘ngwakumuka marombu.’ (Sumu 65:2) Yesu wangufumba kuti: “Kumbi wangaŵapu yumoza waku imwi . . . yo wangapaska mwana waki njoka penipo watimupempha somba? Pamwenga wangampaska chipiriri penipo watimupempha zira?” Kwamuka nkhwakuziŵikiya limu, palivi yo wangapereka vinthu vakofya ku ŵana ŵaki. Pavuli paki, Yesu wangukonkhoska vo ntharika yo yang’anamuwanga kuti: Asani apapi ambula kufikapu ‘apaska mipasku yamampha’ ŵana ŵawu, ‘uli ukongwaku Ada wo akuchanya apaskengi mzimu wakupaturika.’ Yiwu apaskengi ŵana ŵawu a pacharu chapasi, chawanangwa chamampha ukongwa asani atimupempha. b—Luka 11:11-13; Mateyu 7:11.
Chiuta ngwakunozgeka kumuka marombu ngamampha nga ŵanthu wo agomezga kuti iyu wavwisiya marombu ngawu
Kumbi ntharika iyi yititisambizanji zaku Yehova, yo ‘ngwakumuka marombu’? Yesu wakhumba kuti tiziŵengi kuti Yehova we nge Ada achanju wo mbakunozgeka kupaska ŵana ŵawu vo akhumbikiya. Mwaviyo, ateŵeti aku Yehova ŵe ndi wanangwa wakuromba ndi kumupempha ndi mtima wosi vo akhumba. Yiwu aziŵa kuti Chiuta watiŵakhumbiya vamampha, mwaviyo, mbakunozgeka kulonde kwamuka kwekosi ko wangaŵapaska, chinanga kuti vo angamukika ndivu alindizganga cha. c
Machaputala ngo Mungaŵerenga
a Ntharika yaku Yesu, yakonkhoskanga midawuku ndipuso vo Ayuda achitanga. Yiwu awonanga kuti kulonde alendu yenga nchitu yakupaturika. Banja, labikanga chakurya chakuti ŵanthu wosi aguti pa zuŵa lo, mwaviyo, asani alivi chakurya chinyaki achipemphanga kwa anyawu. Asani banja ndikavu, wosi agonanga pasi munyumba yambula chipinda.
b Yesu kanandi wagwiriskiyanga nchitu mazu ngakuti, “uli ukongwaku” asani wakhumba kupambaniska chimana ndi chikulu.
c Asani mukhumba kuziŵa mo mungarombe kuti Chiuta wavwisiyengi marombu nginu, wonani mutu 17, m’buku lakuti, Kumbi Bayibolo Lisambizanji Weniukongwa? lo likupharazgika ndi Akaboni aku Yehova.
