Yehova Chiuta wakhumba kuti ŵanthu wosi, kaya vinthu ve wuli pa umoyu wawu, asambiri vakukwaskana ndi iyu kweniso Ufumu waki wakuchanya. (1 Timote 2:3, 4) Chifukwa cha venivi, Akaboni aku Yehova apanga Mabayibolu kweniso vinthu vinyaki vo vitovya ŵanthu anandi ukongwa kuvwisa Bayibolu, kusazgiyapu so ambula kuvwa. Gulu lidu latuza mabuku masawuzandi nganandi mu mavidiyo nga chineneru chamanja, a ngo ngasanirika mu vineneru vamanja vakujumpha 100! Kumbi tichita wuli kuti tipangi mavidiyo ngenanga kweniso kuti ŵanthu angasaniyi? Nanga ndi vinthu nivi vo vasintha kutuliya po tikwambiya kutuza mabuku ngenanga?

 Mabuku nga chineneru chamanja ngapangika ndi matimu ngakufwatuliya mabuku pacharu chosi. Wakufwatuliya weyosi watiliŵerenga mwakuphwere buku pamwenga vidiyo yo akhumba kufwatuliya. Pavuli paki, akambiskana mo angakonkhoske umampha nkhani yo muchineneru chamanja. Asani achita venivi, yiwu ajambula vidiyo ya buku lo. Pasonu panu, matimu 60 ngafwatuliya nyengu zosi vinthu vakovya kuvwisa Bayibolu mu chineneru chamanja, ndipu matimu nganyaki 40 ngafwatuliya patalipatali.

 Mu nyengu yakali, gulu lagwiriskiyanga ndalama zinandi kuti apangi mavidiyo nga chineneru chamanja. Makamera ngakujambuliya mavidiyo kweniso vipangizu vinyaki venga vakudula ukongwa pakuyeruzgiya ndi mazuŵa nganu. Kweniso mavidiyo tajambuliyanga mu situdiyo, ngo tachitanga kuzenga tija, ndipu nyengu zinyaki tachitanga kunozga nyumba zakali. Gulu lagwiriskiyanga ntchitu ndalama zakujumpha madola 30,000 b kuti apangi situdiyo yimoza ya chineneru chamanja.

 Kuti ligwiriskiyengi ntchitu umampha ndalama zo abali apereka, gulu layesesa kusaniya nthowa zinyaki zakufwatuliya zambula kukhumba ndalama zinandi. Mwaviyo, tigwiriskiya ntchitu vipangizu vamazuŵa nganu, vo vitovya kweniso vakutchipa. Mumalu mwakugwiriskiya ntchitu situdiyo, matimu ngakufwatuliya ngangaŵika chisalu cha girini (green screen) mu ofesi mwawu ndi kujambula mavidiyo mumaofesi mwawu mwenimo. Asani muvidiyo muwoneka ŵanthu anandi wo afwatuliya chineneru chamanja, abali ndi azichi angajambula chigaŵa chawu mu ofesi mwawu pamwenga kunyumba kwawu. Yiwu akhumbika kuchita kuluta ku situdiyo cha.

 Tikupanga so pulogilamu yinyaki ya pa kompyuta yo yitovya akufwatuliya. Venivi vawovya kuti akufwatuliya afwatuliyengi mwaliŵi mabuku nga chineneru chamanja. Yiwu amaliza kufwatuliya buku pamwenga vidiyo, hafu ya nyengu yo amaliyangapu kali. Abali anyaki awonga ukongwa chifukwa cha kusintha kwenuku. Mubali munyaki zina laki Alexander wangukamba kuti: “Mavidiyo nga chineneru chamanja ngatuzika pafupipafupi ukongwa kuluska kali. Venivi vitindikondwesa ukongwa. Ndiwonere mavidiyo yanga zuŵa lelosi.”

 Mazuŵa nganu, gulu ligwiriskiya ntchitu ndalama zambula kukwana madola 5,000 kuti lipereki vinthu vosi vo timu ya akufwatuliya yikhumbika. Chifukwa cha venivi, tifiska kutuza mavidiyo nga vineneru vamanja vinandi.

 Asani timu yamaliza kujambula buku la chineneru chamanja, mavidiyo ngaki ngakhumbika kufika ku ŵanthu wo atingapenja. Kali, tapanganga makaseti ndipuso ma DVD. Kweni venivi vamalanga ndalama zinandi, tamaliyangapu nyengu yikulu kweniso paŵanga ntchitu yikulu. Vo tajambula taperekanga ku kampani yinyaki kuti yipangi ma DVD ndi makaseti nganandi. Pavuli paki, vinthu venivi tavitumizanga ku mipingu. Mu 2013 pe, tingugwiriskiya ntchitu ndalama zakujumpha madola 2,000,000 pakupanga ma DVD nga chineneru chamanja.

 Ŵanthu ambula kuvwa awonganga ukongwa chifukwa cha makaseti ndi ma DVD ngenanga. Kweni nyengu zinyaki venga vipusu cha kugwiriskiya ntchitu mavidiyo ngenanga, ukongwa tati tayamba kutuza makaseti ndi ma DVD nganandi. Nyengu zinyaki, buku limoza la mu Bayibolu laŵikikanga mu ma DVD nganandi. Mubali munyaki wa ku Brazil zina laki Gilnei wangukamba kuti: “Asani tikhumba kuŵerenga lemba, takhumbikanga kupenja kaseti yakwenere, pavuli paki ndipu tasaniyanga lemba lo tipenja. Venga vakusuzga ukongwa.” Mzichi Rafayane yo wakugwiriskiyapu ntchitu ma DVD nga chineneru chamanja wangukamba kuti: “Vapaskanga mphwayi kuti uchiti kusopa kwa pakuwija. Tamalanga nyengu yinandi kuti usaniyi waka malemba pamwenga malifarensi.” Ndipu asani abali ndi azichi ŵe mu uteŵeti, kanandi yiwu apinganga ma DVD pamwenga makaseti, ngo awoneriyanga pa TV ya mweneku wa nyumba. Abali anyaki achitanga kupinga ndi ma DVD player ngawu. Kweni pati pajumpha kanyengu kamanavi, ma DVD player ngamumanja ngo ngajanga ndi sikilini ngangwamba kusanirika, ndipu abali anandi angagwiriskiyanga ntchitu. Bobby, yo waja ku United States wangukamba kuti: “Asani wawonesa lemba linyaki ndipu ukhumba so kuwonesa lemba linyaki, kanandi wakhumbikanga kusintha DVD. Venivi vatonga nyengu kweniso taligwiriskiyanga ntchitu mwakukwana cha Bayibolu asani tikambiskana ndi ŵanthu.”

 Mu 2013, gulu laku Yehova lingutuza app ya JW Library Sign Language, yo yitovya abali ndi azichi kuti adawunilodengi kweniso kuwonere mavidiyo nga chineneru chamanja mumafoni pamwenga matabuleti ngawu. Pakwamba app yeniyi yingutuzika mu Chineneru Chamanja cha ku America pe. Pavuli paki, mu 2017, app yeniyi anguyisintha kuti yije ndi vineneru vamanja vinandi. Abali ndi azichi pacharu chosi angukondwa ukongwa. Mubali Juscelino yo waja ku Brazil, wangukamba kuti: “Ndinguvwana cha! Nyengu zosi ndaŵanaŵaniyanga mo Wupu Wakulongozga ulongore kuti utitiyanja isi ŵanthu ambula kuvwa, ndipuso ndaŵanaŵaniyanga mo yiwu akhumbiya kuti nasi tikuwi mwauzimu nge ŵanthu wo alongoro. Ndingukongwa ukongwa, ndipu app yeniyi yinguchitiska kuti ndisambirengi ukongwa Bayibolu.”

 Mazuŵa nganu, tituza mavidiyo nga vineneru vamanja vosi pa intaneti, ndipu ngaŵikika pa webusayiti yidu kweniso pa app ya JW Library Sign Language. Chifukwa cha venivi, mabuku nga chineneru chamanja ngangafwatulika, kujambulika, kweniso kuŵikika pa intaneti mu mazuŵa ngamanavi waka, mumalu mwa myezi pamwenga vyaka. Ndipu mu vineneru vamanja vinandi, mabuku ngatuzikiya nyengu yimoza ndi mabuku nga ŵanthu wo alongoro.

 Wonani vo abali ndi azichi anyaki ambula kuvwa akamba. Mzichi Klízia wangukamba kuti: “Ndi gulu linyaki nili lo litiŵaŵanaŵaniya ukongwa ŵanthu ambula kuvwa, mwakuti likhumbisiska kuŵapaska chakurya chauzimu munthowa yipusu? Palivi chechosi mucharu ichi cho tingayeruzgiya ndi vo gulu laku Yehova lititichitiya.” Vladimir wangukamba kuti: “Mavidiyo yanga ngatindisimikiziya kuti Yehova watanja ŵanthu ambula kuvwa nge mo watanjiya wo atuvwa.”

 Kanandi mavidiyo ngidu nga chineneru chamanja ngakamba kuti: “Buku ili liperekeka nge chigaŵa cha ntchitu yapacharu chosi yakusambiza ŵanthu Bayibolu ndipu yitovyeka ndi ndalama zo ŵanthu apereka mwakukhumba kwawu.” Tiwonga ukongwa ndalama zo mupereka, ndipu zinandi mwa ndalama zenizi mupereka kuziya pa donate.dan124.com. Ndalama zenizi ndizu zitovya kuti tipangengi ma Bayibolu kweniso vinthu vinyaki vo vitovya ŵanthu wosi kuvwisa Bayibolu, kusazgiyapu so wo agwiriskiya ntchitu chineneru chamanja.