Chaka chechosi, ateŵeti a nyengu zosi apade pacharu chosi adanika kuti akasere Sukulu ya Giliyadi yo yichitikiya ku Likulu la Masambiru la Watchtower ku Patterson, New York. a Asani ŵe ku sukulu iyi, ŵana a sukulu asambira vo angachita kuti afiski mauteŵeti ngakupambanapambana mu gulu laku Yehova. Vo asambira vitiŵawovya kuti akachiski mipingu kweniso kuti vinthu viyendengi umampha pa maofesi nga nthambi pacharu chosi.

 Abali ndi azichi wo adanika kuti akasere Sukulu ya Giliyadi atuliya pacharu chosi. Mwakuyeruzgiyapu, kilasi nambala 147 lo linguchitika mu 2019, lenga ndi ŵana a sukulu 56 ndipu angutuwa mu vyaru 29. Wo asere sukulu ya Giliyadi mbakuti achita kali uteŵeti wapade wanyengu zosi nge wo ateŵete pa Beteli, akuwonere madera, amishonale pamwenga apayiniya apade.

 Ntchitu yakunozgeke kilasi lelosi yitamba kweche nyengu. Mwakuyeruzgiyapu, Dipatimenti Yakuwona va Maulendu ku Likulu Lidu (World Headquarters Travel Department) yidumuliya limu matikiti nga ndegi nga abali ndi azichi wo adanika kusukulu iyi. Pa avereji, mwana wa sukulu weyosi wakutuliya mucharu chinyaki yo wangusere kilasi nambala 147 la Giliyadi, wakhumbikanga ndalama zakukwana madola pafufupi 1,075 nga ku America, kuti wayende kuluta ku Patterson ndi kuwere kwawu. Ŵana a sukulu wo angutuwa ku Solomon Islands, angukwera ndegi zinayi kuti akafiki ku Patterson ndipu pakuwere kwawu angukwera ndegi zitatu, vo vilongo kuti angwenda mtunda wa makilomita 35,400. Ndipu mwana wa sukulu weyosi wakutuwa mucharu ichi angumulipiriya ndalama zakukwana madola 2,300 nga ku America. Kuti aleki kunanga ndalama zinandi ukongwa, Dipatimenti Yakuwona va Maulendu ku Likulu Lidu yigwiriskiya ntchitu pulogilamu yinyaki yapa kompyuta kuti yifufuzengi ndengi zo ze ndi mtengu wamamphaku. Ndipu chinanga vingaŵa kuti abuka kali matikiti, pulogilamu iyi yilutirizga mbwenu kufufuza kwa masabata pamwenga myezi kuti awoni asani pe matikiti ngakusikiyapu mtengu. Dipatimenti iyi yigwiriskiya so ntchitu matikiti ngo abali anyaki apereka ku gulu nge chawanangwa.

 Ŵana a sukulu anandi akhumbika pasipoti yo yidanika kuti viza kuti aluti ku United States. Pa chifukwa chenichi, Dipatimenti Yakuwona va Marangu ku Likulu Lidu ndiyu yitovya kuti ŵana a sukulu asaniyi viza. Kuti asaniyi viza kweniso makalata nganyaki ngakwenere pa ulendu wawu, pa avereji, mwana wa sukulu weyosi wakhumbika ndalama zakukwana madola 510 nga ku America.

 Kumbi tosi tiyanduwa wuli ndi vo abali ndi azichi yaŵa asambira ku Sukulu ya Giliyadi? Mubali Hendra Gunawan ndi mura mumpingu unyaki ku Southeast Asia. Mu mpingu uwu awungana limoza ndi banja linyaki lo lingusere sukulu ya Giliyadi. Mubali Hendra wangukamba kuti: “Pakwamba, mu mpingu widu mwengavi mpayiniya weyosi wanyengu zosi. Kweni banja ili lati lafika kutuwa ku sukulu, phamphu lawu pa ntchitu yakupharazga kweniso mtima wawu wakujipereka vawovya abali ndi azichi anandi mwakuti anandi akwamba kuchita upayiniya. Pati pajumpha nyengu, mzichi munyaki wa mumpingu widu wakuchisere sukulu ya Apharazgi a Ufumu!”

 Mubali Sergio Panjaitan wateŵete pa Beteli ku Southeast Asia pamoza ndi abali ndi azichi anyaki wo akusere Sukulu ya Giliyadi. Iyu wangukamba kuti: “Vo abali ndi azichi yaŵa asambira ku sukulu iyi vitovya yiwu pe cha, kweni vitovya tosi. Yiwu asambira vinandi ukongwa! Kweni mumalu mwakujiwona kuti mbapachanya kuphara tanyawu, yiwu akambiyaku anyawu vo akusambira. Venivi vititichiska ukongwa ndipu nasi tichiska so anyidu.”

 Kumbi gulu lidu lituwa nazu pani ndalama zakwendese sukulu iyi? Ndalama zaki zituwa pa ndalama zo ŵanthu apereka zakovya pa ntchitu ya pacharu chosi ndipu pakupereka ndalama izi anandi agwiriskiya ntchitu nthowa zo zisanirika pa donate.dan124.com. Titikuwongani ukongwa chifukwa cha vawanangwa vo mupereka vo vitovya kuti abali ndi azichi pacharu chosi aserengi sukulu iyi.