Mu March 2020, wupu wa World Health Organization wati wapharazga kuti COVID-19 ndi mulili wa pacharu chosi, anandi aŵanaŵaniyangaku cha kuti mulili uwu ungafika mpaka sonu, po chaka chimoza chijumpha sonu. Ŵanthu mamiliyoni nganandi kusazgapu Akaboni aku Yehova anyaki, akukwaskika ukongwa ndi mulili uwu. Kumbi Akaboni aku Yehova achita wuli pa ntchitu yakupereka chovyu mu nyengu yakusuzga yeniyi?

 Makomiti Ngakovya pa Masoka, ngakukwana 950 ngakupangika pacharu chosi mwakulondo ulongozgi kutuwa ku Komiti ya Akukumaniska ya Wupu Wakulongozga wa Akaboni aku Yehova. Makomiti yanga ngakupangika kuti ngawovyi pa nyengu iyi ya COVID-19. Nyengu zinyaki, makomiti yanga nganozga ndondomeku yakuti abali ndi azichi alondiyengi chovyu cho chiperekeka mu vigaŵa vawu ndipu nyengu zinyaki abali angalonde chovyu cho boma lipereka. Ngapereka so chovyu ku malu ko kukhumbika ukongwa chovyu.

 Mwakuyeruzgiyapu, ŵanaŵaniyani vo vinguchitika ku Paraguay. Nyuzipepala yinyaki yingukamba kuti masuzgu nga zachuma ngo ngaza chifukwa cha mulili wa COVID-19, ngachitiska kuti “ŵanthu anandi ku Paraguay aŵevi chakurya chakukwana.” Kweni Komiti Yakovya pa Masoka ku Paraguay, yikwambapu kali kugaŵiya ŵanthu chakurya, vinthu vakovya kuti ŵanthu aje achanda kweniso vinthu vinyaki vakukhumbika, vakuti banja la ŵanthu anayi lingavigwiriskiya ntchitu kwa masabata ngaŵi. Vinthu vo banja lelosi lalondiyanga vakwananga madola pafufupi 30 nga ku America.

 Kumbi ŵanthu wo apereka chovyu achita wuli kuti ajivikiliyi kweniso kuti avikiriyi anyawu ku COVID-19? Yiwu avwala masiki kweniso aja patalipatali ndi anyawu. Awonesesa so kuti makampani ngo ngagulisa vakurya, ngaŵika vakurya vo mumalu ngakutowa kweniso kuti alondo ulongozgi wa mo angajivikiliya. Yiwu awonesesa kuti ŵanthu wosi wo ako vinthu vo vagulika, avwala vakujivikiliya, asuka kweniso kupuputa magalimotu ngawu ndi munkhwala wakubaya majeremusi ndipuso kuti vinthu vo agula vasungika pa malu ngo apuputapu ndi munkhwala wakubaya majeremusi. Pakumaliya paki, ŵanthu wo atachipereka kwa abali ndi azichi vinthu vo vagulika, awonesesa kuti ŵama pataliku ndi abali wo alonde.

 Kufika mu January 2021, Komiti ya Akukumaniska yinguzomereza kuti ndalama zakukwana madola ngakujumpha 25 miliyoni nga ku America, zigwiriskikiyi ntchitu pakupereka chovyu pa nyengu ya COVID-19. Maofesi nga nthambi kweniso Makomiti Ngakovya pa Masoka, ngagwiriskiya ntchitu mwakuphwere ndalama zo ŵanthu apereka kuti aguli vinthu vo vikhumbika pa mitengu yakusika. Mwakuyeruzgiyapu, ku Chile, abali wo awonere ntchitu yakupereka chovyu akhumbanga kugula tinthamba timanatimana takukwana makilogiramu 750. Kweni yapa ndipu mtengu wakwera maulendu ngaŵi kuyeruzgiya ndi mo wenge mwezi wajumpha. Pati pajumpha waka maora ngaŵi kutuwa po angukoliyana kuti aguli nthamba zenizi pa mtengu wakukwera, munthu yo wagulisanga wanguŵakambiya kuti munthu yo wazikhumbanga pakwamba watondeka. Sonu mumalu mwakuŵatchaja mtengu wakukwera wo angukoliyana, abali angugula pa mtengu wakusika wa mwezi wajumpha!

 Kweni, abali ŵati aluta kuti akato nthamba zo, munthu yo wagulisanga wakhumbanga kuti vo angupangana vileki kuchitika. Iyu wangukamba kuti abali yaŵa amugaŵiya ŵanthu mwaurunji cha chakurya chifukwa ndivu mawupu nganyaki ngachita. Ŵati apemphera chamumtima, yumoza mwa abali yaŵa wangukambiya munthu uyu kuti mpingu wewosi wafufuza kali kuti aziŵi ŵanthu wo akhumbika nadi chovyu. Angumukonkhoske so kuti chifukwa chakuti ŵanthu wo amulonde chakurya ichi mbakutuliya mu vyaru vakupambanapambana, banja lelosi lamulonde chakurya cho chingaŵa nadi chakwenere ku banja lo. Ndipu pakumaliya angumusimikiziya kuti ntchitu yo Akaboni aku Yehova agwira alipirika cha ndipuso ndalama zo agwiriskiya ntchitu ndi ndalama zo ŵanthu apereka mwakukhumba kwawu. Munthu uyu wanguzizwa ukongwa wati wavwa venivi. Ndipu wanguŵatuzgiyaku nadi mtengu kweniso pa ulendu unyaki wo abali yaŵa anguza so kuzigula tinthamba iti, wanguŵasazgiyapu zinyaki zawezi zakukwana makilogiramu 400.

 Mzichi munyaki wakukota ku Liberia, zina laki Lusu, mulumu waki wakutayika ndipu pasonu panu waja ndi mwana waki munthukazi ndi mulumu waki kweniso ŵana ŵawu. Zuŵa linyaki achirya chakurya cha mulenji kweniso achikambiskana lemba la zuŵa, mzuku waki wa vyaka 7, wanguziŵa kuti chakurya chamala panyumba. Iyu wangufumba kuti, “Sonu tiryengenji?” Lusu wangusimikiziya mzuku waki kuti wayipemphere kali nkhani yeniyi kwaku Yehova ndipu wagomezga kuti waŵawovyengi. Mazulu nga zuŵa lenili, Lusu wangulonde foni kutuwa kwa ŵara mumpingu ndipu angumudana kuti waluti kuchilonde chakurya. Iyu wangukamba kuti: “Mzuku wangu wangukamba kuti sonu ndipu waziŵa kuti Yehova watuvwa kweniso kumuka mapempheru chifukwa chakuti wangumuka pempheru langu.”

 Munthukazi munyaki wa ku Democratic Republic of Congo, waja pafupi ndi nyumba ya banja linyaki lo Mbakaboni aku Yehova. Wati wawona kuti banja ili lilonde chakurya kutuwa kwa Akhristu anyawu, wangukamba kuti: “Asani mulili wamala, nasi tazamuja Akaboni aku Yehova chifukwa atovyana ukongwa pa nyengu yakusuzga.” Mulumu waki wangumufumba kuti: “Wazamuja Kaboni waku Yehova chifukwa waka cha thumba la mpunga lo wawona po?” Iyu wangumuka kuti: “Awa, kweni thumba la mpunga lo mbukaboni wakuti ŵanthu yaŵa atanjana nadi.”

 Isi Akaboni aku Yehova tichitapu kanthu mwaliŵi asani abali ndi azichi ŵidu akhumbika chovyu pa nyengu yinu ya mulili. Tifiska kuchita venivi chifukwa cha ndalama zo mupereka mwakukhumba kwinu. Titikuwongani ukongwa chifukwa cha ndalama zo mupereka pa ntchitu ya pacharu chosi, mwakugwiriskiya ntchitu nthowa zo zisanirika pa donate.dan124.com.