Bayibolu lilongo kuti kujiyanja mwakwenere nkhwamampha. Munthu yo watijiyanja mwakwenere watijiphwere, watijitumbika kweniso watijiwona kuti ngwakukhumbika. (Mateyu 10:31) Kweniso Bayibolu lilongo kuti munthu wakhumbika kujiyanja mwakwenere mumalu mwakujikuzga.

Kumbi ndiyani yo titenere kumuyanja ukongwa kuluska weyosi?

1.   Titenere kwanja ukongwa Chiuta. Bayibolu lisambiza kuti dangu likulu ukongwa ndakuti: “Uyanjengi Yehova Chiuta waku ndi mtima waku wosi.”​—Mariko 12:28-​30; Marangu 6:5.

2.   Dangu lachiŵi ndakuti: “Uyanjengi munyaku nge mo utijiyanjiya wamweni.”​—Mariko 12:31; Ŵalevi 19:18.

3.   Mu Bayibolu mulivi dangu lakuti tijiyanjengi, kweni mwe dangu lakuti “uyanjengi munyaku nge mo utijiyanjiya wamweni.” Mazu yanga ngalongo kuti nkhunanga cha kujiyanja mwakwenere kweniso kujitumbika.

Kumbi Yesu wayanjanga ukongwa yani?

 Yesu wangulongo vo tingachita kuti tiyanjengi Chiuta, anyidu kweniso kuti tijiyanjengi taŵeni. Ndipu iyu wangukambiya akusambira ŵaki kuti achitengi vo iyu wachitanga.​—Yohane 13:34, 35.

1.   Iyu wayanjanga Yehova Chiuta kuluska chinthu chechosi ndipu wajiperekanga ndi mtima wosi kuti wafiski ntchitu yo Chiuta wangumutuma. Iyu wangukamba kuti: “Kuti charu chiziŵi kuti nditanja Ada, ndichitengi nge mo Ada akundilamuliya.”​—Yohane 14:31.

2.   Yesu wayanjanga ŵanthu. Iyu wangulongo ivi chifukwa chakuti waŵaŵanaŵaniyanga ndipu wangupereka umoyu waki chifukwa chaku yiwu.​—Mateyu 20:28.

3.   Iyu wangulongo kuti watijiyanja mwakwenere chifukwa chakuti wapumuwanga, waryanga kweniso wachezanga ndi ŵanthu wo amulondonga kweniso ŵanthu anyaki.​—Mariko 6:​31, 32; Luka 5:​29; Yohane 2:​1, 2; 12:2.

Kumbi kwanja ukongwa anyidu kuluska taŵeni kuchitiska kuti tilekengi kukondwa kweniso kupaskika ulemu?

 Awa, chifukwa tikulengeka muchikozgu chaku Chiuta yo jalidu likulu ntchanju. (Chiyambo 1:27; 1 Yohane 4:8) Venivi vilongo kuti nasi tikulengeka munthowa yakuti tiyanjengi anyidu. Chinanga kuti tikhumbika kujiyanja taŵeni, kweni tingakondwa ukongwa asani titanja Chiuta kuluska chinthu chechosi kweniso asani titesesa kuŵachitiya vinthu vamampha anyidu. Bayibolu likamba kuti, “kupaska kuchitiska kuti munthu wakondwengi ukongwa kuluska kulonde.”​—Machitidu 20:35.

 Mazuŵa nganu ŵanthu anandi awona kuti munthu wakondwa asani watijiyanja. Yiwu awona kuti “kujiyanja” nkhwakukhumbika ukongwa kuluska “kwanja anyawu.” Kweni maukaboni ngalongo kuti munthu watamatama cha kweniso wakondwa asani walondo ulongozgi wa mu Bayibolu wakuti: “Munthu weyosi wangapenjanga vakukhumba vaku iyu yija cha, kweni walutirizgi kupenja vakukhumba va munyaki.”​—1 Akorinto 10:24.