Mu Bayibolu, mpha lemba la Levitiko 19:28 pe po pakamba vakukwaskana ndi kujilemba pamwenga kujijambula vinthu paliŵavu. Lemba ili likamba kuti: “Mungajambulanga vinthu cha paliŵavu linu.” Chiuta wangupereka dangu lenili ku mtundu wa Ayisirayeli kuti angatoliyangaku cha vo ŵanthu amitundu yinyaki wo ajilembanga mazina paliŵavu pamwenga kujilemba vizindikiru va achiuta ŵawu. (Dotoronome 14:2) Chinanga kuti Akhristu mazuŵa nganu atende Dangu lo Ayisirayeli angupasika cha, kweni fundu ya mu dangu lenili njakukhumbika kuyiŵanaŵaniya.

Kumbi Mkhristu watenere kujilemba pamwenga kujijambula vinthu paliŵavu?

 Malemba ngo nge mumphata umu ngakuwovyeningi pa nkhani yeniyi:

•   “Anthukazi atenere kujitowesa . . . mwaulemu.” (1 Timote 2:9) Fundu yeniyi yigwira ntchitu kwa anthukazi ndi anthulumi viyo. Tikhumbika kuŵanaŵaniya anyidu pa vo tisankha, mumalu mwakujikondwesa ŵaka tija.

•   Ŵanthu anyaki atijilemba pamwenga kujijambula vinthu paliŵavu chifukwa chakukhumba kutchuka, po anyaki akhumba kujilongo kuti angachita chechosi cho akhumba pa liŵavu lawu. Kweni Bayibolu lichiska Akhristu kuti: “Mupereki maliŵavu nginu nge sembi yamoyu, yakupaturika kweniso yakuzomerezeka kwaku Chiuta, yeniyo mbuteŵeti wakupaturika limoza ndi lusu linu lakuŵanaŵana.” (Aroma 12:1) Mwaviyo, mugwiriskiyengi ntchitu “lusu linu lakuŵanaŵana” kuti muziŵi chifukwa cho mukhumbiya kujilemba pamwenga kujijambula paliŵavu. Asani ntchifukwa chakuti mukhumba ŵaka kutchuka pamwenga kujilongo kuti mwe mugulu linyaki, mukumbukengi kuti chinanga kuti kunthazi mungazisintha vakuchita vinu, kweni vo mwajilemba pamwenga kujijambula vingazituwapu cha. Kuŵanaŵaniya mwakuphwere pa nkhani iyi kungakuwovyani kuti musankhengi vinthu mwazeru.—Nthanthi 4:7.

•   “Vinthu vo munthu waphamphu waŵanaŵana vichitiska kuti vinthu viyendi umampha, kweni wosi wo achita vinthu mwakupupuluma akavukengi.” (Nthanthi 21:5) Asani munthu wakhumba kujilemba pamwenga kujijambula vinthu paliŵavu, kanandi waŵanaŵaniyapu cha kuti wangatondeka kusaniya ntchitu kweniso wangaŵavi mabwezi chifukwa chakuchita venivi. Kweniso kuti munthu wafufutisi vo wajijambula paliŵavu pakhumbika ndalama zinandi kweniso viŵaŵisa liŵavu. Kafukufuku kweniso vo ŵanthu wo achita malonda ngakufufuta vo ŵanthu ajilemba pamwenga kujijambula akamba, walongo kuti ŵanthu wo achita venivi akamba kuti akaziŵengi mphanyi angujilemba cha.