Ciindi zikombelo zya Bunakristo Bwanyika nozyakamvwa kuti Bakamboni ba Jehova bakapegwa lwaanguluko lwakukomba, zyakabijilwa kapati akutalika kutongooka. Basololi bazikombelo alimwi abalupati-pati batali bafwundisi ibainda ku 700 kuzwa kuzikombelo zyaci Pulotesitanti zili ciloba bakaba amuswaangano mu Jakarta wakuti bakombelezye mfwulumende kuti yuulesye alimwi mulimo wesu. Pele mfwulumende yakabakakila.

Makani aakuti mulimo wesu wazumizyigwa naakamwaika mucisi coonse, bantu banji ibajisi luyandisisyo bakalembela ofesi yamutabi kulomba mabbuku naa ziiyo zya Bbaibbele. Mu 2003, bantu bainda ku 42,000 bakajanika ku Ciibalusyo, walo iwakali mweelwe mupati kapati kwiinda mweelwe wabasikumwaya mucisi. Bantu batandila ku 10,000 bakajanika kumuswaangano mu Jakarta, kubikkilizya awalupati-pati umwi mucibeela camfwulumende cilanganya makani aabukombi citegwa Department of Religious Affairs. Mwaalumi ooyu wakagambwa kubona baswiilizi, nkokuti bana baniini alimwi abapati kabajalula ma Bbaibbele aabo akubala magwalo aakali kwaambwa. Wakasyomezya bakwesu kuti wakali kuyakwaalulamika makani aakubeja aakamwaikide kujatikizya Bakamboni ba Jehova.

Kuyungizya waawo, kuzumizyigwa kwamulimo wesu mucisi kwakajalula mulyango wakuti bamisyinali bapiluke ku Indonesia. Akati kabamisyinali bakusaanguna ibakapiluka, kwakali ba Josef aba Herawati Neuhardt * (kuzwa ku Solomon Islands), ba Esa aba Wilhelmina Tarhonen (kuzwa ku Taiwan), ba Rainer aba Felomena Teichmann (kuzwa ku Taiwan), alimwi aba Bill aba Nena Perrie (kuzwa ku Japan). Bakatobelwa abamisyinali ibakazwide aakumanizya Cikolo ca Gileadi ibakatumwa ku North Sumatra, Kalimantan, North Sulawesi, alimwi amasena aambi aakali kulamfwu.

 Mu 2005, ofesi yamutabi yakeendelezya makkilasi obilo aazikolo zyeendelezyegwa a Leza zipya. Mwiiyi umwi wa Cikolo Cakwiiya Mulimo (lino ciitwa kuti Cikolo Cabakambausi ba Bwami), mukwesu Julianus Benig, wakaamba kuti: “Ndakali kukukkomanina kapati kugwasya basicikolo kuti bayaambele mukuyiisya, mukwaamba makani, alimwi akuti bakonzye kubelesyegwa ambunga munzila ziindene-indene.” Ibunji bwabaabo ibakamanizya cikolo eeci lino mbapainiya baalubazu naa mbalangizi babbazu. Bunji bwabakwesu ibakali mukkilasi yakusaanguna ya Cikolo Cabalangizi Beendeenda * kumatalikilo bakayiisyidwe aaciindi mulimo wesu nowakalesyedwe. Cikolo cipya cakabagwasya kubeleka milimo njobakapegwa kucita ciindi mulimo wesu nowakazumizyigwa alimwi. Mukwesu Ponco Pracoyo, iwakali mukkilasi yakusaanguna, wakaamba kuti: “Cikolo eeci cakandigwasya kuba muntu uulalubomba alimwi uubikkila maano kapati mukucita mulimo wangu kandili mulangizi wabbazu. Cakali kukatalusya alimwi akukulwaizya kapati!”

Mumyaka yoonse iili 25 mulimo wesu nowakalesyedwe, mbungano zinji mucisi ca Indonesia zyakali kuswaanganina mumaanda aabakwesu. Nimbungano zisyoonto buyo izyakali kukonzya kuliyakila Ŋanda ya Bwami, alimwi cakali kukatazya kapati kujana mapepa aazumizya kuyaka maanda aakukombela. Akaambo kakuti mbungano zinji zyakali kukomena cakufwambaana kapati, ofesi yamutabi yakatalisya cibeela cilanganya mayake aa Maanda aa Bwami citegwa Kingdom Hall Construction Desk (lino iciitwa kuti Dipatimenti Iipanga Mapulani Alimwi Akuyaka Mayake Mucisi) kuti ilanganye makani aaya aakali kuyandika cakufwambaana.

Busena bumwi bwakusaanguna ibwakagwasyigwa abubambe oobu bupya bwakuyaka ninsumbu iitegwa Nias Island mu North Sumatra. Mukwesu Haogo’aro Gea, iwakkala kwaciindi cilamfwu mu Mbungano ya Gunungsitoli waamba kuti: “Notwakamvwa kuti tuyakuyakilwa Ŋanda ya Bwami mpya, twakakkomana kapati. Ofesi yamutabi yakatuma basikulisungula kuyaka ibali ciloba kuti balanganye mulimo ooyu. Ŋanda ya Bwami eeyo yakamana kuyakwa mu 2001.” Ba Faonasökhi Laoli, ibamukkomiti yakuyaka, baamba kuti: “Kaindi twakali kuswaanganina mumaanda aabakwesu, alimwi bantu bamucilawo tiibakali kubalemeka Bakamboni ba Jehova. Pele mbotwakamanina buyo kuyaka Ŋanda ya Bwami, bantu banji bakatalika kuboola kumiswaangano, aboobo mweelwe wabantu ibakali kujanika wakavwula kuzwa ku 20 kusika ku 40. Mumyezi iili 12, mweelwe wabantu bakali kujanika wakayungizyigwa kwiinda aa 500 pesenti (nkokuti bantu babalilwa kuma 240). Busena bwesu bwakukombela mbobwiinda kubota mucilawo cesu, alimwi lino bantu balabalemeka Bakamboni ba Jehova.”

Mu 2006, mu Bandung, ku West Java, bakwesu bakatalika kuyandaula busena bwakuyakila Ŋanda ya Bwami yakusaanguna mudolopo eelyo. Mukwesu Singap Panjaitan, mwaalu iwakali mukkomiti yakuyaka waamba kuti: “Cakatutolela myezi iili 12 kuti tujane busena bweelede ibwakuyakila. Pele twakali kuyandika bantu batali Bakamboni ibakkala munsi-munsi bataleli ku 60 kuti baazuminizye mayake, ndendilyo  mfwulumende noyakali kuyootupa pepa lituzumizya kuyaka. Bantu ibali 76 bakaazuminizya mayake, kubikkilizya amukaintu umwi uulaampuwo ooyo kumatalikilo iwakali kutulwana. Ŋanda ya Bwami noyakamana kuyakwa, twakatamba bantu bakkala munsi-munsi alimwi abapati badolopo, nkokuti bameya bamu Bandung kuti bazyikubone mayake eesu. Bameya bakaamba kuti: ‘Busena oobu bwakukombela ibusalala alimwi bubambidwe kabotu ncikozyanyo cibotu ncozyeelede kutobela zikombelo zimbi zyoonse.’” Ŋanda ya Bwami eeyo iijisi midadaada yobilo kuya mujulu yakaabwa mu 2010.

Kuzwa mu 2001, Maanda aa Bwami aainda ku 100 akayakwa mucisi ca Indonesia, nokuba boobo kuli manji aaciyandika kuyakwa.