Buumi Bubotu Mubulelo bwa Leza

LINO-LINO zyintu zyoonse zitupa kulibilika kujatikizya ziboola kumbele ziyakumana akaambo kakuti Leza ngunooendelezya Nyika eeyi kwiinda mumfwulumende yakwe iitegwa Bwami bwa Leza. Oobu mbobulangizi mbwaakajisi Jesu Kristo naakayiisya basikwiiya bakwe kuti kabapaila kuti: “Abuze Bwami bwako, alucitwe luyando lwako, ansi ano mbubonya mbuli kujulu.”—Matayo 6:9, 10.

Bwami bwa Leza kunyina nobuya kubelekela antoomwe abasololi batwaambo twacisi. Muciindi caboobo, buya kugusya bulelo boonse bwabantu batayandi kweendelezyegwa a Leza mbubonya mbokutondezyedwe mubusinsimi butobela bwa Daniele bwakali kwaamba ciindi ncotupona lino “kumazuba aakumamanino.” (2 Timoteo 3:1) “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, . . . Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” (Daniele 2:44) Imajwi aaya taabakondi aabo basyoma bulelo bwabantu, pele kuli baabo bayanda kweendelezyegwa aa Leza kwiinda mu Bwami bwakwe alakonzya kubapa bulangizi bubotu kapati.

Buumi Bubotu Kumbele

Bwami bwa Leza bwaakutalika kweendelezya nyika yoonse, aabo baya kulelwa kunyina nobaya kwaandaana akaambo katwaambo twacisi, mubala, bukombi naa migano yazisi. Muciindi caboobo, baya kukamantana mubunyina bwanyika yoonse kwiinda mukuzyiba kasimpe ka Leza akuba aluyando lwini-lwini. (Johane 13:34, 35; 17:3, 17) Masimpe, mu Bwami bwa Leza, ‘baluleme bayookomena’ alimwi ‘luumuno luyoovwula ciindi coonse mwezi nuuciliwo.’—Intembauzyo 72:7.

Kunze lyaboobo, Bwami bwa Leza buya kusumpula bantu bamumvwida kwiinda mukubapa buumi bulondokede akumanizya malwazi oonse, kupenga alimwi alufwu. (Ciyubunuzyo 21:3, 4) Mpoonya, nyika eeyi iyakuba paradaiso yeebeka alimwi ciyoopa kuti makanze ngaakaamba Leza kumatalikilo mumuunda wa Edeni azuzikizyigwe.—Matalikilo 1:28.

Mulumbe Wiinda Kubota

Naakali kwaamba citondezyo “camamanino aaciindi,” Jesu wakaamba kuti citondezyo eeco cakali kuyoobikkilizya kaambo kamwi kakkomanisya. (Matayo 24:3-7) Wakati: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:14.

Kweelana amakanze aa Leza, mumwaka wa 2007 Bakamboni ba Jehova batandila kutuulunzuma tuli ciloba mumasi aali 236 bakatola lubazu calukkomano mumulimo wakwaambilizya mulumbe wa Bwami kuli basimukobonyina. Nobakali kucita boobo, bakabeleka mawoola aayinda ku 1.4 bbiliyoni. Ncinzi cipa kuti Bakamboni ba Jehova babe alusyomo luyumu muzisyomezyo zyamu Bbaibbele? Kaambo kalisalede. Mbuli mbocipandulula cibalo citobela, Leza ulasyomeka lyoonse.—Ba-Roma 3:4.

[Majwi aakwelelezya sikubala aali apeeji 16]

Ibbaibbele lyaamba kuti ‘luumuno luyoovwula’