Mulongwe Mubi

Mulijisi “mulongwe” ngomwakazyibana kamucili baniini. Wakamupa kulimvwa kuti mwakomena alimwi wakali kulibonya mbuli kuti ngowakali kumugwasya kutegwa kamumvwana abeenzinyoko. Ikuti kamutyompedwe, lyoonse mwakali kuunka kulinguwe kuti “akamuyumye-yumye.” Asunu, mulangila kulinguwe kuti amugwasye mubukkale bwiindene-indene.

Pele mukuya kwaciindi, mwakazyiba kuti tali kabotu pe. Uyanda kuti kamuli antoomwe lyoonse, nokuba kuti kuba anguwe kumupa kuti kamuteeleli kunjila mumasena amwi. Alimwi, nokuba kuti wakamupa kulimvwa kuti mwakomena, wakacita oobo kwiinda mukubikka buumi bwenu muntenda. Kuyungizya waawo ulamubbida mali amwi ngomuvwola.

Lino musola kuti muleke kumvwana anguwe, pele tayandi. Munzila imwi, waba nguumweendelezya. Lino mulaliyeeya kuti anu nomwatakazyibana buyo anguwe.

EECI ncecilongwe cili akati kabantu banji ibafweba alimwi atombwe. Ba Earline, bakaintu ibakali kufweba kwamyaka iili 50, bakaamba kuti: “Tombwe wakali kundigwasya kwiinda mbokwakali kukonzya kundigwasya kuba amuntu wini. Tanaakali buyo mulongwe wangu wakaindi—zimwi ziindi ngowakali mulongwe wangu alikke.” Nokuba boobo, kumbele amazuba ba Earline bakazyiba kuti mubwini, tombwe mulongwe mubi alimwi ngusilunya. Masimpe, majwi aalembedwe atala aawa akali kukonzya kwaambwa kujatikizya mbabo. Pele lwiindano luliko ndwakuti, balo nobakazyiba kuti kufweba nkubi mumeso aa Leza akaambo kakuti nkusofwaazya mibili njaakatupa, bakacileka cilengwa eeci.—2 Ba-Korinto 7:1.

Baalumi bamwi bategwa ba Frank abalo bakayeeya kuti baleke kufweba kutegwa bakkomanisye Leza. Pele nokwakainda buyo mazuba obile bakalijana buyo kabakalaba ansi kuyandaula tusyiki twatombwe ntobakali kusowa. Baamba kuti: “Eeci cakandipa kuyeeya. Muzeezo wakuti ndilakalaba ansi mutombe kuyandaula tusyiki wakandisesemya. Kuzwa leelyo ndakacilekelalyo kufweba.”

Ino nkaambo nzi kuleka kufweba ncocikatazya boobu? Basikuvwuntauzya bakajana twaambo tusiyene-siyene: (1) Tombwe ulazibilika mbubonya mbuli misamu imbi iikola. (2) Muntu nafweba naa kuyeeka busi bwatombwe, musamu uutegwa nicotine uujanika mutombwe ulafwambaana kusika kubongo mutuvwalu-vwalu buyo tuli ciloba. (3) Kufweba inga caba cintu ciyandika kapati mubuumi bwamuntu mbubonya mbuli kulya, kunywa, kwiizya, kumana kulendelelwa naa kutyompwa, akucita zyintu zimbi.

Nokuba boobo, kweelana acitondezyo caba Earline aba Frank, muntu ulakonzya kucileka cilengwa eeci cibyaabi. Ikuti naa mulafweba pele lino muyanda kucileka, ikubala zibalo zitobela kulakonzya kumugwasya kucita boobo alimwi akutalika kupona buumi bupya.