Mulakonzya Kwiiya Kuba Basiluumuno

NOKUBA kuti tulakonzya kuzyalwa atumpenda tubyaabi, bube bwankondo buyiigwa buya. Oobo mbocibede akuba abube bwaluumuno. Pele, ino nguni uukonzya kutuyiisya kuba aluumuno lwini-lwini? Masimpe ngakuti, Mulengi wesu sibusongo nguujisi nguzu zyakutuyiisya. Amulange-lange twaambo ootu tosanwe mbotutondezya busongo bujanika mu Bbaibbele.

1 “Utabi amunyono kumuntu silunya.” (Tusimpi 3:31) Amuzyibe kuti muntu mubombe moyo alimwi uukkazyika moyo ngusicamba ncobeni. Lugwalo lwa Tusimpi 16:32 lwaamba kuti: “Uumuka kukalala mubotu kwiinda mulemu.” Nkaambo ngusicamba, ulakonzya kuliyumya kuti atanyemi. Mubwini, ciindi nobamunyemya, ulaingula camoyo mubombe alimwi ‘akulesya bukali.’ (Tusimpi 15:1) Muntu uunyemede kapati ulakonzya kubusya nkondo nomuba mukaambo katayi akoomoonga.—Tusimpi 25:28.

2 Amusale balongwe camaano. Lugwalo lwa Tusimpi 16:29 lwaamba kuti: “Silunyonyongano uloongelezya mweenzinyina.” Kulubazu lumbi, “uuenda abasongo ulasongwaala.” (Tusimpi 13:20) Masimpe ngakuti, ciindi notuyanzana abantu basiluumuno alimwi ababombe myoyo, tulakonzya kubwiiya bube bwabo.

3 Amube aluyando lwini-lwini kubantu. Luyando lulapandululwa kabotu-kabotu mulugwalo lwa 1 Bakolinto 13:4-7. Mubufwaafwi, tubala kuti: “Luyando lulakkazyika moyo alimwi luli aluzyalo. . . . Talukalali, talubikkilili. . . . Lulajatila zyintu zyoonse, . . . lulaliyumya muzyintu zyoonse.” Jesu wakaamba kuti, ikuti twamwiiya Leza mukutondezya luyando, tuyoobayanda abasinkondoma.—Matayo 5:44, 45.

4 Amumusyome Leza kuti uyoobasubula basizibi. “Mutapilusizyi muntu uuli woonse bubi. . . . Kamusoleka kusikila mpomugolela kukkala muluumuno abantu boonse. Nobayandwa, mutapilusizyi muntu cibi, . . . nkaambo kulembedwe kuti: ‘Cisubulo ncicangu; ndime nendiyoopilusya cibi, mbwaamba Jehova.’” (Baloma 12:17-19) Kuti naa katujisi lusyomo muli Leza amuzisyomezyo zyakwe, tulakonzya kuba aluumuno lwamumizeezo lwalo bantu batasyomi ndobatakonzyi kumvwisya.—Intembauzyo 7:14-16; Bafilipi 4:6, 7.

5 Amusyome Bwami bwa Leza kuti buyooleta luumuno anyika. Bwami bwa Leza nimfwulumende yakujulu yalo ino-ino iyoogwisya bubi boonse alimwi akweendelezya nyika yoonse. (Intembauzyo 37:8-11; Daniele 2:44) Mu Bwami oobu ‘bululami buyookomena,’ alimwi kuyooba ‘luumuno ciindi coonse mwezi nuuciliwo.’—Intembauzyo 72:7.

Njiisyo yamu Bbaibbele iili boobu yabagwasya bantu banji—kubikkilizya abantu bayandisya nkondo—kutegwa babe basiluumuno.