“[Musinsimi wa Leza] Daniele wakalota ciloto . . . naakelede abulo bwakwe. Mpawo wakalemba ciloto akwaamba mitwe yamakani.”—Daniele 7:1.

NCOLYAAMBA BBAIBBELE

Leza wakali kupa milumbe iiyandika kubantu munzila zisiyene-siyene. Zimwi ziindi, Leza kaindi wakali kubelesya ziloto. Alimwi eeyi tiiyakali milumbe iikatazya kumvwisya iyakali kucitika abuzuba. Ziloto kuzwa kuli Leza zyakali kutobeleka alimwi zyakajisi mulumbe uugaminide. Mucikozyanyo, muciloto, musinsimi Daniele wakabona banyama ibakali kwiiminina mfwulumende zyatwaambo twacisi kuzwa kuli Babuloni mane kusikila mazuba aano. (Daniele 7:1-3, 17) Kwiinda muciloto, Leza wakaambila Josefa waku Nazareta, usyi Jesu, kuti atijile ku Egepita amukaintu wakwe alimwi amwana. Akaambo kaceeci, Jesu tanaakajaigwa a Mwami Heroda. Heroda naakafwa, Leza wakaambila Josefa kujatikizya lufwu lwakwe kwiinda muciloto, mpoonya akumwaambila kuti apiluke kwabo amukwasyi wakwe.—Matayo 2:13-15, 19-23.

“Mutaindilili zyintu zilembedwe.”—1 Bakolinto 4:6.

NCOLYAAMBA BBAIBBELE

Ziloto izyakalembwa mu Bbaibbele ncibeela camakani aalembedwe Leza ngaakayubunwida bantu. Kujatikizya makani aaya, lugwalo lwa 2 Timoteyo 3:16, 17 lwaamba kuti: “Magwalo oonse akasololelwa a Leza alimwi alagwasya mukuyiisya, mukusinsa, mukululamika, mukulaya cabululami, kutegwa muntu wa Leza aelele ncobeni, kalibambilide cakumaninina kubeleka mulimo mubotu uuli woonse.”

Ibbaibbele litupa ‘kulibambila cakumaninina’ mukuti lilayubununa zyoonse nzyotuyanda kuzyiba kujatikizya Leza, bube bwakwe, zyeelelo zyakwe zyakulilemeka, alimwi alubazu ndotujisi mumakanze aakwe kujatikizya nyika. Aboobo, Leza tacibelesyi ziloto kwaambaula abantu pe. Ikuti naa tuyanda kuzyiba makani aakumbele alimwi akuyanda kwa Leza kujatikizya ndiswe, tatweelede ‘kwiindilili azintu zilembedwe’—nkokuti, izilembedwe mu Bbaibbele. Kuyungizya waawo, muntu uuliwoonse ulakonzya kuba andilyo bbuku eeli alimwi akubala makani manji aazwa kuli Leza, kubikkilizya aziloto.

“Bantu bakaambaula zyakazwa kuli Leza kwiinda mukusololelwa amuuya uusalala.”—2 Petulo 1:21.

NCOLYAAMBA BBAIBBELE

Ziloto alimwi azilengaano zilembedwe mu Bbaibbele zyakali zyabusinsimi, nkokuti zyakali kwaambila limwi zintu izyakali kuboola kumbele. Kwiinda mukulemba businsimi oobu, basikulemba Bbaibbele bakali kutondezya kuti babali balakonzya kubasyoma alimwi akuti Magwalo ngamasimpe. Sena nzyobakalemba zyakaliluzi? Atulange-lange cikozyanyo, cilengaano cijanika mulugwalo lwa Daniele 8:1-7, icakalembwa kumamanino aa Bulelo bwa Babuloni.

Kubelesya zikozyanyo, businsimi bwakaamba mugutu asijembwe. Sijembwe wakawaala mugutu ansi akumulyataula. Daniele kunyina naakali kuyandika kuyeeyela buya ncocakali kwaamba eeci pe. Mungelo wa Leza wakaamba kuti: “Mugutu ngowakabona uuli ameja obile–nkokuti bami ba-Mediya aba-Persia. Asijembwe uuli aboya ngumwami waba-Helene.” (Daniele 8:20, 21) Makani aakaindi atondezya kuti ba Mediya aba Persia mbebakatobela Babuloni kuba bulelo bwanyika. Kumane, nikwakainda myaka iili 200, ba Mediya aba Persia bakazundwa amwami wa Greece Alexander Mupati. Kuzuzikizyigwa kugambya kuli boobu kutondezya mbobubede businsimi bwamu Bbaibbele, kubikkilizya aziloto zyabusinsimi. Kaambo kamasimpe aaka kalalyaandaanya Bbaibbele kumabbuku aambi woonse, akupa kuti katulisyoma.