1. Ino zintu nzyotucita zyeendelezyegwa anzi?

 KUFWUMBWA naa twakabbapatizyigwa caino-ino naa kaindi, toonse tuyanda kuba abube mbwakkomanina Jehova. Kutegwa tucite oobo, tweelede kweendelezya mbotuyeeya. Nkaambo nzi? Nkaambo kakuti kanji-kanji nzyotucita zyeendelezyegwa aamizeezo yesu. Ikuti lyoonse katuyeeya zintu zibyaabi, nzyotwaamba alimwi akucita zinooli zibyaabi. (Ef. 4:17-19) Kulubazu lumwi, ikuti naa katuyeeya zintu zibotu, nkokuti nzyotunikwaamba akucita zinoomukkomanisya Taateesu wakujulu, Jehova.—Gal. 5:16.

2. Mibuzyo nzi njotutiilange-lange mucibalo eeci?

² Kweelana ambotwakaizya mucibalo cainda, tatukonzyi kucilekela limwi kuyeeya zintu zibyaabi. Pele tulakonzya kusala kuteendelezyegwa akuyeeya kuli boobo. Katunabbapatizyigwa, tweelede kucileka kwaamba alimwi akucita zintu munzila njasulide Jehova. Eeyi nentaamu yakusaanguna alimwi iiyandika kapati njotweeelede kubweza kutegwa tubusamunune buntu bwakaindi. Nokuba boobo, kutegwa tumukkomanisye Jehova cakumaninina, tweelede kutobela mulawo ooyu wakuti: ‘Amulisamike buntu bupya.’ (Kol. 3:10) Mucibalo eeci, tulaingula mibuzyo eeyi yakuti: Ino “buntu bupya” ninzi? Mbuti mbotukonzya kubusama alimwi akuzumanana ambubo?

3. Ino “buntu bupya” ninzi, alimwi ino mbuti muntu mbwakonzya kubusama? (Bagalatiya 5:22, 23)

³ “Buntu bupya” nkuyeeya alimwi akucita zintu munzila iitondezya bube bwa Jehova. Muntu ulalisamika buntu bupya kwiinda mukutondezya mucelo wamuuya wa Leza,  nkokuti kuzumizya muuya uusalala kweendelezya mbwayeeya, mbwalimvwa alimwi ambwacita zintu. (Amubale Bagalatiya 5:22, 23.) Mucikozyanyo, ulamuyanda Jehova alimwi abantu bakwe. (Mt. 22:36-39) Ulazumanana kutondezya lukkomano nociba ciindi nali mumasunko. (Jak. 1:2-4) Ulabamba luumuno. (Mt. 5:9) Ulakkazika moyo alimwi ulaaluzyalo ciindi nayendelezya bantu. (Kol. 3:12, 13) Ulabuyanda bubotu alimwi akubucita. (Lk. 6:35) Ulatondezya muzintu nzyacita kuti ulijisi lusyomo luyumu muli Taateesu wakujulu. (Jak. 2:18) Ulazumanana kubomba moyo ciindi bamwi nobamunyemya alimwi ulalilesya ciindi naasunkwa.—1Kor. 9:25, 27; Tit. 3:2.

4. Nkaambo nzi ncotweelede kutondezya bube boonse ibuli ku Bagalatiya 5:22, 23 alimwi amuzibalo zimbi zyamu Bbaibbele, kutegwa tubusame buntu bupya?

⁴ Kutegwa tubusame buntu bupya, tweelede kuba abube boonse ibwaambidwe ku Bagalatiya 5:22, 23 alimwi amuzibalo zimbi zyamu Bbaibbele. * Bube oobo tabuli mbuli zisani ziindene-indene izikonzya kusamwa muziindi ziindene. Alimwi buya, bube bunji oobu bulajanika amubube bumbi. Mucikozyanyo, ikuti katubayanda ncobeni basimukoboma, tuyoobakkazyikila moyo akubatondezya luzyalo. Kutegwa tutondezye kuti tuli bantu bali kabotu, tweelede kubomba moyo alimwi akulilesya.

5. Ino kuba ‘amizeezo ya Kristo,’ caamba nzi, alimwi nkaambo nzi ncotweelede kumwiiya? (1 Bakorinto 2:16)

⁵ Amubale 1 Bakorinto 2:16. Kutegwa tubusame buntu bupya, tweelede kuba ‘amizeezo ya Kristo.’ Munzila imwi, tweelede kuzyiba mbwayeeya Jesu alimwi akumwiiya. Jesu ulautondezya mucelo wamuuya wa Leza cakulondoka. Mbubwenya mbuli cimbonimboni cili kabotu, ulabutondezya bube bwa Jehova kabotu-kabotu. (Heb. 1:3) Kuti katuyeeya mbuli mbwayeeya Jesu, tunoocita zintu mbuli nguwe alimwi akuzwidilila kutondezya bube bwakwe.—Flp. 2:5.

6. Ntwaambo nzi ntotweelede kuyeeya notusolekesya kusama buntu bupya?

⁶ Sena masimpe cilakonzyeka kutobela cikozyanyo ca Jesu? Tulakonzya kwaamba kuti: ‘Jesu ulilondokede. Tandikonzyi kuba mbuli nguwe.’ Kuti kamulimvwa boobo,  amuyeeye twaambo ootu. Kakusaanguna, mwakalengwa mucinkozya ca Jehova alimwi a Jesu. Aboobo mulakonzya kusoleka kusala kubaiya, mpoonya inga mwazwidilila. (Matl. 1:26) Kabili, muuya uusalala wa Leza ngowiinda kuba anguzu mububumbo. Kwiinda mukugwasyigwa anguwo, tulakonzya kucita zintu nzotutakonzyi kucita munguzu zyesu. Katatu, Jehova talangili kuti tutondezye mucelo wamuuya cakulondoka lino. Alimwi buya, Taateesu siluyando wakabikka myaka iili 1,000 yakuti aabo bayoopona anyika bakalondoke. (Ciy. 20:1-3) Calino, Jehova uyanda buyo kuti katusolekesya kusyoma nguwe kutegwa atugwasye.

7. Ino ncinzi ntotutiilange-lange lino?

⁷ Muunzila nzi zigaminide motukonzya kumwiiya Jesu? Tulalanga-langa zibeela zyone zyamucelo wamuuya wa Leza. Mucibeela cimwi acimwi, tulabona mbotukonzya kumwiiya Jesu kweelana ambwaakabutondezya bube oobo. Kuyungizya waawo, tulalanga-langa mibuzyo iikonzya kutugwasya kubona mpotweendela mukusama buntu bupya.

8. Mbuti Jesu mbwaakatondezya luyando?

⁸ Akaambo kakuti Jesu ulamuyanda kapati Jehova, wakalyaaba kulinguwe alimwi akaambo kandiswe. (Joh. 14:31; 15:13) Jesu wakalutondezya luyando lupati ndwaajisi kubantu kweelana ambwaakali kupona aano anyika. Buzuba abuzuba wakali kutondezya kuti ulabayanda bantu alimwi akubeetelela, noliba leelyo naakali kukazyigwa. Nzila iiyandika kapati mwaakatondezya luyando ndwaakajisi kubantu nkwiinda mukubayiisya kujatikizya Bwami bwa Leza. (Lk. 4:43, 44) Alimwi Jesu wakalutondezya luyando lwakwe lwakulyaaba ndwajisi kuli Leza akubantu kwiinda mukulisungula kupenzyegwa alimwi akufwa lufwu lucisa mumaanza abasizibi. Aboobo wakajalula nzila kulindiswe toonse yakuba abulangizi bwabuumi butamani.

9. Mbuti mbotukonzya kumwiiya Jesu kwiinda mukutondezya luyando?

⁹ Twakalyaaba kuli Jehova akubbapatizyigwa akaambo kakuti tulamuyanda Taateesu wakujulu. Aboobo mbubonya mbuli Jesu, tweelede kutondezya luyando ndotujisi kuli Jehova kweelana ambotubeendelezya bantu. Mwaapostolo Johane wakalemba kuti: “Ooyo uutayandi munyina ngwabwene, takonzyi pe kuyanda Leza ngwatanabona.” (1Joh. 4:20) Tulakonzya kulibuzya kuti: ‘Sena ndilabayanda kapati bantu? Sena ndilabeetelela nokuba kuti bandeendelezya munzila iitali kabotu? Sena luyando lundipa kubelesya ciindi cangu alimwi alubono kubagwasya kwiiya kujatikizya Jehova? Sena ndililibambilide kucita boobo nokuba kuti bunji bwabantu tabalumbi kukusolekesya nkondicita naa balandikazya? Sena ndilakonzya kujana nzila kutegwa kandibelesya ciindi cinji mumulimo wakugwasya bantu kuba basikwiiya?’—Ef. 5:15, 16.

10. Mbuti Jesu mbwaakali siluumuno?

¹⁰ Jesu wakali siluumuno. Ciindi bantu nobatakamweendelezya kabotu, kunyina naakapilusya cibi kucibi. Alimwi tanaakagolela waawo pe. Pele wakali kubweza ntaamu yakubamba luumuno alimwi akukulwaizya bamwi kumana mazwanga. Mucikozyanyo, wakabayiisya kuti bakeelede kubamba luumuno abamwi ikuti kabayanda kuti Jehova abutambule bukombi bwabo. (Mt. 5:9, 23, 24) Kuyungizya waawo ciindi aciindi wakali kubagwasya baapostolo kumana mazwanga kujatikizya iwakali mupati akati kabo.—Lk. 9:46-48; 22:24-27.

11. Mbuti mbotukonzya kuba basiluumuno?

¹¹ Kutegwa tube basiluumuno, tatweelede  kugolela buyo akutaleta mazwanga. Tweelede kusolekesya kubamba luumuno abamwi alimwi akubakulwaizya bakwesu abacizyi kumana mazwanga. (Flp. 4:2, 3; Jak. 3:17, 18) Aboobo tulakonzya kulibuzya kuti: ‘Ncinzi ncondilibambilide kucita kutegwa ndibambe luumuno abamwi? Ciindi mukwesu naa mucizyi naandinyemya, sena ndilamubikkilila? Sena ndilindila kuti umwi abweze ntaamu kubamba luumuno, naa ndilabweza ntaamu kucita boobo nokuba kuti muntu ooyo ngowakatalita mazwanga? Ikuti kaceelela, sena ndilabakulwaizya aabo bajisi kaambo kuluumwi amweenzinyina kubamba luumuno?’

12. Mbuti Jesu mbwaakatondezya luzyalo?

¹² Jesu wakali siluzyalo. (Mt. 11:28-30) Wakatondezya luzyalo kwiinda mukuba mutete moyo alimwi akunyoneka, nomuba mubukkale bukatazya. Mucikozyanyo, ciindi mukaintu muna Fonike naakamulomba kuti amuponye mwanaakwe, kumatalikilo kunyina naakacita ncaakalomba, pele naakatondezya lusyomo luyumu, caluzyalo Jesu wakamuponya mwanaakwe. (Mt. 15:22-28) Nokuba kuti Jesu wakali siluzyalo, kunyina naakali kuwayawaya kupa lulayo, ciindi nolwakali kuyandika. Zimwi ziindi wakali kutondezya luzyalo kwiinda mukubapa lulayo aabo mbaakali kuyanda. Mucikozyanyo, ciindi Petro naakasola kumutyompya Jesu kucita kuyanda kwa Jehova, Jesu wakamukalalila Petro kumbele lyabasikwiiya bambi. (Mk. 8:32, 33) Wakacita oobo ikutali akaambo kakuyanda kumupa kuusa Petro, pele kutegwa amuyiisye walo alimwi abasikwiiya bamwi kutalicenjezya. Cakutadooneka, Petro wakausa, pele wakagwasyigwa alulayo oolo.

13. Mbuti mbotukonzya kutondezya luzyalo lwini-lwini?

¹³ Kutegwa mutondezye kuti mulaaluzyalo lwini-lwini kuli baabo mbomuyanda, zimwi ziindi inga mwayandika kubapa lulayo cakutainda mumbali. Nomucita boobo, amwiiye Jesu kwiinda mukubapa lulayo luyeeme anjiisyo zizwa mu Jwi lya Leza. Amube amoyo mutete. Amubone kuti balayanda kucita ciluzi alimwi akusyoma kuti aabo ibamuyanda Jehova andinywe bayoolutobela lulayo ndomubapa munzila yaluzyalo. Amulibuzye kuti: ‘Sena ndilijisi busicamba bwakumupa lulayo muntu ngondiyanda ciindi naacita cintu cilubide? Ikuti kwayandika kupa lulayo, sena ndilacita oobo caluzyalo? Ino ndijisi makanze nzi nondipa lulayo? Sena ndimupa lulayo muntu ooyo akaambo kakuti ndilinyemede naa akaambo kakuti ndiyanda kumugwasya?’

14. Mbuti Jesu mbwatondezya bubotu?

¹⁴ Jesu tazyi buyo cibotu, pesi alimwi ulacicita. Jesu ulabayanda Bausyi, aboobo lyoonse ucita ciluzi kajisi makanze mabotu. Muntu uuli kabotu ulajana nzila zyakugwasya bamwi akubacitila zintu zili kabotu. Tacizulide kuzyiba buyo cintu ciluzi; pele tweelede kucicita katujisi makanze mabotu. Umwi inga wabuzya kuti, ‘Sena cilakonzyeka kucita cintu ciluzi katujisi makanze mabyaabi?’ Inzya. Mucikozyanyo, Jesu wakaamba kujatikizya baabo ibakali kupa zipego zyaluse kubacete pele ibakali kuyanda kuti bamwi bazyibe akubalumbaizya. Nokuba kuti milimo eeyi yakali mibotu, Jehova tanaakabakkomanina.—Mt. 6:1-4.

15. Mbuti mbotukonzya kuba bantu bali kabotu ncobeni?

¹⁵ Tulakonzya kuba bantu bali kabotu ncobeni lilikke buyo kuti katucita cintu ciluzi amakanze mabotu. Aboobo mulakonzya kulibuzya kuti: ‘Kunze buyo lyakuzyiba cintu ciluzi sena ndilacicita? Makanze nzi ngondijisi nondicita zintu zibotu?’

16. Ncinzi ncotweelede kucita abuzuba, alimwi nkaambo nzi?

¹⁶ Tatweelede kuyeeya kuti twamana kubbapatizyigwa, nkokuti twamanizya kubusama buntu bwesu bupya alimwi tatuciyandiki kubukwabilila. Buntu bwesu bupya buli mbuli cisani cipya ncotweelede kuzumanana kubamba kabotu. Nzila iimwi mbotukonzya kucita boobo, nkwiinda mukujana nzila zyakutondezya mucelo wamuuya wa Leza. Nkaambo nzi? Nkaambo kakuti Jehova ngusimilimo, alimwi muuya wakwe ninguzu zibeleka. (Matl. 1:2) Aboobo cibeela cimwi acimwi camucelo wamuuya cilakonzya kutukulwaizya kubweza ntaamu. Mucikozyanyo, sikwiiya Jakobo wakalemba kuti: “Lusyomo lunyina milimo lulifwide.” (Jak. 2:26) Oobo mbocibede akuzibeela zimbi zyamucelo wamuuya wa Leza. Aboobo lyoonse notuzitondezya zibeela eezyi, tupa bumboni bwakuti muuya wa Leza ulabeleka mulindiswe.

17. Ino tweelede kucita buti ikuti twaalilwa kutondezya mucelo wamuuya?

¹⁷ Nobaba Banakristo ibakabbapatizyigwa myaka minji yainda zimwi ziindi balaalilwa kutondezya mucelo wamuuya. Pele ciyandika kapati, nkutatyompwa. Amubone cikozyanyo eeci. Ikuti cisani ncomuyandisya kapati cazapuka, sena inga mwacisowa mpoonya mpoonya? Peepe. Kweelede kuti inga mwacisuma ikuti kacikonzyeka. Alimwi muyoocibikkila maano cisani eeco. Mbubonya buyo, zimwi ziindi mulakonzya kwaalilwa kutondezya luzyalo, kukkazika moyo naa luyando kumuntu umwi, mutatyompwi. Ikuti mwalilekelela kuzwa ansi aamoyo kumuntu ooyo, muyoozumanana kuba acilongwe cibotu anguwe. Mpoonya amube amakanze aakucita kabotu kumbele.

18. Ino ncinzi ncotukonzya kuba masimpe?

¹⁸ Eelo kaka tulalumba kapati akaambo kakuti tulijisi cikozyanyo ca Jesu! Ikuti kutuyeeya mbwayeeya, cilakonzya kutuubila kucita zintu mbulinguwe. Ikuti katucita zintu mbuli Jesu, ciyootuubila kubusama buntu bupya. Mucibalo eeci, twalanga-langa buyo zibeela zyone zyamucelo wamuuya wa Leza. Amujane ciindi cakulanga-langa zibeela zimbi zyamucelo wamuuya alimwi akubona naa mulazitondezya. Mulakonzya kuujana mulongo wazibalo kujatikizya makani aaya mu Bbuku Ligwasya Kuvwuntauzya lya Bakamboni ba Jehova, ansi aamutwe wamakani wakuti “Buumi bwa Bunakristo” mpoonya akatwe kakuti “Mucelo Wamuuya.” Amube masimpe kuti ikuti mwacita lubazu lwanu, Jehova uyoomugwasya kubusama buntu bupya akuzumanana ambubo.