Nobakali mulweendo lwakabambwa acikolo, bakubusi bamwi basankwa bakatamikizyigwa kutundulula sicikolonyina musankwa mumakani aakoonana. Boonse bakali kwiiya kucikolo cimwi cilaampuwo kapati ku Canada. Nozyakainda zintu eezyi, simubweza twaambo umwi uutegwa Leonard Stern wakalemba boobu mumuteende wiitwa kuti Ottawa Citizen: “Kuba musongo, kuba alwiiyo lubotu alimwi akuvwuba tacikonzyi kulesya bakubusi kucita zintu zibyaabi.”

Ba Stern bakayungizya kuti: “Kanji-kanji, cintu ncobeelede kubikkila kapati maano bazyali, nkuyiisya bana babo bukkale buluzi abutaluzi. Pele kulibonya kuti bazyali banji babikkila kapati maano kuyiisya bana babo lwiiyo lwakumubili naa kuba azintu zinji zyakumubili.”

Masimpe ngakuti, cikolo cilayandika kapati. Pele noluba lwiiyo lwakumubili lusumpukide kapati talukonzyi kugwasya muntu kulwana kulombozya kubyaabi. Aboobo ino nkookuli nkotukonzya kujana lwiiyo ilukonzya kugwasya bantu kuba abukkale buli kabotu?

Bbaibbele lili mbuli cimbonimboni. Ciindi notulanga mucimbonimboni, tulabona caantangalala mpotweelede kubambulula. (Jakobo 1:23-25) Pele Bbaibbele lyalo lilainda aawo. Lilatugwasya kucinca oomo muyandika, kuba abube ibukulwaizya luumuno lwini-lwini alimwi alukamantano. Bube oobu bubikkilizya bubotu, luzyalo, kukkazika moyo, kulilesya alimwi aluyando. Mane buya luyando lwaambwa kuti “ncecaanzyo calukamantano cilondokede.” (Bakolose 3:14) Nkaambo nzi luyando ncobuli bube buyandika kapati? Amubone Bbaibbele ncolyaamba kujatikizya bube oobu.

• “Luyando lulakkazika moyo alimwi lulaaluzyalo. Luyando talukwe munyono, talulidundi, talulisumpuli, talukwe cisapi, talubikkili buyo maano kuzintu nzyoluyanda, talunyemi-nyemi, talubikkilili. Talukkomanini kutalulama [bubi], pele lukkomanina kasimpe. Lulajatila zintu zyoonse, . . . lulaliyumya muzintu zyoonse. Luyando talumani.”—1 Bakorinto 13:4-8.

• “Uuyanda simukobonyina takonzyi kumubisizya.”—Baroma 13:10.

• “Ikwaambisya, amuyandane kapati, nkaambo luyando lulavwumba zibi zinji kapati.” —1 Petro 4:8.

Ciindi nomuli akati kabantu ibamuyanda, ino mulimvwa buti? Sena mulimvwa kukwabililwa, kuliiba naa kulikwaya? Inzya, nkaambo mulizyi kuti bayanda kuti zintu kazimweendela kabotu, alimwi inga tiibayanda kumucitila cintu cibyaabi acaali icikonzya kumucisa.

Luyando lulakonzya kupa kuti bantu baliimye zintu zimwi, mane buya akucinca mubuumi kutegwa bamwi bagwasyigwe. Mucikozyanyo, ba George a  nobakaba amuzyukulu, bakaliyandide kapati kuba aciindi cakuba antoomwe anguwe. Pele kwakali penzi. Ba George bakali kufweba citaambiki, pele mukwe wabo taanakali kuyanda kuti kabafweba munsi-munsi amwana. Ino ncinzi ncobakacita ba George? Nokuba kuti bakali kufweba kwamyaka iili 50, bakacileka kufweba akaambo kamuzyukulu wabo. Eelo kaka luyando lulaanguzu!

Luyando mbube mbotukonzya kwiiya. Bazyali bajisi mukuli mupati wakuyiisya bana babo mbobakonzya kuba aluyando. Bazyali balabasanina akubakwabilila bana babo alimwi akubagwasya ciindi nobajisi penzi naa ciindi nobacisidwe. Bazyali bali kabotu beelede kujana ciindi cakubandika abana babo alimwi akubayiisya. Alimwi beelede kubalaya, calo cibikkilizya akubayiisya njiisyo zili kabotu. Kuyungizya waawo, bazyali bali kabotu beelede kuba cikozyanyo cibotu, calo ncobeelede kutobela bana babo.

Cuusisya ncakuti, bazyali bamwi balaalilwa kuzuzikizya mikuli yabo. Sena eeci caamba kuti bana babo kunyina nobakonzya kuba bantu bali kabotu? Peepe! Nobaba bantu bapati, kubikkilizya abamwi ibakakomenena mumikwasyi yakajisi bukkale bubyaabi, bakacinca kapati mubuumi bwabo, bakaba bantu babikkila maano alimwi ibasyomeka. Kweelana ambotutiibone mucibalo citobela, eeci cilabikkilizya abantu bamwi balo ibakali kuyeeyelwa kuti inga tiibacinca.