Mbaakani tacili ciloto buyo, calo ncomukonzya kulombozya kuti kubota cacitika. Mbaakani zini-zini ziyanda kulibambila, kunyoneka alimwi akubeleka canguzu.

Mbaakani zimwi zilakonzya kutola buyo mazuba naa nsondo zili mbozibede, myezi alimwi buya amwaka naa myaka minji kutegwa tuzizuzikizye. Mbaakani zitola myaka minji zilakonzya kuzuzikizyigwa kwiinda mukusaanguna kuzuzikizya mbaakani zitola buyo ciindi cisyoonto.

Kuzuzikizya mbaakani zyanu kulakonzya kumugwasya kuba basungu, kuyumya zilongwe nzyomujisi alimwi akuyungizya lukkomano lwanu.

Kuba alusyomo lwakuti inga mwacikonzya: Ciindi nomulibikkila mbaakani zisyoonto alimwi akuzizuzikizya, mulakonzya kuba alusyomo lwakuti inga mwazizuzikizya noziba mbaakani zikatazya. Alimwi mulakonzya kuba alusyomo lwakuti mulakonzya kuzunda ciindi nomusikilwa buyumuyumu bwabuzuba abuzuba, mbuli kuyungwa abakubusinyoko.

Zilongwe: Bantu balakkomana kuba abantu ibajisi mbaakani mubuumi, nkokuti aabo ibazyi zintu nzyobayanda alimwi ibalibambilide kuzibelekela. Kuyungizya waawo, nzila imwi iiyandika kapati yakuyumya cilongwe, nkubelekela antoomwe amuntu kutegwa muzuzikizye mbaakani iikonzyenye.

Lukkomano: Ciindi nomulibikkila mbaakani alimwi akuzizuzikizya, cilakonzya kumupa kukkomana kapati.

“Ndilakukkomanina kapati kuba ambaakani. Zilandigwasya kapati kuba azinji zyakucita alimwi akundipa kuzumanana kubeleka kutegwa ndizizuzikizye. Alimwi ciindi nomwaizuzikizya mbaakani yanu, cilakkomanisya kulanga musyule akwaamba kuti ‘Eelo kaka ndawoonda! Ndacizuzikizya ncondakali kuyanda kucita.’”—Christopher.

NJIISYO YAMU BBAIBBELE: “Ooyo uulanga muwo takasyangi mbuto pe, alimwi ooyo uulanga makumbi takatebuli pe.”—Mukambausi 11:4.

Amubelesye ntaamu izili ansi aawa ikulibikkila mbaakani alimwi akuzizuzikizya.

Amuzizyibe. Amulembe mulongo wambaakani nzyomukonzya kucita alimwi amulembe izyeelede kusaanguna kuzuzikizyigwa, kutalikila ali yakusaanguna, yabili, yatatu akuzumanana mbweena oobo.

Amulibambile. Kujatikizya mbaakani imwi aimwi, amucite zitobela:

• Amulibikkile ciindi nomuyakwiizuzikizya.

• Amuzizyibe izijatikizidwe kutegwa mwiizuzikizye.

• Amubuyeeyele buyumuyumu mbomukonzya kujana alimwi ambomukonzya kubuzunda.

Amubweze ntaamu. Tamweelede kulindila kuti mane zyoonse nzyomuyanda zikacitike nkokuya mukatalike kubelekela ambaakani yanu. Amulibuzye kuti, ‘Ino ncinzi ncondeelede kusaanguna kucita kutegwa ndizuzikizye mbaakani yangu?’ Mpoonya amucicite. Amukutobelezye kuyaambele kwanu mbomuyaabuzuzikizya ntaamu imwi aimwi.

NJIISYO YAMU BBAIBBELE: “Makanze aabankutwe masimpe apa kuzwidilila.”—Tusimpi 21:5.