Kamutambula Cakulumba Akupa Amoyo Woonse

JEHOVA siluyando, Taateesu wakujulu, ulatubikkila maano. Ijwi lya Leza litwaambila kuti ulababikkila kapati maano babelesi bakwe boonse. (1 Pet. 5:7) Inzila yomwe Jehova njatubikkila maano nkwiinda mukutugwasya muzyintu ziindene-indene kutegwa tuzumanane kusyomeka. (Is. 48:17) Ikapati notusikilwa mapenzi, Jehova uyanda kuti katuzibelesya nzyatupa. Kaambo aaka kalaambwa mu Mulawo wa Musa.

Kwiinda mu Mulawo ooyu, Jehova wakabagwasya “bacete,” mbuli bamucaala, bamukabafwu alimwi abeenzu. (Lev. 19:9, 10; Dt. 14:29) Jehova ulizyi kuti babelesi bakwe bamwi inga bayandika kugwasyigwa abakombinyina. (Jak. 1:27) Aboobo, kunyina mubelesi wa Leza weelede kuwaya-waya kugwasyigwa abaabo Jehova mbaasungula kuti bagwasye. Alimwi notugwasyigwa, tuyandika kulumba.

Kulubazu lumwi, Ijwi lya Leza alimwi litondezya kuti bantu ba Leza bayandika kugwasya bamwi. Amuyeeye “mukamufu mucete,” Jesu ngwaakabona kutempele mu Jerusalemu. (Lk. 21:1-4) Kweelede kuti awalo wakali akati kabaabo bamukabafwu ibakali kugwasyigwa kweelana a Mulawo wakabikkidwe. Nokuba boobo, makani aayeeyegwa kujatikizya mukamufwu ooyu iwakali mucete ngakuti wakapa kutali kupegwa. Weelede kuti wakakkomana naakapa nkaambo, kweelana ambwaakaamba Jesu, “kuli lukkomano lunji mukupa ikwiinda luli mukutambula.” (Inc. 20:35, NW.) Kamucikayeeya kaambo aaka, ino mbuti mbomukonzya “kupa” kutegwa mukkomane?—Lk. 6:38.

“Mpilusyenzi Kuli Jehova?”

Sintembauzyo wakalibuzya kuti: “Mpilusyenzi kuli Jehova nkaambo kazyoolwe zyoonse nzyandipa?” (Int. 116:12) Ino wakapegwa nzi? Jehova wakamukwabilila naakali “[mu]mapenzi abuusu.” Alimwi Jehova “wakavuna buumi bwa[sintembauzyo] kulufu.” Lino wakali kuyanda kuti munzila imwi ‘amupilusyizye’ Jehova. Ino ncinzi ncaakeelede kucita sintembauzyo? Wakaamba kuti: “Njoozuzikizya ncindakakonkezya Jehova.” (Int. 116:3, 4, 8, 10-14) Wakayeeya kuti azizuzikizye zyoonse nzyaakasyomezya kuli Jehova akuzicita.

Mulakonzya kucita oobo andinywe. Munzila nzi? Kwiinda mukutobela milawo ya Leza anjiisyo zyakwe mubuumi bwanu boonse. Aboobo, ikukomba Jehova amukubone kuba cintu ciyandika kapati mubuumi bwanu alimwi muuya wa Leza weelede kumusololela muzyintu zyoonse nzyomucita. (Muk. 12:13; Gal. 5:16-18) Mubwini, tamukonzyi kumubbadela Jehova akaambo kazyintu zyoonse nzyaakamucitila. Nokuba boobo, ‘Jehova ulakondwa’ akaambo kakulyaaba kwanu kuti mumubelekele camoyo woonse. (Tus. 27:11) Elo kaka cilakkomanisya, ikukkomanisya Jehova munzila eeyi!

 Ncomukonzya Kucita Kuti Kube Lukamantano Mumbungano

Cakutadooneka, mulazumina kuti imbungano ya Banakristo yamugwasya munzila zinji. Kwiinda mumbungano, Jehova ulapa cakulya cakumuuya ceelede. Mwakaiya kasimpe ikakamupa kuti muzwe mumudima wakumuuya. (Joh. 8:32) Kumiswaangano yambungano, yaalubazu, yabbazu alimwi ayacooko iibambwa “[a]muzike musyomesi uucenjede,” mwakajana luzyibo luyakumusololela kubuumi butamani muparadaiso anyika, imutakabi mapenzi. (Mt. 24:45-47) Tamukonzyi kuzyaamba zilongezyo zyoonse nzyomwajana—anzyomuyoojana kumbele—kwiinda mumbungano ya Leza. Ino ncinzi ncomukonzya kupa kumbungano akaambo kazyilongezyo eezyi?

Imwaapostolo Paulo wakalemba kuti: “Mubili woonse mbuulungene akujatana mungo zyoonse nzyuubambilidwe, kubeleka kweelede kwacizo cimwi acimwi kulagwasya mubili kuti ukule akuliyaka muluyando.” (Ef. 4:15, 16) Nokuba kuti lugwalo oolu lubelesyegwa kapati kwaamba kabunga ka Banakristo bananike, injiisyo eeyi ilakonzya kubeleka aku Banakristo boonse mazuba aano. Inzya, umwi aumwi mumbungano ulakonzya kutola lubazu mukukamantanya mbungano akupa kuti ikomene. Munzila nzi?

Tulakonzya kucita oobo lyoonse kwiinda mukukulwaizya akuyumya-yumya bamwi mumbungano. (Rom. 14:19) Alimwi tulakonzya kupa kuti ‘mubili ukule’ kwiinda mukuba amicelo yamuuya notucita zyintu zyoonse abasyomima. (Gal. 5:22, 23) Kuyungizya waawo, tulakonzya kubikkila maano kutegwa tujane nzila yakuti “tucitile bantu boonse milimo mibotu, pele kwaambisya kulibaabo baciinga calusyomo.” (Gal. 6:10; Heb. 13:16) Toonse mumbungano—Bakwesu abacizi, bapati abana—tulakonzya kutola lubazu ‘mukuyaka mubili muluyando.’

Alimwi tulakonzya kubelesya luzyibo, nguzu zyesu alimwi azyintu nzyotujisi ikutegwa tutole lubazu mumulimo wakukambauka. Jesu Kristo wakati: “Mwakapegwa buyo.” Ino eeci ceelede kutupa kucita nzi? Wakati: “Anywe amupe buyo.” (Mt. 10:8) Aboobo, amubeleke canguzu mumulimo ooyu uuyandika kapati, iwakwaambilizya Bwami akugwasya bantu kuba basikwiiya. (Mt. 24:14; 28:19, 20) Sena kuli zyintu zimulesya kucita boobo? Amuyeeye mukamufwu mucete ngwaakaamba Jesu. Ncaakapa cakali cisyoonto. Nokuba boobo Jesu wakaamba kuti wakapa kwiinda boonse. Wakapa mbwaakali kukonzya kweelana abukkale bakwe.—2 Kor. 8:1-5, 12.

Amulutambule Lugwasyo Amoyo Woonse

Kulakonzya kuba ziindi nomukonzya kuyanda kuti mbungano imugwasye. Nomuli mumapenzi aali woonse aabweende bwazyintu oobu, mutawayiwayi pe kutambula lugwasyo luliloonse imbungano ndoikonzya kupa. Jehova wapa baalumi basimide kumuuya alimwi ibabikkila maano kuti “[b]eembele mbungano ya Leza’’—kuti bamugwasye nomuli mumasunko amumapenzi. (Inc. 20:28, NW.) Ibaalu abamwi mumbungano balayanda kumuumbulizya, kumuyumya-yumya alimwi akumukwabilila nomuli muziindi zikatazya.—Gal. 6:2; 1 Tes. 5:14.

Nokuba boobo, naa twapegwa lugwasyo atulutambule amoyo woonse. Lyoonse notwagwasyigwa tweelede kulumba. Ikuti naa basyomima batugwasya, atuzyibe kuti lugwasyo oolu nduzyalo lwa Leza. (1 Pet. 4:10) Ino nkaambo nzi eeci ncociyandika? Nkaambo tatuyandi kuba mbuli bantu banji munyika—ibatalumbi.

Amuzilange Munzila Yeelede Zyintu

Mulugwalo ndwaakalembela mbungano yaku Filipi, Paulo naakali kwaamba Timoteo  wakati: “Taakwe umbi uuli amoyo mbuli nguwe uukonzya kumususunkana alususunkano lwinilwini.” Alimwi Paulo wakati: “Boonse buyo balayeeya kuligwasya beni luzutu, tabayeeyi makani aa-Kristo Jesu pe.” (Flp. 2:20, 21) Kweelana amajwi aaya ngaakaamba Paulo, ino aano mazuba mbuti mbotukonzya kuleka kubikkila buyo maano kukuyanda ‘kuligwasya tobeni luzutu’?

Notulomba bamwi mumbungano kuti batugwasye mumapenzi ngotujisi, tatweelede kubasungilizya buya. Nkaambo nzi? Amuciyeeyele eeci: Cakutadooneka, inga twalumba kapati ikuti mukwesu watupa zyintu nzyotuyandika ciindi notuli mumapenzi. Sena kuli notunga twamusungilizya buya kuti atugwasye? Peepe. Mbubwenya buyo, nokuba kuti bakwesu balayanda lyoonse kutugwasya, tweelede kuzilanga munzila yeelede zyintu caboola kulugwasyo ndobakonzya kutupa. Mubwini, tuyanda kuti bakwesu nobatugwasya mumapenzi eesu, kabacita oobo amoyo woonse.

Cakutadooneka, Ibanakristonyoko balilibambilide alimwi balayanda kumugwasya lyoonse. Nokuba boobo, zimwi ziindi inga kabatakonzyi kumupa zyoonse nzyomuyandika. Ikuti caba boobo, amuzyibe kuti Jehova ulamugwasya mumapenzi oonse aakonzya kumusikila, mbubwenya mbwaakagwasya sintembauzyo.—Int. 116:1, 2; Flp. 4:10-13.

Aboobo, mutawayiwayi kulutambula lugwasyo luli loonse Jehova ndwamupa, ikapati ciindi nomuli amapenzi. (Int. 55:22) Uyanda kuti mucite oobo. Nokuba boobo, Jehova alimwi uyanda kuti ‘kamupa calumwemwe.’ Aboobo, kweelana ancimwasala mumoyo, mulakonzya kupa kutegwa mugwasye mubukombi bwakasimpe. (2 Kor. 9:6, 7) Munzila eeyi, muyakucita zyoonse zyobilo—kupa amoyo woonse akutambula cakulumba.

Kabbokesi/[Zifwanikiso izili apeeji 31]

“Mpilusyenzi kuli Jehova nkaambo kazyoolwe zyoonse nzyandipa?”—Int. 116:12

▪ Amujane ciindi cakuti “[m]ucitile bantu boonse milimo mibotu”

▪ Kamubayumya-yumya bamwi mumbungano

▪ Amutole lubazu mumulimo wakugwasya bantu kuba basikwiiya, kweelana ambomukonzya