Kamulekelelana Camoyo Woonse
Kamulekelelana Camoyo Woonse
“Amuzumanane kweengelelana akulekelelana camoyo woonse.”—KOL. 3:13.
INO INGA MWAINGULA BUTI?
Nkaambo nzi ncotweelede kulibambila kulekelela?
Ino Jesu wakatondezya buti mbokuyandika kulekelela?
Nzilongezyo nzi nzyotujana akaambo kakulekelelana camoyo woonse?
1, 2. Nkaambo nzi ncociyandika kubona naa tulilibambilide kulekelela?
IJWI lya Jehova lilembedwe lilatugwasya kuzyiba mbwacibona cibi alimwi ancakonzya kucita ciindi nitwabisya. Alimwi Ijwi lyakwe lilayubununa zinji kujatikizya kulekelela. Mucibalo cainda, twakalanga-langa ncobakacita ba Davida a Manase calo cakapa kuti bayandike kulekelelwa a Jehova. Akaambo kakuusa kuzibi nzyobakacita, bakalyaambilila milandu yabo, bakaileka micito yabo mibyaabi akweempwa ncobeni. Kumane, Jehova wakatalika kubayanda alimwi.
2 Lino atulange-lange kulekelela munzila iindene. Ino muyeeya kuti nimwakalimvwa buti ikuti akati kabantu ibatajisi mulandu mbaakajaya Manase akali basazinyoko? Sena nimwakamulekelela Manase? Ooyo mubuzyo ulayandika mazuba aano nkaambo tupona munyika muvwulide zibi, nkondo alimwi akuliyanda. Aboobo, nkaambo nzi Munakristo ncayelede kuyanda kuba amuuya wakulekelela? Alimwi kuti nywebo mwacitilwa zyintu cakutalulama, ncinzi cikonzya kumugwasya kulijata, kucita kweelana ambwayanda Jehova alimwi akulibambila kulekelela?
KAAMBO NCOTWEELEDE KULEKELELA
3-5. (a) Ino ncikozyanyo nzi Jesu ncaakabelesya kugwasya baswiilizi bakwe kuyeeya mbociyandika kulekelela? (b) Ino nkaambo nzi kapati kali mucikozyanyo ca Jesu kalembedwe mulugwalo lwa Matayo 18:21-35?
3 Kulekelela baabo batubisizya—kufwumbwa naa bali mumbungano ya Bunakristo naa pe—kulayandika kutegwa tuzumanane kuba acilongwe caluumuno abanamukwasyi, balongwe, bantu bambi buyo alimwi a Jehova. Magwalo atondezya kuti kuyandisisya kulekelela bamwi nokuba kuti batubisizya ziindi zinji buti nceelelo ca Bunakristo. Kutegwa atondezye mbocili camaano ceelelo eeci, Jesu wakabelesya cikozyanyo cijatikizya muzike wakajisi cikwelete.
4 Muzike wakalijisi cikwelete kuli simalelaakwe camali aakonzya kuvwolwa amubelesi kwiinda mukubeleka mazuba aali 60,000,000; pele simalelaakwe wakacimwaya cikwelete eeco. Kuzwa waawo, muzike wakaunka mpoonya wakajana muzikenyina iwakakweletede kulinguwe mweelwe wamali uukonzya kubelekelwa mazuba aali buyo 100. Sikukweleta wakakombelezya kuti apegwe ciindi, pele muzike iwakalekelelwa cikwelete cipati wakabikka muzikenyina muntolongo. Muuya uuli boobo wakapa kuti simalelaabo anyeme. Wakabuzya kuti: “Sena . . . tonooyelede kumufwida luse muzikenyoko mbubonya mbundakakufwida luse? Aboobo simalelo wakwe, kakalede, wakamutola [muzike uutalekeleli] kuli basintolongo kusikila akajole cikwelete coonse.”—Mt. 18:21-34.
5 Nkaambo kali buti Jesu nkaakasalazya mucikozyanyo cakwe? Majwi aakwe aakumamanino akali aakuti: “Mbubonya buyo Taata uuli kujulu awalo mbwayoomucitila kuti umwi aumwi wanu katalekeleli munyina camoyo woonse.” (Mt. 18:35) Kaambo ka Jesu kalasalala. Zibi nzyotwakacita mubuumi boonse bwakutalondoka zilapa bumboni bwakuti tatukonzyi kuzuzikizya zyeelelo zya Jehova. Pele, ulilibambilide kutulekelela alimwi akuziluba zibi zyoonse nzyotwakacita. Aboobo, kufwumbwa uulombozya kuba mulongwe wa Leza weelede kulekelela kulezya kwabantunyina. Weelede kucita kweelana a Mulumbe ngwaakaamba Jesu a Cilundu wakuti: “Nkaambo kuti kamulekelela bantu milandu yabo, awalo Uso uuli kujulu uyoomulekelela; pele kuti kamutalekeleli bantu milandu yabo, awalo Uso takamulekeleli milandu yanu.”—Mt. 6:14, 15.
6. Nkaambo nzi ncocitali cuubauba kulekelela lyoonse?
6 Mulakonzya kwaamba kuti ‘eeco ncuubauba kucaamba pele nciyumu kucicita.’ Cili boobo nkaambo tulakonzya kubijilwa kapati ciindi bamwi nibatulubizyila. Muntu ulakonzya kunyema, kulimvwa kuti waabwa, kulombozya bululami naa kujolela cibi. Mubwini, bamwi balimvwa kuti kunyina nibayakumulekelela sikulubizya. Kuti naa mbomulimvwa oobo, mbuti mbomukonzya kuba amuuya wakulekelela Jehova ngwayanda?
AMUYEEYE MBOMULIMVWA
7, 8. Ncinzi cikonzya kumugwasya kulekelela kuti naa bamwi bamunyemya kwiinda mukucita cintu citali kabotu?
7 Mbomulimvwa kukulubizya ikwacitika ncobeni naa ikwakuyeeyela buya kulakonzya kukomena kapati. Amulange-lange mbwaakalimvwa mwaalumi mwana-mwana, kweelana abupanduluzi bumwi mulwiiyo lujatikizya kunyema: ‘Ciindi cimwi nindakanyema, ndakazwa muŋanda akukonka kuti kunyina nendiyakupiluka. Oobu bwakali buzuba bubotu ciindi cacilimo, alimwi ndakeenda mukanzila kabotu kasyoonto kusikila limwi kagola. Kandili mubusena oobu bubotu butakwe coongo, ndakaumbulizyigwa, mpoonya nikwakainda mawoola aali mbwaabede ndakapiluka kuŋanda kanduuside akaambo kakuti ndakanyema kapati.’ Kweelana acakuluula eeci, kulipa ciindi cakuti moyo ukkalikane alimwi akulanga-langa bukkale cakukkazyika moyo kulakonzya kumugwasya kutantamuka kucita zyintu munzila iitondezya kutalekelela calo cikonzya kuleta mapenzi.—Int. 4:4; Tus. 14:29; Jak. 1:19, 20.
8 Aboobo, ino mbuti kuti mizeezo iitali kabotu yazumanana? Amusole kujana icamupa kunyema. Sena nkaambo kakuti tiibamweendelezya kabotu, ambweni tiibamulemeka? Sena mulimvwa kuti muntu uumbi wacita caali kutegwa nywebo cimucise? Sena eeco ncaacita mubwini ncibi kapati? Kulanga-langa twaambo alimwi akumvwisya ncomwalimvwa boobo ciyoomugwasya kubona ncomweelede kucita icikonzya kugwasya kapati kweendelana a Magwalo. (Amubale Tusimpi 15:28; 17:27.) Kuyeeya kuli boobo kulakonzya kumugwasya kuzyiba masimpe alimwi akulibambila kulekelela. Kwiinda mukutobela nzila eeyo, nokuba kuti inga kacili ciyumu, mulekela jwi lya Leza kulingaula “mizeezo amakanze aamumoyo [wanu]” alimwi akumusololela kwiiya muuya wa Jehova wakulekelela.—Heb. 4:12.
SENA MWEELEDE KUBIJILWA?
9, 10. (a) Ino inga mwacita buti kuti umwi wamulubizyila? (b) Ino kuba amuuya wakulekelela inga kwamugwasya buti kucinca mbomuzibona zyintu mubuumi?
9 Bukkale bunji mubuumi bupa kubijilwa. Mucikozyanyo, ciindi nomweenzya mootokala wanu, amweezyeezye kuti kwacaala asyoonto kuti mootokala umwi upwaye mootokala wanu. Ino inga mwacita buti? Bantu bamwi balanyema kapati cakuti balamulwana namutekenya ooyo. Pele, mbomuli Banakristo, inga tiimwayanda kucita cintu cili boobo.
10 Inga cabota kuti mwasaanguna kutulanga-langa twaambo. Ambweni andinywe kuli mpomwalubizya kucintu cacitika akaambo kakuti kuli cakamunyonganya. Ambweni namutekenya ooyo walijisi penzi kumootokala wakwe. Kaambo kapati mubukkale oobu ibwaambwa nkakuti tulakonzya kucesya bukali, kutyompwa alimwi akubijilwa kwiinda mukumvwisya, kwaanguluka mumizeezo alimwi akulibambila kulekelela. Lugwalo lwa Mukambausi 7:9 lwaamba kuti: “Utafwambi kukalala ciindi cakubijilwa, nkaambo mumyoyo yabafubafuba mobukede bukali.” Tamweelede kubijilwa pe. Ziindi zinji, cintu icilibonya mbuli kuti nkulubizya acaali, inga kacitali boobo pe ambweni nkutalondoka buyo naa kutamvwana kabotu. Amuyeeye kuti inga tiimwazimvwisya zyintu zyoonse zijatikizyidwe mubukkale oobo, aboobo amulibambile kulekelela muluyando. Muyookkomana kuti mwazwidilila.—Amubale 1 Petulo 4:8.
‘LUUMUNO LWANU LUPILUKE KULINDINYWE’
11. Ino bantu mbubaatambula makani mabotu ceelede kutupa kucita nzi swebo tobakambausi ba Bwami?
11 Mbuti mbomukonzya kulyeendelezya kuti muntu umwi kaambaula cakubbodola nimuli mumulimo wamumuunda? Jesu naakatuma bakambausi bali 70, wakabaambila kuti kabaamba kuti akube luumuno aŋanda iiliyoonse njobakali kuyooswaya. Jesu wakaamba kuti: “Ikuti muŋanda oomo kakuli muntu uuyandisya luumuno, luumuno lwanu luyooba alinguwe. Pele kuti kakunyina, luyoopiluka kulindinywe.” (Lk. 10:1, 5, 6) Tulakkomana ciindi bantu nibatutambula mumulimo wesu, nkaambo ambweni inga bagwasyigwa amulumbe ngutujisi. Nokuba boobo, zimwi ziindi tabatutambuli caluumuno. Aboobo, ncinzi ncotweelede kucita? Jesu wakaamba kuti luumuno lwanu lweelede kupiluka kulindinywe. Kufwumbwa naa bantu batutambula buti, tweelede kuzwa aŋanda iiliyoonse katujisi luumuno mumyoyo yesu. Ikuti twanyema akaambo kakuti taakwe nibatutambula kabotu, tatukonzyi kuzumanana aluumuno lwesu.
12. Kweelana amajwi aa Paulo mulugwalo lwa Baefeso 4:31, 32, ino tweelede kulilemeka buti?
12 Amusoleke kuba aluumuno mubukkale buliboonse kutali buyo mumulimo wa Bunakristo. Kuyandisya kulekelela bamwi tacaambi kuti mweelede kukukkomanina kutalilemeka kabotu kwabo naa kucesya bubi buboola akaambo kakutalilemeka ooko. Pele kulekelela caamba kutabikkilila akaambo kakulubizya kulikoonse alimwi akuzumanana aluumuno lwanu. Bantu bamwi balekela kutalilemeka kwabamwi kubapa kubula lukkomano akaambo kakuba amizeezo mibi alimwi akuyeeya kapati mbobatakeendelezyegwa kabotu. Mutalekeli mizeezo iili boobu kumweendelezya. Kamuyeeya kuti tamukonzyi kukkomana kuti kamubikkilila twaambo. Aboobo, kamulekelela!—Amubale Baefeso 4:31, 32.
AMUCITE ZYINTU MUNZILA IIKKOMANISYA JEHOVA
13. (a) Mbuti Munakristo ‘mbwalundika makala aamulilo’ amutwe wasinkondonyina? (b) Ncinzi cikonzya kucitika kuti mwaingula amoyo mubombe ciindi nimwalubizyilwa?
13 Zimwi ziindi mulakonzya kulimvwa kuti inga mwagwasya muntu umwi wamubisizya kutegwa katobela zyeelelo zya Bunakristo. Mwaapostolo Paulo wakalemba kuti: “‘Ikuti sinkondonyoko kafwide nzala, komupa cakulya; ikuti kafwide nyota, komupa cakunywa; nkaambo kwiinda mukucita boobo, ulalundika makala amulilo amutwe wakwe.’ Utalilekeli kuzundwa abubi, pele kozumanana kuzunda bubi kwiinda mukucita zibotu.” (Lom. 12:20, 21) Kwiinda mukucita zyintu zibotu ciindi bamwi nibamulubizyila, mulakonzya kupa kuti bacince mizeezo alimwi akupa kuti batalike kucita kabotu. Kwiinda mukutondezya kumvwisya, lweetelelo—niluba luzyalo—kumuntu wamulubizyila, ambweni mulakonzya kumugwasya kwiiya kasimpe kamu Bbaibbele. Kufwumbwa naa cili buti, kwiingula amoyo mubombe kupa muntu coolwe cakuyeeya kulilemeka kwanu kubotu.—1 Pe. 2:12; 3:16.
14. Nokuba kuti muntu wamubisizya buti, nkaambo nzi ncomuteelede kumubikkilila?
14 Mubukkale bumwi, takweeleli kuyanzana abantu bamwi. Eeci cilabikkilizya abaabo ibakali cibeela cambungano pele bakabisya, tiibakeempwa alimwi bakagwisyigwa. Ikuti muntu uuli boobo wamubisizya, cilakonzya kumuyumina kumulekelela nokuba kuti weempwa, nkaambo kupenga mumizeezo kutola ciindi. Mubukkale buli boobo, mulakonzya kuzumanana kulomba Jehova kuti amugwasye kuba amuuya wakulekelela muntu ooyo. Kayi tatukonzyi kuzyiba cili mumoyo wamuntu umwi. Pele Jehova ulizyi. Ulalingula zyintu muntu nzyalombozya alimwi ulabakkazikila moyo basizibi. (Int. 7:9; Tus. 17:3) Nkakaambo kaako Magwalo aamba kuti: “Mutapilusizyi muntu uuli woonse bubi. Amusole kucita zyintu zibonwa kuti nzibotu abantu boonse. Kamusoleka kusikila mpomugolela kukkala muluumuno abantu boonse. Nobayandwa, mutapilusizyi muntu cibi, pele amusiile bukali bwa Leza busena; nkaambo kulembedwe kuti: ‘Cisubulo ncicangu; ndime nendiyoopilusya cibi, mbwaamba Jehova.’” (Lom. 12:17-19) Sena tulijisi nguzu zyakusinganya muntu uumwi? Peepe. (Mt. 7:1, 2) Pele mulakonzya kuba alusyomo lwakuti bululami buli mumaanza aa Leza.
15. Ncinzi ncotweelede kuzyiba kujatikizya bantu batubisizya alimwi eeci ceelede kutupa kubabona buti?
15 Kuti naa muyeeya kuti bamucitila zyintu cakutalulama alimwi camuyumina kuti mumulekelele muntu iweempwa, cili kabotu kuzyiba kuti ooyo wamucitila boobo awalo wakacitilwa cakutalulama. Awalo ulapenga akaambo kazyintu ziboola akaambo kakutalondoka. (Lom. 3:23) Jehova ulabafwida luzyalo boonse bantu batalondokede. Aboobo, cileelela kumupailila muntu ooyo wamubisizya. Takulangilwi kuti inga mwazumanana kunyemena muntu ngomupailila. Alimwi kaambo ncotuteelede kubabikkilila nibaba baabo batupenzya kalitondezyedwe mumajwi aa Jesu aakuti: “Amuzumanane kuyanda basinkondonyoko akubapailila aabo bamupenzya.”—Mt. 5:44.
16, 17. Ncinzi ncomweelede kucita kuti baalu Banakristo babeteka sizibi kuti weempwa, alimwi nkaambo nzi?
16 Kweelana akuyanda kwa Jehova, baalu Banakristo balipedwe mukuli wakulanganya twaambo tujatikizya milandu mumbungano. Bakwesu aaba tabajisi busongo mbuli Leza, pele makanze aabo ngakucita zyintu kweelana a Jwi lya Leza kwiinda mubusolozi bwamuuya uusalala. Aboobo, nzyobasala kucita mumakani amwi bamanizya kulomba lugwasyo lwa Jehova mumupailo zilatondezya mbwazibona zyintu.—Mt. 18:18.
17 Aawa kusyomeka mpokuyandika kapati. Sena muyoolekelela alimwi akutondezya luyando kuli baabo bakeempwa? (2 Ko. 2:5-8) Eeci tacili cuubauba, ikapati kuti mwakacitilwa zyintu zibi naa ooyo wakacitikilwa zyintu zibi musazinyoko. Nokuba boobo, kwiinda mukusyoma Jehova alimwi anzila nzyabelesya kucita zyintu kwiinda mumbungano, muyoocita cabusongo. Muyootondezya kuti ncobeni mulalekelela camoyo woonse.—Tus. 3:5, 6.
18. Mbuti mbomukonzya kugwasyigwa akaambo kakulekelela camoyo woonse?
18 Basyaazibwene mulwiiyo lwamizeezo baamba kuti kuyandisisya kulekelela kulagwasya. Kupa kuti mizeezo iitali kabotu iipa kuciswa izwe alimwi akuti kube zilongwe zibotu alimwi zyalukkomano. Amuceezyanisye eeci azyintu ziboola akaambo kakutalekelela—kuciswa-ciswa, kumana kwazilongwe, kutyompwa alimwi akutamvwana. Pele cilongezyo ciyandika kapati iciboola akaambo kakulekelela nkuba acilongwe cibotu aa Taateesu wakujulu, Jehova.—Amubale Bakolose 3:12-14.
[Mibuzyo yaciiyo]
[Cifwanikiso icili apeeji 27]
Mucikozyanyo eeci ncaakabelesya Jesu, ino nkaambo nzi kapati nkaakali kwaamba?
[Cifwanikiso icili apeeji 30]
Kulekelela nceelelo ca Bunakristo
