Amubayiisye Bana Benu

Marko Wakazumanana

MARKO wakalemba bbuku lyomwe lili akati kamabbuku one aali mu Bbaibbele aamba zyabuumi bwa Jesu. Ndifwaafwi alimwi talikatazyi kubala. Ino Marko wakali ni? Sena uyeeya kuti wakalimuzyi Jesu?— * Atubone buyumuyumu mbwaakajisi Marko alimwi akubona cakapa kuti Marko azumanane kali Munakristo.

Izyina lya Marko lilaambwa ciindi cakusaanguna mu Bbaibbele ciindi Mwami Heroda Agripa naakamwaanga mwaapostolo Petro. Ciindi cimwi, Petro naakaangululwa amungelo kuzwa muntolongo masiku, wakaunka kuŋanda ya Mariya banyina Marko bakali kukkala ku Jerusalemu. Petro wakaangululwa kakwiindide myaka iitandila kukkumi kuzwa ciindi Jesu naakajaigwa lya Pobwe Lyakwiindilila mu 33 C.E.—Incito 12:1-5, 11-17.

Sena ulikazyi kaambo kakapa kuti Petro aunke kuŋanda ya Mariya?—Kweelede kuti wakalizyibene abamumukwasyi wa Mariya alimwi wakalizyi kuti baapostolo bakali kuswaanganina muŋanda yakwe. Barnaba mweeninyina Marko wakali sikwiiya kwaciindi cilamfwu, kuzwa ciindi ca Pobwe lya Pentekoste mu 33 C.E. Ibbaibbele lyaamba kuti wakalyaaba kutegwa agwasye basikwiiya bapya ciindi ca Pentekoste mu 33 C.E. Aboobo, kweelede kuti Jesu wakalimuzyi Barnaba abanyina basyoonto ba Mariya amwanaabo Marko.—Incito 4:36, 37; Ba-Kolose 4:10.

Mubbuku lyakwe lya Makani Mabotu, Marko wakalemba makani aamba mukubusi watakasamide iwakaliko masiku Jesu naakajatwa pele “wakalilivumbide mulembo uutuba luzutu.” Jesu naakajatwa abasinkondonyina, Marko wakalemba kuti ooyo mukubusi wakatija. Ino uyeeya kuti ooyo mukubusi wakali ni?—Weelede kuti wakali Marko! Aboobo, Jesu abaapostolo bakwe nobakali kuyabweenda masiku, kweelede kuti Marko wakalivwumba buyo mulembo akubatobela.—Marko 14:51, 52.

Bwini mbwakuti Marko zyiindi zyinji wakali kuyanzana ababelesi ba Leza akulibonena kuzuzikizyigwa kwa Makanze aa Leza. Kweelede kuti wakaliko ciindi muuya uusalala nowakatilwa lya Pentekoste mu 33 C.E. alimwi wakali kuyanzana kapati ababelesi ba Leza basyomeka mbuli Petro. Pele wakali kubeleka limwi amweeninyina Barnaba iwakagwasya Saulo kwiinda mukumuzibya kuli Petro kakwiindide myaka iitandila kuli yotatwe kuzwa ciindi Jesu naakalibonya kuli Saulo mucilengaano. Nikwakainda ciindi, Barnaba wakatumwa ku Tarso kwaakuyandaula Saulo.—Incito 9:1-15, 27; 11:22-26; 12:25; Ba-Galatiya 1:18, 19.

 Mumwaka wa 47 C.E., Barnaba a Saulo bakasalwa kuti babeleke mulimo wabumisyinali. Bakamubwezyelezya Marko, pele akaambo katwaambo tutazyibidwe, Marko wakabasiya akujokela kuŋanda ku Jerusalemu. Saulo, walo wakazyikuzyibwa azyina lyakwe lyaci Roma lyakuti Paulo, wakanyema. Alimwi Paulo wakacimwa kapati anzyaakacita Marko akaambo kakuti wakabona kuti wakalubizya kapati.—Incito 13:1-3, 9, 13.

Nibakapiluka kuzwa kumulimo wabumisyinali, Paulo a Barnaba bakaamba milimo njobakabeleka. (Incito 14:24-28) Nikwakainda myezi, Paulo a Barnaba bakayeeya kuti bapilukile kwaakuswaya basiciiya bapya mbobakakambaukila. Barnaba wakali kuyanda kuti bamutoleele Marko, pele sena ulizyi nzyakali kuyeeya Paulo?—“Wali kuyeeya kuti takweelede” akaambo kakuti ciindi cainda Marko wakabasiya akujokela kuŋanda. Kweelede kuti zyintu zyakatobela zyakamutyompya kapati Marko!

Bakanyemezyanya alimwi “kwakaba kukazyanya kupati,” kumane Paulo a Barnaba bakaandana. Barnaba wakatoleela Marko akuunka kuyookambaukila ku Kupro, pele walo Paulo wakasala Sila akuzumanana abubambe bwakusaanguna bwakuya kuswaya basikwiiya bapya. Kweelede kuti Marko wakatyompwa kapati akaambo kakuti nguwakapa kuti Paulo a Barnaba bazwangane!—Incito 15:36-41.

Tatukazyi kaambo kakapa kuti Marko ajokele kuŋanda. Kweelede kuti walo wakajisi kaambo kaya koomonga kakapa kuti acite boobo. Nokuba boobo, Barnaba wakalisinizyide kuti lino wakali kuyoozumanana. Wakali luzi. Marko wakazumanana!  Nikwakainda ciindi, wakabeleka mulimo wabumisyinali a Petro ku Babuloni kulafwu ankwazwa. Nobakali ku Babuloni, Petro wakabaazya akwaamba kuti: “Alakwe mwanaangu Marko ulamujuzya.”—1 Petro 5:13.

Elo kwakali cilongwe cakumuuya cibotu kapati akati ka Petro a Marko! Eeci cilalibonya notubala Makani Mabotu aa Marko. Nzyaakalemba Marko zyitondezya kuti makani wakaajana kuli Petro walo wakalibonena zyintu nizyakali kucitika. Mucikozyanyo, amukozyanisye makani aajatikizya guwo lyakabbubbula Mulwizi lwa Galilaya. Marko waamba nkwaakalede Jesu mubwato ampaakabikkide mutwe, zyintu sikuzela nswi Petro nzyaakalibonena. Tulakonzya kulibonena kaambo aaka kwiinda mukubala akweezyanisya zibalo zyamu Bbaibbele zyili kuli Matayo 8:24; Marko 4:37, 38; alimwi a Luka 8:23.

Nokwakainda ciindi, Paulo naakali muntolongo ku Roma, wakamulumbaizya Marko akaambo kamilimo yakwe mibotu. (Ba-Kolose 4: 10, 11) Paulo naakaagwa ku Roma alimwi, wakalembela Timoteo lugwalo akumwaambila kuti amuletelezye Marko akaambo kakuti: “Ulandigwasya mumulimo wa Leza.” (2 Timoteo 4:11) Masimpe, Marko wakabelekela Leza munzila zyilibedelede akaambo kakuti wakazumanana!

Bupanduluzi buyungizidwe

Mibuzyo:

○ Ino Marko wakali kukkala kuli, alimwi nkaambo nzi ncokonzya kwaamba kuti kweelede kuti wakali muzyi Jesu?

○ Ino nguni wakamugwasya kapati Marko?

○ Ino ncinzi cakali kukonzya kupa kuti Marko atazumanani?

○ Ino tuzyi buti kuti kumamanino Marko wakali kuyandwa amwaapostolo Paulo?

[Cifwanikiso icili apeeji 31]

Ino mukubusi ooyu nguni? Ino ncinzi cimucikila alimwi nkaambo nzi?

[Cifwanikiso icili apeeji 32]

Nzilongezyo nzi nzyaakajana Marko akaambo kakuzumanana?