Sena Bakamboni ba Jehova Bapa Kuti Banabukwetene Balekane?

BANTU banji baamba kuti “ikuti umwi akati kabanabukwetene wacinca bukombi bwakwe balalekana.” Zimwi ziindi aabo bayanda kuba Bakamboni ba Jehova, mbobaambilwa oobo. Sena aaya masimpe?

Masimpe, ikuti umwi akati kabanabukwetene wacinca bukombi bwakwe, cilakonzya kumunyonganya ngobakwetene limwi akumupa kulibilika, kutyompwa akunyema.

Kanji-kanji, mukaintu nguusaanguna kucinca. Ikuti mukaintu wanu kaiya Bbaibbele a Bakamboni ba Jehova, ncinzi cikonzya kucitika kucikwati canu? Kuti omukaintu koli ndiwe ooiya Bbaibbele a Bakamboni ba Jehova, ncinzi nconga wacita kutegwa mulumi wako katalibiliki?

Mulumi Mbwazilanga Zyintu

Mark amukaintu wakwe ibakkala ku Australia, nokwakainda myaka iili 12 kabakwetene, mukaintu wakwe wakatalika kwiiya Bbaibbele a Bakamboni ba Jehova. Mark wakaamba kuti: “Twakali kukkala kabotu alimwi ndakali kubeleka mulimo mubotu. Mpoonya mukaintu wangu wakatalika kwiiya Bbaibbele a Bakamboni ba Jehova. Eeci cakandipa kulibilika. Kumatalikilo, ndakali kukatazyigwa mumizeezo akaambo kakuti mukaintu wangu wakali kwiiya Bbaibbele, alimwi ndakatyompwa kapati naakandaambila kuti uyanda kubbapatizyigwa akuba umwi wa Bakamboni ba Jehova.”

Mark wakali kuyeeya kuti ambweni cikwati cilamana akaambo kacikombelo ncaakatalika kunjila mukaintu wakwe. Wakali kuyanda kumukasya kwiiya Bbaibbele akuyanzana a Bakamboni ba Jehova. Nokuba boobo tanaakamukasya mpoonya aawo. Ncinzi cakacitika kuli banabukwetene aaba?

Mark wakaamba kuti: “Icikkomanisya ncakuti aano mazuba tukkala kabotu mucikwati kwiinda lyoonse. Mumyaka iili 15 yainda kuzwa naakabbapatizyigwa mukaintu wangu akuba Kamboni wa Jehova, tulikkomene alimwi tukkala kabotu.” Ncinzi capa kuti kabakkala kabotu? Mark wakaamba kuti:  “Ikaambo kapati kapa kuti katukkala kabotu nkakuti mukaintu wangu ulaatobela malailile aamu Bbaibbele alimwi lyoonse ulandilemeka.”

Malailile Kuzwa Kuli Bamakaintu Ibakagwasya Bamalumi Babo

Kuti omukaintu koli ndiwe ooiya Bbaibbele a Bakamboni ba Jehova, ncinzi nconga wacita kutegwa mulumi wako katalibiliki? Amubone twaambo ntobakaamba bamakaintu aaba bazwa mumasi aindene-indene.

Ba Sakiko, baku Japan bakati: “Ndakakwatwa myaka iili 31 yainda alimwi ndijisi bana botatwe. Kwainda myaka iili 22 kuzwa ciindi nindakaba umwi wa Bakamboni ba Jehova. Akaambo kakuti mulumi wangu tali umwi wa Bakamboni ba Jehova, zimwi ziindi tatweendelani kabotu. Pele ndilasolekesya kutobela malailile aamu Bbaibbele aakuti, muntu ‘abe amutwe muuba, amuke kwaamba, amuke kunyema.’ (Jakobo 1:19) Ndilaakuba alubomba kubalumi bangu alimwi akucita nzyobayanda ikuti kazyeendelana anjiisyo zyamu Bbaibbele. Eeci capa kuti katukkomene.”

Ba Nadezhda baku Russia bakati: “Ndakakwatwa myaka iili 28 yainda alimwi kwainda myaka iili 16 kuzwa nindakaba umwi wa Bakamboni ba Jehova. Kanditana talika kwiiya Bbaibbele, tiindakalizyi kuti balumi bangu mbobeelede kuba mutwe wamukwasyi. Ndakali kulisalila zyakucita. Nokuba boobo, mukuya kwaciindi ndakabona kuti ikubelesya njiisyo zyamu Bbaibbele nkokwakapa kuti kube luumuno alukkomano mumukwasyi wesu. (1 Ba-Korinto 11:3) Ndakatalika kubamvwida balumi bangu alimwi abalo bakabona kuti ndacinca.”

Ba Marli baku Brazil bakati: “Ndakakwatwa myaka iili 21 yainda alimwi ndijisi bana bobilo. Kwainda myaka iili 16 kuzwa nindakabbapatizyigwa akuba umwi wa Bakamboni ba Jehova. Ndakazyiba kuti Jehova Leza uyanda kuti banabukwetene kabakkala antoomwe ikutali kulekana. Aboobo mbondaambaula ambondicita zyintu zilamukkomanisya Jehova abalumi bangu.”

Ba Larisa baku Russia bakati: “Nindakaba umwi wa Bakamboni ba Jehova myaka iili 19 yainda, ndakazyiba kuti ndiyandika kucinca bukkale bwangu. Balumi bangu balabona kuti Bbaibbele lyandigwasya kuba mukaintu mubotu alimwi ndilababikkila maano. Kumatalikilo twakali kwiimpana kumakani aakuyiisya bana, pele lino tulamvwana. Balumi bangu balandizumizya kuunka abana kumiswaangano yambungano nkaambo balizyi kuti nzyobaiya zilabagwasya.”

Ba Valquíria, baku Brazil bakati: “Ndakakwatwa myaka iili 19 yainda alimwi ndijisi mwana omwe. Kwainda myaka iili 13 kuzwa nindakaba umwi wa Bakamboni ba Jehova. Kumatalikilo, balumi bangu tiibakali kuyanda kuti kandikambauka. Pele ndakali kubaambila cabulemu akubatondezya kuti Ibbaibbele ndilyakandipa kuba amoyo mubotu. Mukuya kwaciindi, balumi bangu bakazyiba mbouyandika kapati mulimo ooyu wakukambauka. Mazuba aano, balandigwasya kapati mumilimo yangu yakumuuya. Balandisindikila amootokala kuziiyo zyangu zya Bbaibbele zili kuminzi iili kule adolopo akundilindila kusikila twamanizya kwiiya.”

Icipa Kukkala Kabotu

Ikuti ngomukwetene limwi kaiya Baibbele a Bakamboni ba Jehova, mutalibiliki kuti ambweni ŋanda yanu ilafwa. Munyika yoonse, bamalumi abamakaintu banji babona kuti Ibbaibbele ndelipa kuti kabakkala kabotu.

Mulumi umwi, uutali umwi waba Kamboni ba Jehova, wakaamba kuti: “Kumatalikilo cakalikundicima kuti mukaintu wangu wakali kwiiya a Bakamboni ba Jehova, pele lino ndilikkomene akaambo kakuti wakasala kabotu. Uumwi wakaamba boobu kujatikizya mukaintu wakwe: “Ikusyomeka kwamukaintu wangu kwandipa kubayanda kapati Bakamboni ba Jehova alimwi kwapa kuti katukkala kabotu. Tulamvwana alimwi tulombozya kuti lufwu lolikke ndoluya kutwaandaanya.”

 Kabbokesi kali apeeji 32]

Ino Bakamboni ba Jehova Balubona Buti Lukwatano?

Bakamboni ba Jehova, Ibbaibbele balibona kuti ndi Jwi lyakasololelwa amuuya wa Leza. Aboobo, balatobela ncolyaamba Bbaibbele kujatikizya lukwatano. Amubone Ibbaibbele mboliingula mibuzyo iitobela:

▪ Sena Bakamboni ba Jehova bakulwaizya Banakristonyina kulekana angobakwetene limwi kuti katali Kamboni? Peepe. Imwaapostolo Paulo wakalemba kuti: “Akuli umwi sibunyina uujisi mukaakwe uutali muzumini, lino moyo wakwe wanooyanda kukala kulinguwe, atamuleki. Alimwi, akuli umwi mwanakazi uujisi mulumaakwe uutali muzumini, lino moyo wakwe wanooyanda kukala kulinguwe atamuleki.” (1 Ba-Korinto 7:12, 13) Bakamboni ba Jehova balautobela mulawo ooyu.

▪ Sena Bakamboni ba Jehova bamakaintu ibakwetwe kubantu batali Bakamboni tabeelede kubabikkila maano balumi babo? Peepe. Imwaapostolo Petro wakalemba kuti: “Anywebo nobanakazi, amulibombye kubalumi banu nobeni, kuti kwanooli bamwi bataswiililisyi kumakani, basanduke nkaambo kanyendelo zyabakazi babo, kuti tabaambilwi zintu, kukulangilila inyendelo zyanu zisalala nzimweendela cakuyoowa.”—1 Petro 3:1, 2.

▪ Sena Bakamboni ba Jehova bayiisya kuti bweendelezi bwamulumi mbobupati kwiinda? Peepe. Imwaapostolo Paulo wakaamba kuti: “Ndayanda kuti mukazibe aya. Mutwe wamwaalumi umwi aumwi ngu-Kristo, awalo mutwe wamwanakazi ngumwaalumi, awalo mutwe wa-Kristo ngu-Leza.” (1 Ba-Korinto 11:3) Imukaintu Munakristo ulalemeka mulumaakwe nkaambo ngomutwe wamukwasyi. Nokuba boobo, bweendelezi bwamulumi tabuli mbobupati kwiinda. Ulalyaambilila kuli Leza a Kristo. Aboobo, ikuti mulumi waambila mukaintu wakwe kucita cintu cikonzya kumupa kutyola mulawo wa Leza, mukaintu Munakristo “[uya]kumvwa Leza kwiinda bantu.”—Incito 5:29.

▪ Sena Bakamboni ba Jehova bayiisya kuti kulekana kulakasyigwa? Peepe. Jesu Kristo wakaamba kuti: “Ndamwaambila kuti umwi aumwi uuleka mukakwe akukwata umbi, nkutaamba nkaambo kakuvuula luzutu, waba sibwaamu.” (Matayo 19:9) Aboobo Bakamboni ba Jehova balakazumina kaambo nkaakaamba Jesu kakuti bumambi inga bwapa bantu kuti balekane. Pele alimwi basyoma kuti banabukwetene tabeelede kulekana akaambo katwaambo tutayi koomoonga. Bakulwaizya Banakristonyina kutobela malailile aa Jesu aakuti: “Mwaalumi asie wisi abanyina, akakatile mukakwe, kuti aba bobile babe nyama yomwe . . . Nkaambo kaako, abo mbaakakakatizya Leza muntu atabapambukanyi.”—Matayo 19:5, 6.