Kupenga Kuli Afwaafwi Kumana!

Amweezeezye kuti mupona munyika mutakwe mapenzi—munyika mutakwe bugwebenga, nkondo, kuciswa, alimwi antenda zilicitikila. Amuyeeye buyo, kubuka mafwumofwumo aali woonse kakunyina kulibilika kujatikizya makani aamali, kusalululana, naa kudyaamininwa. Sena zyoonse eezyi ziboneka mbuli kuti inga tiizyacitika? Masimpe kuti kunyina muntu naa mbunga yabantu iikonzya kuleta bukkale buli boobu. Pele Leza wasyomezya kugwisya zyintu zyoonse ziletela mapenzi kubantu, kubikkilizya azyeezyo zyabandikwa mucibalo cainda. Amubone zisyomezyo zitobela zili mu Jwi lya Leza, Bbaibbele:

▪ BULELO BWAMFWULUMENDE MBOTU

“Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”—Daniele 2:44.

Bwami bwa Leza nimfwulumende yakujulu. Muleli wanjiyo uusalidwe, Jesu Kristo, uyoonjila mubusena bwabulelo bwabantu alimwi uyoosinizya kuti kuyanda kwa Leza kwacitwa kutali buyo kujulu pele aanyika. (Matayo 6:9, 10) Mfwulumende eeyi taikanjililwi busena amfwulumende iili yoonse yabantu akaambo kakuti ‘mbwami butamani bwa Mwami a Mufwutuli wesu Jesu Kilisito.’ Kuyooba luumuno lutamani.—2 Petulo 1:11.

▪ KUNOONYINA BUKOMBI BWAKUBEJA

“Saatani mwini ulalisandula lyoonse kuba mbuli mungelo wamumuni. Aboobo tacigambyi pe ikuti naa abalo babelesi bakwe balalisandula lyoonse kuba mbuli babelesi babululami. Pele mamanino aabo ayooba mbubonya mbuli milimo yabo.”—2 Bakolinto 11:14, 15.

Bukombi bwakubeja buyooyubununwa kuti mulimo wa Diabolosi alimwi buyoogwisyigwa anyika. Kusalululana kwabukombi alimwi akujayana ziyoomana. Eeci ciyoopa kuti boonse bamuyanda “Leza uupona alimwi mwini-mwini” bakamukombe ‘mulusyomo lomwe’ alimwi ‘amumuuya amukasimpe.’ Eelo kaka kuyooba luumuno alukamantano!—1 Batesalonika 1:9; Baefeso 4:5; Johane 4:23.

▪ BANTU BAYOOLONDOKA

“Leza lwakwe uyooba ambabo. Eelyo uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”—Ciyubunuzyo 21:3, 4.

 Jehova Leza wapa kuti eeci cikonzyeke kwiinda mu Mwanaakwe, Jesu, iwakaaba buumi bwakwe akaambo kabantu. (Johane 3:16) Mubweendelezi bwa Jesu, bantu bayoolondoka. Kunoocinyina kupenga nkaambo “Leza lwakwe uyooba ambabo” alimwi uyoosindula “misozi yoonse kumeso aabo.” Kutalondoka kwabantu alimwi akupenga ziyooba zyintu zyakaindi, “balulami bayookona nyika, bayookala alinjiyo lyoonse.”—Intembauzyo 37:29.

▪ MYUUYA MIBI TAINOOLIKO

“[Jesu Kristo] wakajata simwaaba, imuzoka ooyo wakaindi, uuli ngo Diabolosi alimwi Saatani, akumwaanga kwamyaka iili 1,000. Eelyo wakamuwaala mumulindi uutagoli, wakaujala akumusinkila ikutegwa ateeni limbi masi.”—Ciyubunuzyo 20:2, 3.

Kuyunga kwabusaatani koonse kuyoomana ciindi Saatani amadaimona baakwaangwa akuwaalwa “mumulindi uutagoli,’ nkokuti muciimo mobatakonzyi kucita cili coonse. Tabakeendelezyi limbi bantu. Eelo kaka tuyookatalusyigwa kupona munyika mutakwe Saatani amyuuya mibi!

▪ “MAZUBA AAKUMAMANINO” AYOOMANA

“Mazuba aakumamanino” ayoomana kumamanino aa “mapenzi mapati” ngaakaamba Jesu. Wakaamba kuti: “Kuciindi eeco kuyooba mapenzi mapati aatanacitikide kuzwa kumatalikilo aanyika kusikila sunu, alimwi kunyina naayooba limbi pe.”—Matayo 24:21.

Mapenzi anooli mapati nkaambo kuyooba mapenzi aatanacitikide. Aaya ayoomana ‘munkondo yabuzuba bupati bwa Leza Singuzuzyoonse,’ naa kuti “Amagedoni.”—Ciyubunuzyo 16:14, 16.

Nyika yoonse, bantu ibayanda zyintu ziluzi balalangila kumana kwabweende bwazyintu oobu bubyaabi. Amulange-lange zilongezyo zisyoonto buyo akati kazilongezyo nzyobalangila mu Bwami bwa Leza.

LEZA UYOOCITA ZYINTU ZINJI!

“Nkamu mpati” yabantu iyoofwutuka akunjila munyika mpya yaluumuno: Ijwi lya Leza lyaamba kuti “nkamu mpati” yabantu batakonzyi kubalwa ‘bayoozwa mumapenzi mapati’ akufwutuka kutegwa bakapone munyika mpya iiluleme. (Ciyubunuzyo 7:9, 10, 14; 2 Petulo 3:13) Bayoolumba Jesu Kristo, “Mwanaambelele wa Leza ooyo uugusya zibi zyanyika” akaambo kakubafwutula.”—Johane 1:29.

Kunooli zilongezyo zinji akaambo kakuyiisyigwa a Leza: Nyika mpya, “iyoozula luzibo lwa-Jehova.” (Isaya 11:9) Lwiiyo oolu luzwa kuli Leza luyoobikkilizya amalailile aakutuyiisya mbotukonzya kupona muluumuno abantu boonse alimwi akwiibamba kabotu nyika. Leza usyomezya kuti: “Ndime Jehova Leza wako. Ndime uukwiiyiisya kuti ugwasigwe. Ndime uukweenzya munzila njoelede kutola.”—Isaya 48:17.

Bayandwa besu bafwide bayoobusyigwa: Naakali anyika, Jesu wakabusya mweenzinyina Lazaro kuzwa kulufwu. (Johane 11:1, 5, 38-44) Aboobo, nzyaakacita zyakali citondezyo cakuti uyoocita kwiinda waawo mubweendelezi bwa Bwami bwa Leza.—Johane 5:28, 29.

Luumuno abululami zinooliko lyoonse: Mubulelo bwa Kristo, bubi tabunooliko. Ino tuzyi buti oobo? Akaambo kakuti Jesu ulijisi nguzu zyakuzyiba cili mumoyo, alimwi uyoobelesya nguzu eezyo kubeteka akati kabantu balulami ababi. Aabo batakaileki micito yabo mibyaabi tabakazumizyigwi kupona munyika mpya ya Leza.—Intembauzyo 37:9, 10; Isaya 11:3, 4; 65:20; Matayo 9:4.

Twalanga-langa buyo businsimi bwamu Bbaibbele busyoonto ibutondezya zyintu zibotu nzyotulangila kumbele. Bwami bwa Leza bwaakulela nyika, kunooli ‘luumuno lunji” lutamani. (Intembauzyo 37:11, 29) Zyoonse zyintu zibacisa bantu akubaletela mapenzi ziyoogwisyigwa. Tulisinizyide akaambo kacisyomezyo ca Leza eeci: “Amubone! Ndilabambulula zyintu zyoonse kuti zibe zipya. . . . Majwi aaya alasyomeka alimwi ngamasimpe.”—Ciyubunuzyo 21:5.

[Cifwanikiso icili apeeji 6]

[Kulumba]

© Silke Woweries/Corbis