MAKANI AAYEEME AMUTWE UULI ACIVWUMBYO
Sena Kuli Bulangizi Buliko Kubantu Bafwide?
Sena bafwide balakonzya kubuka alimwi?
BWIINGUZI BWAMU BBAIBBELE: “Ciyoosika ciindi eelyo aabo boonse ibali muzyuumbwe nobayoomvwa ijwi lya [Jesu] akuzwa mulinzizyo.”—Johane 5:28, 29.
Jesu wakaambila limwi zintu ziyoocitika kumbele ciindi bantu bali Muzyuumbwe nobayoobusyigwa mubweendelezi bwa Bwami bwakwe. Ba Fernando ibaambwa mucibalo cainda bakaamba kuti: “Ndakagambwa kapati ciindi nondakabala lugwalo lwa Johane 5:28, 29 ciindi cakusaanguna. Lugwalo oolu lwakandipa bulangizi bwini-bwini, alimwi ndakatalika kuyeeyesya zintu zyakumbele.”
Mumazuba aansiku, mwaalumi uusyomeka Jobu wakali kulangila kuti aakufwa, mukuya kwaciindi Leza uyoomubusya alimwi. Jobu wakabuzya kuti: “Ikuti naa muntu wafwa, sena inga wapona alimwi?” Kumane wakaingula calusyomo kuti: “Ndinoolindila mazuba oonse aamulimo wangu uuminya [ciindi ncaakali kuyooba mu Cuumbwe] kusikila cikasike ciindi nendiyoolemununwa. Uyakwiita, eelyo mebo ndiyookuvwiila.”—Jobu 14:14, 15.
Bubuke bwa Lazaro butupa bulangizi bwakumbele
Makani aabubuke tanaakali makani mapya kumucizyi wa Lazaro, Marta. Naakafwa Lazaro, Jesu wakamwaambila kuti: “Imunyoko ulabuka.” Marta wakaingula kuti: “Ndilizyi kuti uyoobuka mububuke mubuzuba bwamamanino.” Mpoonya Jesu wakamwaambila kuti: “Mebo ndendime bubuke abuumi. Ooyo uundisyoma, nokuba kuti wafwa uyooba muumi alimwi.” (Johane 11:23-25) Kalitanalampa, Jesu wakamubusya Lazaro. Makani aaya aakkomanisya atugwasya kubona zintu zipati ziboola kumbele. Amuyeeye buyo mbocikonzya kuba, ikuti bubuke buli boobu bwacitika nyika yoonse!
Sena bamwi bayoobusilwa kubuumi bwakujulu?
BWIINGUZI BWAMU BBAIBBELE: Ijwi lya Leza litondezya kuti bubuke bwa Jesu buliindene abubuke bwabantu bali lusele ibulembedwe mu Bbaibbele. Aabo bantu bali lusele bakabusyigwa akupona alimwi aano anyika. Pele kujatikizya bubuke bwa Jesu, tubala kuti: ‘Jesu Kristo . . . uli kujanza lyalulyo lya Leza, nkaambo wakaunka kujulu.’ (1 Petro 3:21, 22) Sena Jesu wakali kuyoozumanana kuba alikke iwakabusyigwa kubuumi bwakujulu? Jesu wakali baambilide kale baapostolo bakwe kuti: “Ikuti nduunke kuyoomubambila busena, ndiyooboola alimwi eelyo ndiyoomutolelezya kuŋanda yangu, kutegwa ooko nkondinoobede andinywe mukabe nkuko.”—Johane 14:3.
Kristo wakaunka kujulu akulibambila kutambula basikwiiya bakwe bamwi. Aabo babusyilwa kubuumi bwakujulu, mukuya kwaciindi bayoosika amweelwe wa 144,000. (Ciyubunuzyo 14:1, 3) Pele ino basikutobela Jesu aabo bayoocita nzi kujulu?
Banoojisi bubi kapati! Magwalo atwaambila kuti: “Ulikkomene alimwi ulasalala kufwumbwa uulaalubazu mububuke bwakusaanguna oobu; aali baaba ilufwu lwabili talujisi nguzu pe, pele bayooba bapaizi ba Leza aba Kristo, alimwi bayoolela kabali bami antoomwe anguwe kwamyaka iili 1,000.” (Ciyubunuzyo 20:6) Aabo ibayoobusyilwa kujulu bayoolela a Kristo kabali bami alimwi abapaizi anyika.
Ino mbaani ibayoobusyigwa kunze lyabaabo baunka kujulu?
BWIINGUZI BWAMU BBAIBBELE: Magwalo aakasololelwa amuuya aamba boobu kujatikizya makani ngaakaamba mwaapostolo Paulo naakati: “Ndilijisi bulangizi kuli Leza, ibulangizi mbubonya mbobajisi abalo baalumi aaba, bwakuti kuyooba bubuke bwabantu baluleme abataluleme.”—Milimo 24:15.
Ijwi lya Leza litusyomezya kuti mabbiliyoni aabantu bakafwa bayoopona alimwi
Ino mbaani bayoobikkilizyigwa akati kabaabo Paulo mbaakaamba kuti ‘baliluleme’? Nceeci cikozyanyo. Kumamanino aabuumi bwakwe, mwaalumi uusyomeka Daniele wakaambilwa boobu: “Uyoolyookezya, pele uyakwiimikila kutegwa ukabweze caabilo cako kumamanino aamazuba.” (Daniele 12:13) Ino Daniele uyoobusyilwa kuli? “Balulami bayookona nyika, alimwi bayookkala alinjiyo lyoonse mane kukabe kutamani.” (Intembauzyo 37:29) Alimwi Jesu wakaambila limwi kuti: “Balikkomene babombe myoyo, nkaambo bayookona nyika.” (Matayo 5:5) Daniele abaalumi bamwi alimwi abamakaintu basyomeka bayoobusyigwa kutegwa bakakkale anyika mane kukabe kutamani.
Ino mbaani bayoobikkilizyigwa munkamu Paulo njaakaamba kuti “bataluleme”? Mabbiliyoni aabantu aabo ibakali kupona pele ibakafwa, alimwi bunji bwabo tiibakaba acoolwe cakwiiya akutobela kasimpe kamu Bbaibbele. Baakubusyigwa, bayoomuzyiba akumulumba Jehova * alimwi a Jesu. (Johane 17:3) Boonse aabo basala kubelekela Leza banoojisi bulangizi bwakupona lyoonse mbubwenya mbuli Jehova mbwapona lyoonse.
Boonse aabo basala kubelekela Leza banoojisi bulangizi bwakupona kukabe kutamani, kabapona buumi buli kabotu alimwi bukkomanisya
Ino buumi bunooli buti anyika?
BWIINGUZI BWAMU BBAIBBELE: Leza “uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.” (Ciyubunuzyo 21:4) “Bayooyaka maanda akukkala mulingawo, bayoosyanga myuunda yamisaansa akulya micelo yanjiyo.”—Isaya 65:21.
Amweezeezye kupona mubukkale buli boobu antoomwe abayandwa banu ibayoobusyigwa! Pele kucili mubuzyo wakuti, Ino inga mwasinizya buti kuti bubuke buyoocitika ncobeni?
