Bbaibbele lyakasinsima kuti mumazuba eesu kunooli nkondo, mizuzumo yanyika, zilwazi, alimwi “bantu bayoobona zintu ziyoosya.” (Luka 21:10, 11) Mumwaka wamulimo wa 2022, a kwakacitika zintu zinji izyakali kuzuzikizya businsimi oobu. Mucikozyanyo, nkondo yaku Ukraine yakazumanana alimwi yakajatikizya bantu banji kapati. Ibanji munyika bakacili kulwana mapenzi aakaboola akaambo kabulwazi bwa COVID-19. Kuyungizya waawo, mweelwe wabantu munji kapati bakajatikizyigwa antenda zilicitikila, mbuli mizuzumo yanyika yakacitika ku Haiti alimwi amaguwo aakanyonyoona ku Central America, Philippines, alimwi aku Africa nkoili kumusanza lwaajwe. Ino mbuti Bakamboni ba Jehova mbobakabagwasyilizya aabo bakajatikizyigwa?

 Mumwaka wamulimo wa 2022, mbunga yesu yakagwasyilizya bantu ibakajatikizya muntenda zibalilwa ku 200! Alimwi twakabelesya mali aatandila ku 12 million dollars kubagwasyilizya. b Amubone mali aasangwa mbwaakabelesyegwa kugwasya bantu ibakajatikizyigwa muntenda zyobilo.

 Mu August 14, 2021, kumusanza kwacisi ca Haiti kwakacitika muzuzumo wanyika wakajisi nguzu zisika ku 7.2 magnitude. Cuusisya ncakuti, Bakamboni botatwe bakafwa, bacizyi bobilo amukwesu omwe. Pele aabo bakafwutuka bakeelede kuliyumya akaambo kakusweekelwa zintu alimwi akupengana mumizeezo nowakacitika muzuzumo wanyika. Mukwesu wazina lya Stephane wakati: “Mudolopo lyesu bantu banji bakafwa cakuti kwakali madilwe manji nsondo ansondo kwamyezi iinda aali yobilo.” Mukwesu uumwi wazina lya Éliézer, wakati: “Bakamboni banji bakasweekelwa maanda, zisani, mabbusu alimwi azintu zimwi zyakali kuyandika. Kwamyezi minji, banji bakaliyoowede akaambo kazintu zyakabacitikila.”

 Mbunga yesu yakafwambaana kupa lugwasyo. Mutabi waku Haiti wakapa zyakulya zisika kuma kilogilamu aali 53,000, matente, mamatilesi, alimwi amaccaja aamafooni aabelesya sola. Kuyungizya waawo, mumwaka wamulimo wa 2022, maanda aainda ku 100 akayakululwa naa kubambululwa. Twakabelesya mamiliyoni aamadola kugwasyilizya mulimo ooyu.

 Bakwesu alimwi abacizyi balikkomene kapati. Ba Lorette bakati: “Muzuzumo wanyika wakainyonyoona cakumaninina ŋanda yesu alimwi amakwebo eesu. Twakanyina zyakulya. Pele mbunga ya Jehova yakatugwasya, yakatupa zyoonse nzyotwakali kuyandika.” Ba Micheline bakati: “Muzuzumo wanyika wakanyonyoona ŋanda mwalo mebo abana bangu basankwa bobilo motwakali kukkala. Tiindakazyi cakucita kunze buyo lyakupaila kulomba lugwasyo, alimwi Jehova wakandiingula kwiinda mumbunga yakwe. Lino tujisi ŋanda mbotu motukkala. Ndilikanzide kucita kufwumbwa ncondikonzya kutondezya kulumba kwangu kuli Jehova.”

 Lugwasyo lwesu lwakazyibwa abamfwulumende. Mweendelezi wa city hall yaku L’Asile wakati: “Mwakacita kabotu kufwambaana kupa lugwasyo. Ndilamulumba akaambo kakuti mulatondezya bulemu kubeendelezi. Ndilikkomene kubona kuti tamubikkili maano kumali. Muciindi caboobo, muyanda kugwasya bantu. Mucita zintu akaambo kaluyando.”

 Mu January 24, 2022, guwo litegwa Ana lyakauma ku Mozambique mpoonya akuunka kumbo kusikila lyanjila ku Malawi. Kwakali mvwula mpati alimwi aguwo lilaanguzu kapati, lyalo ilyakali kweendela amakilomita aali 100 muwoola lyomwe. Lyakanyonyoona ntambo zyamalailiti, mabbiliji, akupa kuti kube zambangulwe.

 Bakamboni bainda ku 30,000 bakajatikizyigwa aguwo eeli ku Malawi aku Mozambique. Mukwesu Charles, iwakali kugwasyilizya kupa zyakali kuyandika wakaamba kuti: “Nondakabona mbobakali kupenga bakwesu azintu nzyobakasweekelwa, ndakausa kapati akubula nguzu.” Ciindile kubija, zyakulya zisyoonto nzyobakajisi alimwi anzyobakalimide zyakanyonyooka. Ibanji maanda aabo akanyonyooka. Alimwi cuusisya ncakuti, mukwesu umwi wakafwidwa bakaintu alimwi abana basimbi bobilo, ibakanyikila ciindi bwato mbobakatantide nobwakanyikila.

 Guwo lyakali kuyoosya kapati. Cakuma 01 kubusena bumwi butegwa Nchalo, ku Malawi, mukwasyi waba Sengeredo wakamvwa kuyoba kwamaanzi. Milonga yobilo yakazula! Mukwesu Sengeredo wakayeeya kuti bazwe muŋanda. Bakacita kabotu kuzwa nkaambo meenda akainyonyoona ŋanda yabo. Mpasya zyabo zyakanyonyooka, kumane zimwi zyakaunka ameenda. Mukwasyi ooyu wakaunka ku Ŋanda ya Bwami, kwalo nkobakali kweenda maminiti aa 30 lyoonse kuzwa amunzi wabo. Pele aciindi aawa bakeenda mawoola obilo. Bakateta citaambiki alimwi bakalikatede, nokuba boobo bakasika kabotu.

 Baku mutabi waku Malawi awaku Mozambique cakufwambaana bakabikka bubambe bwakugwasyilizya bakwesu. Bakapa busolozi kubalangizi bamabazu abaalu kuti balange-lange nzyobakali kuyandika bakwesu bakajatikizyidwe alimwi akubapa lugwasyo lwakumuuya. Kwakapangwa ma Kkomiti Aagwasyilizya Nokwacitika Ntenda (DRC) manji kutegwa alanganye mulimo ooyu. Cakutawaya-waya, bakwesu mumakkomiti aaya bakatalika kugwasya bakwesu kujana zyakulya azintu zimwi nzyobakali kuyandika. Mali aainda ku $33,000 akabelesyegwa kugwasya bakwesu, mpoonya aainda ku $300,000 akabelesyegwa kubambulula akuyaka maanda.

 Bakwesu ibakali mumakkomiti aagwasyilizya bakaabelesya kabotu mali, kwaambisya akaambo kakuti mali akabulide nguzu aciindi eeci. Mucikozyanyo, myezi iili ciloba kuzwa nowakatalika mulimo wakugwasyilizya, muulo wabusu ku Malawi, wakayungizyika a 70 pesenti. Muulo wamungwimba awalo wakatanta. Kutegwa babelesye mali masyoonto, bakwesu bakaula zyakulya alimwi azibelesyo zyakuyasya mweenya mu Malawi akuula zinji aciindi comwe. Aboobo bakali kubacesyela muulo mpoonya tiibakali kubbadela mali manji kuli basimyoota.

 Mulimo wakugwasya ooyu wakabakkomanisya bantu ba Jehova. Mukwesu Felisberto waku Mozambique, wakaamba kuti: “Tandinabwene mbunga yakapa bantu banjiyo zintu zinji boobu: zibelesyo zyakuyasya, mali aakukkwezya zintu, babelesi bamayake, zyakulya, alimwi abusolozi bwaluyando. Mulimo ooyu wakali citondezyo cibotu caluyando lwabunyina ndwaakaamba Jesu kulugwalo lwa Johane 13:34, 35.” Ba Ester, bamukabafwu baku Malawi ibakanyonyookelwa ŋanda yabo, bakaamba kuti: “Ndakanyina bulangizi nkaambo tiindakajisi mali aakuyasya ŋanda iimbi. Aboobo bakwesu nobakandiyakila ŋanda, ndakakkomana kapati akulimvwa kuti ndanjila kale mu Paradaiso.”

 Mbotuyaabuswena munyika mpya, kunooli ntenda zilicitikila zinji. (Matayo 24:7, 8) Nokuba boobo, akaambo kabwaabi mbomutondezya kwiinda mukusanga, tulisinizyide kuti bantu ba Jehova banoojisi nzyobayandika. Awebbusaiti ya donate.dan124.com kuli nzila zinji mbomukonzya kusanga. Tulamulumba kapati akaambo kabwaabi bwanu.