Mwaalumi muvwubi alimwi a Lazaro mbantu baambidwe mucaano ncaakaamba Jesu. Tabali bantu beni pe. (Luka 16:19-31) Mucaano eeci, bantu aaba bakali kwiiminina tubunga tobilo twabantu: (1) basololi bazikombelo ba Juda ibakali kulisumpula bamuciindi ca Jesu alimwi (2) abantu bapengede pele babombe myoyo ibakautambula mulumbe wa Jesu.

Mucibalo eeci tulalanga-langa makani aatobela:

•  Ino Jesu wakaamba nzi kujatikizya mwaalumi muvwubi a Lazaro?

•  Sena cakali buyo caano naa cakacitika ncobeni?

•  Sena caano eeci cisumpula njiisyo yamulilo wahelo?

•  Ino caano eeci caamba nzi?

 Mulugwalo lwa Luka caandaano 16, Jesu wakaamba mbobwakali kuyoocinca bukkale bwabaalumi bobilo muciindi cisyoonto buyo.

 Nceeci caano ca Jesu mubufwaafwi: Kwakali mwaalumi muvwubi wakabukkede. Mpoonya kwakali sikulombelela umwi wazina lya Lazaro iwakali kusiigwa amulyango wamuvwubi; alimwi wakali kulombozya kulya bufwefwelenga ibwakali kuloka kutebulu lyamuvwubi ooyo. Mukuya kwaciindi, Lazaro wakafwa, mpoonya bangelo bakamutola kumbali lya Abrahamu. Kumane awalo muvwubi wakafwa akuzikkwa. Mucaano eeci, baalumi boonse bobilo aaba baambidwe kuti bakazumanana kupona. Mwaalumi muvwubi wakapenga citaambiki mumulimo uupya kapati, aboobo wakalomba Abrahamu kuti atume Lazaro kuti azootontozye mulaka wakwe akadosi kamaanzi kakali kumunwe wakwe. Pele Abrahamu wakakaka akwaamba kuti bukkale bwabaalumi bobilo aaba bwakali kuyoocinca cakumaninina akuti kwakali dindi pati akati kabo lyakali kupa kuti citakonzyeki kuzabuka kuunka kulubazu lumwi.

 Cakali buyo caano. Jesu wakacaamba kutegwa ayiisye kaambo kamwi. Abalo basyaazibwene balaasinizya makani aaya. Mucikozyanyo, mu Bbaibbele litegwa Luther lyamu 1912, kuli katwe kamakani kaamba kuti eeci cakali caano buyo. Kunze lyaboobo, Bbaibbele lyaba Katolika litegwa Jerusalem Bible, mubupanduluzi buyungizyidwe lyaamba kuti “eeci ncaano buyo alimwi tacaambi muntu uuli woonse iwakaponede.”

 Sena Jesu wakali kuyiisya kuti muntu afwa ulazumanana kupona? Sena wakali kwaamba kuti bantu bamwi balapenga mumulilo wahelo bafwa akuti Abrahamu a Lazaro bakali kujulu? Bumboni bunji butondezya kuti tacisyi ncaakali kwaamba pe!

 Mucikozyanyo:

•   Ikuti naa mwaalumi muvwubi wakali mubusena mwakali kupya mulimo, sena maanzi aakali kumunwe wa Lazaro naatakayuminina akaambo kakupya?

•   Nokuba kuti maanzi naatakayuminina, sena kadosi buyo kakali kukonzya kumutontozya mwaalumi muvwubi uulya mumulilo wancobeni mane kukabe kutamani?

•   Ino mbuti Abrahamu mbwaakali kukonzya kuba kujulu, mbwaanga Jesu wakacisalazya kuti kunyina muntu wakaunkide kale kujulu aciindi ncaakali kwaamba caano eeci?—Johane 3:13.

 Peepe. Nokuba kuti cakali caano buyo, ibamwi baamba kuti cipa muzeezo wakuti bantu bacita zibotu baunka kujulu mpoonya bacita zibi balapenzyegwa mumulilo wahelo. a

 Sena muzeezo ooyu uliluzi? Peepe.

 Njiisyo yamulilo wahelo tayeendelani ancoliyiisya Bbaibbele kujatikizya ciimo cabafwide. Mucikozyanyo, Bbaibbele talyaambi kuti bantu boonse bacita zibotu ciindi bafwa, baunka kujulu kuyoopona buumi bukkomanisya naa kuti aabo bacita zibi balapenzyegwa mumulilo wahelo. Muciindi caboobo, cakusalazya lyaamba kuti: “Baumi balizyi kuti bayoofwa, pele bafwide tabazyi cintu nociba comwe.”—Mukambausi 9:5.

 Caano eeci citondezya kuti bukkale bwatubunga twabantu tobilo bwakali kuyoocinca kapati.

 Mwaalumi muvwubi kulibonya kuti wakali kwiiminina basololi bazikombelo ba Juda “ibakali kuyandisisya mali.” (Luka 16:14) Bakali kuswiilila ciindi Jesu naakali kwaambaula, pele bakaukaka mulumbe wakwe. Basololi bazikombelo aaba bakali kubanyansya bantu-bantu buyo.—Johane 7:49.

 Lazaro wakali kwiiminina bantu-bantu buyo ibakautambula mulumbe wa Jesu alimwi ibakali kunyansyigwa abasololi bazikombelo ba Juda.

 Bukkale bwatubunga ootu bwakacinca cakumaninina.

•   Basololi bazikombelo ba Juda bakali kuyeeya kuti bakali kukkomaninwa a Leza. Pele cakaba mbuli kuti bafwa, ciindi Leza naakabakaka antoomwe anzila yabo yabukombi akaambo kakuti tiibakamuzumina Jesu. Kuyungizya waawo, bakapenga mumizeezo akaambo kamulumbe Jesu abasikumutobela ngobakakambauka.—Matayo 23:29, 30; Milimo 5:29-33.

•   Bantu-bantu buyo—ibatakali kubikkilwa maano naaceya abasololi bazikombelo—mbambabo bakakkomaninwa. Banji bakautambula mulumbe wamu Magwalo Jesu ngwaakayiisya alimwi bakagwasyigwa anguwo. Aboobo, lino eeci cakabapa coolwe cakukkomaninwa a Leza mane kukabe kutamani.—Johane 17:3.