Kwaciindi cilamfwu, bamadokota baandula balwazi bali kuyandaula gulu uukonzya kubelesyegwa ciindi cakwaandula anobasilika zilonda. Magulu aabelesyegwa lino taakonzyi kubelesyegwa mumubili. Nkaambo alakola, alayuma, alimwi taajatilili kuzintu zitete. Kwiinda mukwiiya mamina aazwa kunkumba iitegwa slug, basayaansi bajana nzila mbobakonzya kumana mapenzi aaya.

Amulange-lange: Ikuti nkumba eeyi yayoowa, ilazwa mamina aanamatila kutegwa inamatile kutewo litete. Kucita boobo kulaikwabilila, alimwi kupa kuti ikkale mubusena bomwe pele kaikonzya kunyanyaala.

Basikuvwuntauzya bakajana twaambo ituli mbotubede itupa kuti mamina ngoizwa abe gulu uulaanguzu kapati kwiinda wakupanga. Mucikozyanyo, mamina aayo abelesya nzila iitegwa chemical bonding a electrostatic attraction. Alanjila mukati kacintu nkoiyanda kunamatila alimwi akulandamuka ikuti yakwelwa. Kwiinda mukupanga gulu uubeleka mbuli mamamina aankumba eeyi, basikuvwuntauzya bapanga gulu uulaanguzu kwiinda yooyo uubelesyegwa mubusilisi lino alimwi uukonzya kunamatila kuzizo zyabulowa. Kwaambwa kuti ulakonzya kubelesyegwa kunamatika “mbubwenya mbuli cartilage mboinamatila kumafwuwa.”

Basyaazibwene basyoma kuti gulu ooyu, ambweni uyooba akati kazibelesyo dokota waandula nzyakonzya kubelesya, muciindi cakubelesya ntali naa kkotoni. Ulakonzya kubelesyegwa kubamba ma cartilage naa kunamatika tubulo aawo mpotuyandika kubikkwa mumubili wamuntu. Kusola ikwakacitwa kwasinizya kale kuti gulu ooyu ulakonzya kusinka kapulo mumoyo wangulube akusinka tupulo mumini yambeba.

Nzila zigwasya kapati kumapenzi aavwula kujanika, kanji-kanji basayaansi balazijana kwiinda mukwiiya kuzilengwaleza. Ba Donald Ingber bapati-pati kucikolo cipanga magulu bakaamba kuti: “Iciyandika buyo, nkuzyiba nkomukonzya kujana muzeezo mubotu.”

Ino muyeeya buti? Sena gulu wankumba iitegwa slug wakasanduka buya naa wakalengwa buya?