1. Husat i wokim olgeta samting i gat laip?

PROFET Jeremaia i tok: “Bikpela, yu God tru. Yu God bilong i stap oltaim.” (Jeremaia 10:10) God Jehova em i Man Bilong Wokim olgeta samting i gat laip. Ol lain bilong heven i tokim em: “Yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” (KTH 4:11) Long wanpela singsing bilong litimapim nem bilong God, King Devit i tok: “Yu as tru bilong laip bilong olgeta samting.” (Song 36:9) Olsem na laip em i presen i kam long God.

2. God i save mekim wanem bilong lukautim laip bilong yumi?

² Jehova i save lukautim tu laip bilong yumi. (Aposel 17:28) Em i givim yumi kaikai yumi save kisim, wara yumi save dring, win yumi save pulim, na graun yumi stap long en. (Aposel 14:​15-17) Jehova i bin mekim ol dispela samting long rot i helpim yumi long i stap amamas. Tasol bilong stap amamas tru, yumi mas kisim save long ol lo bilong God na bihainim.​—Aisaia 48:​17, 18.

3. God i ting olsem wanem long Kein i kilim i dai Abel?

³ God i laik bai yumi tingim laip i bikpela samting​—laip bilong yumi yet na bilong ol narapela man. Long taim bilong Adam tupela Iv, pikinini man bilong ol, Kein, em i belhat tru long liklik brata bilong em, Abel. Jehova i mekim tok lukaut  long Kein olsem belhat bilong em inap kirapim em long mekim bikpela rong. Kein i no putim yau long dispela tok lukaut. Em “i paitim brata bilong em na kilim em i dai.” (Stat 4:​3-8) Jehova i givim strafe long Kein long em i bin kilim i dai brata bilong em.​—Stat 4:​9-11.

4. Long Lo Bilong Moses, olsem wanem God i kamapim klia stretpela tingting long laip?

⁴ Sampela tausen yia bihain, Jehova i givim ol lo long lain Israel bilong helpim ol long mekim wok bilong em long pasin em i orait long en. God i givim ol dispela lo long rot bilong profet Moses, olsem na sampela taim ol i save kolim dispela lo olsem Lo Bilong Moses. Wanpela hap bilong Lo Bilong Moses i tok: “Yupela i no ken kilim i dai ol arapela manmeri.” (Lo 5:17) Dispela i soim lain Israel olsem laip bilong man i bikpela samting long God na ol i mas tingim tru laip bilong ol narapela.

5. Yumi mas i gat wanem tingting long pasin bilong rausim bel?

⁵ Olsem wanem long laip bilong bebi i no kamap yet? Lo Bilong Moses i tok, i no stret long bagarapim laip bilong bebi i stap yet long bel bilong mama. Tru tumas, Jehova i save tingim tru laip bilong bebi i stap yet long bel. (Kisim Bek 21:​22, 23, NW; Song 127:3) Dispela i makim olsem pasin bilong rausim bel i no stret.

6. Bilong wanem yumi no ken birua long ol narapela man?

⁶ Pasin bilong tingim laip i bikpela samting i makim tu olsem yumi gat stretpela tingting long ol narapela man. Baibel i tok: “Man i no laikim tru brata bilong en na i bel nogut long em, i olsem em i kilim man i dai. Na yupela i save, man i kilim narapela man i dai, em i no kisim laip bilong i stap gut oltaim oltaim.” (1 Jon 3:15) Sapos yumi laik kisim laip oltaim, yumi mas rausim pasin bilong birua long narapela man, long wanem, planti taim pasin birua i as bilong pasin bilong pait na bagarapim man. (1 Jon 3:​11, 12) Em i bikpela samting long yumi lain long laikim tru ol narapela.

7. Wanem sampela pasin i soim olsem man i no tingim laip?

⁷ Olsem wanem long pasin bilong tingim laip bilong yumi yet? Ol man i no laik i dai, tasol sampela i painim ol amamas em laip bilong ol inap lus long en. Olsem: Planti ol i save smok,  kaikai buai, o kisim mariwana samting. Ol kain samting olsem i save bagarapim bodi na kilim i dai planti man husat i save kisim ol dispela samting. Man i gat pasin bilong kisim ol dispela samting i no ting laip em i samting holi. Ol dispela pasin i doti long ai bilong God. (Rom 6:19; 12:1; 2 Korin 7:1) Bilong mekim wok bilong God long pasin em i laikim, yumi mas lusim ol dispela kain pasin. Tru, ating i hatwok long mekim olsem, tasol Jehova bai helpim yumi. Em i save tingim tru ol samting yumi mekim bilong soim olsem laip bilong yumi em i wanpela gutpela presen i kam long em.

8. Bilong wanem yumi mas was gut, nogut bagarap i painim yumi o narapela man?

⁸ Sapos yumi tingim laip i bikpela samting, bai yumi was gut, nogut bagarap i painim yumi. Bai yumi no mekim nating nating ol samting na bai yumi no painim ol amamas yumi inap kisim bagarap long en. Bai yumi no mekim nabaut na spit taim yumi draivim ka na insait long ol spot i gat pasin pait long en o man inap kisim bagarap long en. (Sindaun 3:31) Lo God i bin givim long lain Israel bilong bipo i tok: “Taim yupela i wokim nupela haus [rup bilong en i flet], orait yupela i mas wokim wanpela liklik banis long arere bilong rup. Olsem na sapos wanpela man i kapsait na i pundaun long graun na i dai bai yupela i no gat asua.” (Lo 22:8) Olsem stiatok bilong dispela lo i kamapim, lukautim gut ol lata o step bilong haus bambai man i no inap pundaun long en na kisim bagarap. Sapos yu gat ka, stretim gut ka na em i seif long draiv. No ken larim ol samting bilong haus o bilong ka bilong yu i mekim na nau yu yet o ol narapela inap kisim bagarap.

9. Sapos yumi tingim laip i bikpela samting, bai yumi mekim wanem kain pasin long ol animal?

⁹ Olsem wanem long laip bilong animal? Em tu i holi long Man Bilong Wokim olgeta samting. God i larim man i kilim i dai ol animal bilong kisim kaikai na klos o long taim animal i laik bagarapim man. (Stat 3:21; 9:3; Kisim Bek 21:28) Tasol pasin bilong mekim nogut long ol animal o kilim ol i dai bilong kisim amamas tasol em i no stret na i soim olsem man i no ting laip em i samting holi.​—Sindaun 12:10.

10. Olsem wanem God i bin soim olsem laip na blut i poroman wantaim?

¹⁰ Bihain long Kein i kilim i dai brata bilong em, Abel, Jehova i tokim Kein: “Blut bilong brata bilong yu i kapsait pinis long graun, na mi harim dispela blut i krai long mi.” (Stat 4:10) Taim God i toktok long blut bilong Abel, em i toktok long laip bilong Abel. Kein i bin pinisim laip bilong Abel, olsem na nau Kein i mas kisim strafe. I olsem blut, o laip, bilong Abel i krai long Jehova long em i mas bekim dispela rong. Bihain long Bikpela Tait long taim bilong Noa, God i kamapim klia gen olsem laip na blut i poroman wantaim. Paslain long Bikpela Tait, ol man i kaikai ol prut, kumu, pikinini wit, na pinat samting. Tasol bihain long Bikpela Tait, Jehova i tokim Noa na ol pikinini man bilong em: “Yupela i ken kaikai olgeta abus na ol samting i save wokabaut long graun na ol kain kain sayor. Mi givim olgeta olsem kaikai bilong yupela.” Tasol God i putim dispela tambu: “Wanpela samting tasol yupela i no ken kaikai, em mit i gat blut i stap yet long en, long wanem, blut em i as bilong laip.” (Stat 1:29; 9:​3, 4) Tru tumas, long ai bilong Jehova laip na blut i poroman wantaim.

11. Kirap long taim bilong Noa, God i tambuim ol man long mekim wanem long blut?

¹¹ Yumi no kaikai blut na long dispela rot yumi soim olsem yumi tingim blut i bikpela samting. Long Lo Jehova i givim long lain Israel, em i tok: “Sapos wanpela man . . . i go painim abus, na em i sutim wanpela wel meme samting o wanpela pisin mi no bin tambuim yupela long kaikai, orait em i mas kapsaitim blut bilong dispela samting na karamapim dispela blut long graun. . . . Mi tokim yupela ol manmeri bilong Israel long yupela i no ken kaikai mit i gat blut i stap yet long en.” (Wok Pris 17:​13, 14) Inap 800 yia paslain long dispela, God i bin tokim Noa olsem no ken kaikai blut bilong ol animal, na dispela lo i stap yet. Tingting bilong Jehova i klia: Ol wokman bilong em ol i ken kaikai mit bilong animal, tasol ol i no ken kaikai blut bilong en. Ol i mas kapsaitim blut i go long graun​—kain olsem ol i givim laip bilong dispela animal i go bek long God.

12. Long rot bilong holi spirit God i givim wanem lo bilong blut long taim bilong ol aposel na dispela lo i stap yet long nau?

 ¹² Ol Kristen i mas bihainim wankain lo. Ol aposel na ol arapela man i go pas long lukautim ol lain i bilip long Jisas long taim bilong ol aposel, ol i bung wantaim bilong pasim tok long wanem ol lo olgeta insait long kongrigesen Kristen i mas bihainim. Ol i pasim dispela tok: “Holi Spirit i stap wantaim mipela na mipela i pasim tok olsem, mipela i no laik putim planti hevi long yupela. Olsem na yupela i mas bihainim ol dispela pasin tasol. Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, olsem na yupela i no ken kaikai abus ol man i bin pasim nek bilong en na kilim i dai [larim blut i stap insait long mit]. Na yupela i mas abrusim olkain pasin pamuk.” (Aposel 15:​28, 29; 21:25) Olsem na yumi mas abrusim blut. Long ai bilong God dispela em i bikpela samting, wankain olsem em i bikpela samting long abrusim pasin pamuk na pasin bilong lotuim god giaman.

13. Kamapim tok piksa i soim olsem pasin bilong abrusim blut i makim tu olsem yumi no ken kisim blut long haus sik.

¹³ Olsem wanem? Dispela lo bilong abrusim blut i makim olsem yumi no ken kisim blut long haus sik? Yes, em i makim dispela tu. Olsem: Tingim olsem dokta i tokim yu olsem yu mas abrusim ol dring i gat alkohol long en. Yu ting dispela i makim olsem yu no ken dring alkohol long maus, tasol yu ken kisim alkohol long rot bilong sut? Nogat! Na olsem tasol, pasin bilong abrusim blut i makim olsem yumi no ken kaikai blut o kisim blut long narapela rot. Olsem na dispela lo bilong abrusim blut i makim olsem yumi no larim wanpela man i putim blut insait long ol rop bilong blut bilong yumi.

14, 15. Sapos ol dokta i tok Kristen i mas kisim blut, em bai mekim wanem? Bilong wanem em bai mekim olsem?

¹⁴ Tasol olsem wanem sapos Kristen i kisim bikpela bagarap long skin o ol dokta i mas mekim bikpela operesen long em? Ol dokta inap tok em i mas kisim blut, nogut em bai dai. Tru, Kristen hia i no laik dai. Bilong lukautim laip em God i bin givim olsem gutpela presen, em bai orait long kisim ol narapela marasin samting i no brukim lo bilong blut. Olsem na em bai  painim rot bilong kisim ol dispela kain marasin, sapos i stap, na kisim ol marasin samting i olsem senis bilong blut.

¹⁵ Olsem wanem? Kristen bai brukim lo bilong God na em i ken i stap laip longpela taim moa long dispela taim nau? Jisas i tok: “Sapos wanpela man i laik holimpas laip bilong em yet, laip bilong en bai i lus. Tasol sapos wanpela man i ting long mi na i lusim laip bilong en, em bai i kisim laip bilong en.” (Matyu 16:25) Yumi no laik dai. Tasol sapos yumi traim long lukautim laip bilong yumi long nau long rot bilong brukim lo bilong God, yumi inap lus long kisim laip oltaim long bihain. Olsem na yumi bihainim savetingting taim yumi bilip olsem lo bilong God i stret, na sapos yumi dai, yumi bilip olsem Man Bilong Givim Laip bai tingim yumi long taim bilong kirap bek na givim yumi laip em gutpela presen tru.​—Jon 5:​28, 29; Hibru 11:6.

16. Ol wokman bilong God i strong olsem wanem long sakim blut?

¹⁶ Ol gutpela wokman bilong God long nau ol i strong long bihainim lo bilong em long blut. Ol bai no kaikai blut. Na ol bai no kisim blut bilong stretim sik. * Ol i save Man Bilong Wokim blut em i save wanem samting bai helpim ol tru. Olsem wanem? Yu bilip olsem em i save long dispela?

17. Long Israel bilong bipo, God Jehova i orait long wanem wanpela rot tasol bilong yusim blut?

¹⁷ Lo Bilong Moses i kamapim klia dispela wanpela stretpela  rot tasol bilong yusim blut. Jehova i makim pasin bilong mekim lotu em ol Israel bilong bipo i mas bihainim, em i tok: “Blut i save givim laip long olgeta man na animal. Olsem na mi tokim yupela olsem. Pris i mas kapsaitim blut bilong ofa long alta, bilong rausim ol sin bilong yupela manmeri. Blut tasol i as bilong laip, na blut tasol i save rausim sin bilong yupela ol manmeri.” (Wok Pris 17:11) Taim ol Israel i mekim sin, God inap lusim rong bilong ol taim ol i ofaim wanpela animal na kapsaitim sampela blut bilong en long alta long haus lotu sel o long tempel bilong God i kamap long bihain. Ol dispela ofa tasol i stretpela rot bilong yusim blut.

18. Wanem ol blesing yumi inap kisim long rot bilong blut bilong Jisas i bin kapsait?

¹⁸ Ol trupela Kristen i no aninit long Lo Bilong Moses, olsem na ol i no ofaim ol animal na putim blut bilong animal long alta. (Hibru 10:1) Tasol pasin bilong yusim blut long alta long taim bilong Israel bilong bipo em i piksa i makim gutpela ofa  bilong Pikinini Bilong God, Jisas Krais. Olsem yumi lainim long Sapta 5 bilong dispela buk, Jisas i givim laip bilong em bilong helpim yumi taim em i larim blut bilong em i kapsait olsem ofa. Bihain em i go antap long heven na long dispela wanpela taim tasol em i givim pe bilong blut bilong em long God. (Hibru 9:​11, 12) Dispela em i as na God i ken lusim ol sin bilong yumi na i opim rot long yumi ken kisim laip oltaim. (Matyu 20:28; Jon 3:16) Wok bilong dispela blut i bikpela samting tru! (1 Pita 1:​18, 19) Sapos yumi bilip long blut bilong Jisas i bin kapsait, long dispela rot tasol yumi inap kisim laip.

19. Yumi mas mekim wanem na bai yumi no gat asua long blut bilong ol man?

¹⁹ Yumi ken tenkyu tru long God Jehova long em i bin givim laip long yumi! Na dispela i mas kirapim yumi long tokim ol narapela man long ol i ken kisim laip oltaim long rot bilong bilip long ofa bilong Jisas. Pasin bilong tingim tru laip bilong ol narapela man bai kirapim yumi long amamas na givim bel long mekim dispela wok. (Esekiel 3:​17-21) Sapos yumi wok strong long mekim dispela wok, yumi inap mekim wankain tok olsem aposel Pol i bin mekim: “Sapos wanpela namel long yupela em i lus, dispela em i no asua bilong mi, long wanem, mi no bin surik long autim olgeta tingting bilong God long yupela.” (Aposel 20:​26, 27) Wok bilong autim tok bilong God na ol samting em bai mekim i wanpela gutpela rot tru bilong soim olsem yumi tingim tru laip na blut.