Kirap long taim Jisas i kisim baptais, planti man i save long em. Planti tausen Juda i bin lukim ol mirakel bilong em, na stori bilong ol samting em i mekim i go long planti hap. Na nau long Bikpela De Bilong Ol Haus Lotu Sel o Haus Win long Jerusalem, planti manmeri i wok long painim Jisas.

Ol man i gat kain kain tingting long Jisas. Sampela i tok: “Em i wanpela gutpela man.” Tasol ol narapela i tok: “Nogat, em i save giamanim ol manmeri.” (Jon 7:12) Planti i mekim ol dispela toktok namel long ol yet long kirap bilong dispela bikpela bung. Tasol i no gat wanpela i strongim bel na tokaut long ples klia long helpim Jisas, bikos planti manmeri i pret long samting ol hetman bilong lotu Juda bai mekim.

Bikpela bung i kirap pinis, na Jisas i go kamap long tempel. Planti manmeri i kirap nogut long pasin bilong em long skulim gut ol man. Em i no bin go long wanpela skul bilong ol tisa bilong lotu Juda, olsem na ol Juda i tingting olsem: “Olsem wanem na dispela man i gat ol dispela save? Em i no bin go long ol skul bilong lotu.”—Jon 7:15.

Jisas i tok: “Tok mi skulim ol man long en i no bilong mi, em bilong man i salim mi i kam. Sapos wanpela man i laik bihainim laik bilong Em, dispela man bai save olsem tok mi skulim ol man long en i kam long God o i kam long tingting bilong mi yet.” (Jon 7:16, 17) Ol tok Jisas i skulim ol man long en i stret wantaim ol Lo Bilong God, olsem na i klia tru olsem em i laik givim glori long God, na em yet nogat.

Bihain Jisas i tok: “Moses i givim Lo long yupela. Tasol i no gat wanpela bilong yupela i save bihainim Lo. Bilong wanem yupela i painim rot long kilim mi i dai?” Sampela manmeri namel long dispela bikpela lain i bung, ol i kam long ol ples i stap ausait long taun, so ol i no save olsem ol man i laik kilim Jisas i dai. Na ol i no ting wanpela inap kisim tingting long kilim wanpela gutpela tisa olsem Jisas. Olsem na ol i ting, tingting bilong Jisas i paul na em i mekim dispela tok. Na ol i tokim em: “Spirit nogut i stap long yu. Husat i painim rot long kilim yu i dai?”—Jon 7:19, 20.

Tasol inap 1 na hap yia i go pinis, ol hetman bilong lotu Juda i laik kilim Jisas i dai, bikos em i bin oraitim wanpela man long de Sabat. Olsem na Jisas i kamapim wanpela tok we i kirapim ol long skelim gut tingting bilong ol, na long dispela rot em i soim long ples klia tingting kranki bilong ol. Em i kolim samting ol i save mekim olsem Lo i makim, ol i mas katim skin bilong wanpela bebi boi long namba 8 de, maski sapos dispela de i de Sabat. Na bihain em i tok: “Yupela i save katim skin bilong man long de sabat bai yupela i no ken brukim lo bilong Moses, orait bilong wanem yupela i belhat long mi bin mekim man i kamap orait long sabat? Yupela i mas lusim pasin bilong skelim samting long ai. Yupela i mas skelim samting long pasin i stret.”—Jon 7:23, 24.

Ol manmeri bilong Jerusalem i save long dispela samting i bin kamap, na ol i tok: “Em dispela man ol [hetman] i painim rot long kilim i dai, a? Tasol lukim! em i toktok long ples klia na ol i no mekim wanpela tok long em. Ating ol hetman i save pinis olsem dispela man em i Krais?” Orait wai na ol manmeri i no bilip olsem Jisas em i Krais? Ol i tok: “Yumi save dispela man i bilong wanem hap, tasol taim Krais i kam, i no gat man bai save em i bilong wanem hap.”—Jon 7: 25-27.

Jisas i stap long tempel, na em i bekim tok bilong ol: “Yupela i save long mi na yupela i save long wanem hap mi kam long en. Na tu, mi no kam long tingting bilong mi yet, nogat. Man i salim mi i kam, em i stap tru na yupela i no save long em. Mi save long em, long wanem, mi mausman bilong em, na dispela Man i bin salim mi i kam.” (Jon 7:28, 29) Taim ol man i harim dispela tok Jisas i mekim, ol i traim long holim em, bilong kalabusim em o bilong kilim em i dai. Tasol ol samting ol man i traim long mekim i no kamap bikos em i no taim yet bilong Jisas long i dai.

Maski i olsem, planti manmeri i bilip long Jisas, na i stret ol i mekim olsem. Long wanem, em i bin  wokabaut antap long wara, mekim i dai strongpela win, em i kisim sampela bret na pis na givim kaikai long planti tausen manmeri long rot bilong mirakel, oraitim ol sik, helpim ol lek nogut long wokabaut, opim ai bilong ol aipas, oraitim ol man i gat sik lepra, na kirapim bek ol man i dai pinis. Yes, i gat gutpela risen na ol i askim: “Taim Krais i kam, ating em bai wokim planti mirakel moa winim ol mirakel dispela man i wokim, a?”—Jon 7:31.

Taim ol Farisi i harim ol manmeri i mekim ol dispela tok, ol yet wantaim ol bikpris i salim ol ofisa i go bilong arestim Jisas.