Stretim pikinini inap makim yu stiaim o skulim pikinini. Dispela i makim olsem yu stretim pikinini long pasin kranki bilong em. Tasol planti taim, yu skulim pikinini long bihainim stretpela pasin na bai em i skul long mekim ol gutpela disisen.

Long ol yia i go pinis, sampela papamama i no stretim moa ol pikinini, ol i pret olsem dispela inap mekim na ol pikinini i ting ol i no inap long mekim wanpela gutpela wok. Tasol papamama i gat savetingting i putim ol lo i stret na trenim pikinini long bihainim.

“I mas i gat man i tokim ol pikinini long samting ol i ken mekim na samting ol i no ken mekim, na dispela bai helpim ol taim ol i kamap bikpela. Sapos i no gat man i stretim ol, ol bai olsem sip i ron na i no save long hap em bai go—i no longtaim ol bai i no bihainim rot stret na mekim ol disisen nogut na dispela bai kamapim hevi.”—Pamela.

Mekim oltaim. Sapos pikinini i no bihainim ol lo yu putim, yu mas givim sampela panismen. Tasol taim em i bihainim ol lo, oltaim redi long tok amamas long em.

“Planti taim mi tok amamas long ol pikinini long ol i bihainim tok long dispela taim i hatwok long ol man i mekim dispela pasin. Pasin bilong tok amamas bai mekim na i no hatwok long ol i kisim tok bilong stretim ol taim ol i mas kisim helpim.”—Christine.

STIATOK BILONG BAIBEL: “Samting man i planim, dispela samting tasol em bai kamautim.”—Galesia 6:7.

Bihainim stretpela pasin. Taim yu stretim pikinini, tingim krismas na save bilong em, na hevi i kamap long pasin em i mekim. Taim panismen i stret wantaim rong pikinini i mekim, dispela bai helpim em—sapos pikinini i no mekim gutpela wok long fon, orait papamama inap kisim fon na em i no yusim inap sampela haptaim. Long wankain taim, abrusim pasin bilong kros long ol liklik samting na mekim olsem bikpela hevi.

“Mi traim long skelim sapos pikinini bilong mi i sakim tok bikos em i laik mekim olsem o em i popaia taim em i skelim samting em bai mekim. Pasin kranki pikinini i bihainim inap longpela taim na em i mas lusim i narapela kain long taim pikinini i popaia na yu mas tokaut olsem samting em i mekim i no stret.”—Wendell.

STIATOK BILONG BAIBEL: “No ken sikirapim bel bilong ol pikinini bilong yupela, nogut bel bilong ol i bagarap.”—Kolosi 3:21.

Kamapim pasin laikim. Em isi long pikinini i kisim tok bilong stretim em taim em i save olsem namba 1 risen em papamama i laikim em.

“Taim pikinini man bilong mipela i popaia, mipela i tokim em olsem mipela i amamas long olgeta gutpela disisen bilong em long bipo. Mipela i tokim em olsem popaia em i mekim i no inap bagarapim gutnem bilong em sapos em i bihainim tok bilong stretim em, na mipela i stap bilong helpim em long mekim olsem.”—Daniel.

STIATOK BILONG BAIBEL: “Man i gat pasin laikim em i no save les kwik, na em i save mekim gutpela pasin.”—1 Korin 13:4.