Michelle: Long nau mi wok long givim dispela liklik nius long olgeta man long dispela hap. Nem bilong en Yu Laik Save Long Tok i Tru? Dispela em bilong yu.

Sophia: Em samting bilong lotu?

Michelle: Yes. Lukim 6-pela askim i stap long fran pes. Wanem bilong ol dispela askim—

Sophia: Mi no laik yu toktok moa. Nogut yu westim taim bilong yu.

Michelle: Inap mi askim long wanem samting i mekim na yu tok olsem?

Sophia: Bilong tok stret long yu, mi no save mi bilip long God o nogat.

Michelle: Tenkyu long kamapim stret tingting bilong yu. Inap mi askim sapos oltaim yu bin pilim olsem?

Sophia: Nogat, mi kamap bikpela long lotu. Tasol mi lusim lotu longtaim pinis.

Michelle: Sori long harim olsem. Nem bilong mi Michelle na wanem nem bilong yu?

Sophia: Mi Sophia.

Michelle: Mi amamas long bungim yu, Sophia.

Sophia: Mi amamas long bungim yu tu.

Michelle: Sophia, mi no kam bilong subim yu long lotu wantaim mi. Tasol mi laik save. I gat sampela samting i bin kamap na dispela i mekim na yu no bilip long God?

Sophia: Yes. Mama bilong mi i bin insait long wanpela kar eksiden 17 yia i go pinis.

Michelle: Mi sori tru long harim olsem. Em i kisim sampela bagarap?

Sophia: Yes, kirap long dispela taim i kam inap long nau em i paralais.

Michelle: Sori tru long dispela samting. Ating dispela i mekim yu bel hevi, a?

Sophia: Mi bel hevi tru. Em as na mi tingting, sapos God i stap wai na em i larim dispela samting i kamap? Wai na God i larim yumi karim kain hevi olsem?

Michelle: I no gat rong long pilim olsem na kamapim kain askim olsem. Taim yumi karim pen na hevi em nomol long kisim dispela tingting olsem wai. Sampela bilip man na meri long taim bilong ol man i bin raitim Baibel i bin i gat wankain tingting!

Sophia: Tru, a?

Michelle: Yes. Em orait long mi soim yu wanpela eksampel long Baibel?

Sophia: Em orait.

Michelle: Tingim samting em profet Habakuk i bin askim God long en olsem i stap long Habakuk sapta 1, ves 2 na 3: “Bikpela, planti taim mi singaut long yu. Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela? Mi lukim planti hevi i kamap long ol manmeri. Bilong wanem yu larim ol dispela hevi i kamap?” Yu ting ol dispela askim i wankain long ol askim yu bin kamapim?

Sophia: Yeh. Ol i wankain.

Michelle: God i no bin kros long Habakuk i kamapim ol dispela askim, na tu, God i no tokim em olsem em i mas mekim bilip bilong em i kamap strong moa.

Sophia: Man! Mi kirap nogut long dispela.

Michelle: Baibel i skulim yumi olsem God i luksave long ol pen na hevi bilong yumi na em i tingim dispela samting.

 Sophia: Yu minim wanem?

Michelle: Mi laik soim yu long tok i stap long Kisim Bek 3:7. Inap yu ritim dispela ves?

Sophia: OK. Em i tok: “Na Bikpela i tokim em olsem, ‘Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i karim.’”

Michelle: Tenkyu. Olsem dispela ves i tok, yu ting God i luksave long ol pen na hevi ol manmeri bilong em i karim?

Sophia: Yes, i luk olsem em i luksave.

Michelle: God i save long olgeta samting i kamap. Lukim gen laspela hap bilong ves. God i tok: “Mi save tru long pen na hevi ol i karim.” Yu ting dispela em tok bilong wanpela God husat i stap longwe na i no save tingim yumi?

Sophia: Nogat.

Michelle: Tru, God i luksave long ol hevi bilong yumi, tasol i no dispela tasol, em i save wari long yumi taim yumi gat hevi.

Sophia: Em tru.

Michelle: Yumi ken ritim narapela stori we ol manmeri bilong God i bin karim pen na hevi. Em i stap long Aisaia 63:9. Namba 1 hap bilong dispela ves i tok: “Long taim ol i karim pen na hevi, Bikpela tu i bin karim pen na hevi wantaim ol.” Ol manmeri bilong God i karim pen na hevi, na yu ting dispela i mekim sampela samting long God?

Sophia: Yeh, i luk olsem skripsa i tok olsem.

Michelle: Sophia, samting tru em olsem, God i tingim tru yumi na em i no laik lukim yumi karim pen na hevi. Taim yumi bel hevi em tu i save pilim bel hevi bilong yumi.

Michelle: Paslain long mi lusim yu mi laik soim yu narapela tok bilong Baibel.

Sophia: Em orait.

Michelle: Tingim tok Baibel i mekim long strong bilong God. Dispela skripsa mi laik soim yu em Jeremaia 10:12. Inap yu ritim?

Sophia: Em orait. Em i tok: “Long gutpela tingting na save bilong en, Bikpela i bin wokim graun na skai. Em i bin wokim olgeta samting long strong na save bilong em yet.”

Michelle: Tenkyu. Yumi ken skelim dispela ves pastaim. Ating bai yu wanbel long dispela tok olsem God i gat bikpela strong na em i bin wokim yunives na olgeta narapela samting, a?

Sophia: Yeh, mi wanbel long dispela tok.

Michelle: Orait, sapos God i gat strong long wokim olgeta samting long graun, ating em i gat strong tu long kontrolim olgeta samting em i wokim, a?

Sophia: Yes, em stret.

Michelle: Tingim gen mama bilong yu. Bilong wanem yu bel hevi long lukim em i karim pen na hevi?

Sophia: Bikos mi laikim em. Em mama bilong mi.

Michelle: Na sapos yu gat strong bilong mekim em i kamap orait, bai yu mekim?

Sophia: Yes. Bai mi mekim.

Michelle: Tingim dispela samting. Baibel i skulim yumi olsem God i save long ol pen na hevi yumi karim, em i pilim tru ol hevi bilong yumi, na tu, em i gat bikpela strong. Tingim olsem wanem em i kontrolim strong bilong em yet na bai em i no ken hariap long pinisim ol pen na hevi bilong yumi.

Sophia: Mi no bin kisim kain tingting olsem bipo.

Michelle: Olsem wanem? I gat sampela gutpela risen na em i no pinisim ol hevi bilong yumi? *

Sophia: Hmm, ating i mas i gat sampela risen.

Michelle: Mi harim telefon bilong yu i ring, olsem na bai mi kam bek narapela taim na yumi ken stori moa long dispela samting.

Sophia: Tenkyu. Yu ken mekim olsem. *