Bekim Ol Askim Bilong Baibel
Olgeta lotu i save givim biknem long God?
Taim yu harim nius long redio o ritim niuspepa samting, ating yu luksave olsem sampela taim ol man i yusim nem bilong lotu long mekim ol pasin we i no stret. Tasol God i no as bilong olgeta lotu. (Matyu 7:15) Satan i giamanim klostu olgeta manmeri.—Ritim 1 Jon 5:19.
Tasol God i tingim ol man husat i laikim onest pasin na gutpela pasin. (Jon 4:23) God i singautim ol dispela man long kisim save long tok i tru long Baibel.—Ritim 1 Timoti 2:3-5.
Olsem wanem yu inap luksave long lotu i tru?
God Jehova i bungim olgeta manmeri bilong narapela narapela lotu long rot bilong skulim ol long tok i tru na skulim ol long pasin laikim. (Maika 4:2, 3) Olsem na yu inap luksave olsem ol man bilong lotu i tru i save tingim tru ol narapela.—Ritim Jon 13:35.
God Jehova i bungim olgeta kain man long rot bilong lotu i tru.—Song 133:1
Baibel i as bilong bilip bilong ol manmeri i lotu tru, na tu, Baibel i stiaim ol pasin ol i bihainim. (2 Timoti 3:16) Na ol i save givim biknem long God. (Song 83:18) Na tu, ol i tokaut olsem Kingdom Bilong God tasol inap helpim olgeta manmeri. (Daniel 2:44) Ol i bihainim pasin bilong Jisas taim ol i mekim gutpela pasin long ol narapela, na long dispela rot ol i larim ‘lait bilong ol i stap ples klia.’ (Matyu 5:16) Yu inap luksave long ol Kristen tru, ol i save go long haus bilong ol man na autim tok long Kingdom Bilong God.—Ritim Matyu 24:14; Aposel 5:42; 20:20.
