Long Me 23, 2023, wanpela helt ofisial long Amerika i givim tok lukaut long ol manmeri olsem sosel midia i wok long bagarapim planti yangpela.

•   “Em tru olsem sosel midia i gat sampela gutpela samting long en we inap helpim sampela pikinini na ol tineja, tasol planti evidens i soim olsem sosel midia i ken mekim na ol pikinini na ol tineja i kisim sik bilong tingting na sik long bodi tu.”​—Social Media and Youth Mental Health: The U.S. Surgeon General’s Advisory, 2023.

 Dispela ripot i stori long ol wok painimaut i kamapim ol risen na yumi mas save long dispela.

•   Ol tineja em krismas bilong ol i namel long 12 na 15 em “ol i save lusim winim 3-pela aua long olgeta de long yusim sosel midia, planti bilong ol i kisim sik bilong tingting, na tu, ol i soim ol sain bilong sik dipresen na ol i save wari na tingting planti.”

•   Taim ol yangpela i gat 14 krismas “i lusim bikpela haptaim moa long yusim sosel midia, planti bilong ol i no slip gut, ol narapela i buli long ol onlain, ol i no amamas long lukluk bilong ol yet, ol i pilim olsem ol i samting nating, na ol i bel hevi tru. Dispela hevi i painim planti ol gels winim ol bois.”

 Hau ol papamama i ken protekim ol pikinini bilong ol long ol dispela hevi? Baibel i kamapim ol gutpela edvais.

 Mekim disisen bilong ol pikinini. Olsem ol papamama, skelim ol hevi em sosel midia inap kamapim na mekim disisen long pikinini bilong yu bai yusim sosel midia o nogat.

•   Stiatok bilong Baibel: “Trenim gut liklik pikinini long rot em i mas bihainim.”​—Provep 22:6, futnot.

•   Bilong kisim sampela save moa, ritim dispela atikol “Should My Child Use Social Media?”

 Sapos yu orait long pikinini bilong yu i yusim sosel midia, orait luksave long ol hevi inap kamap na save long wanem ol samting em i postim onlain. Hau yu ken mekim olsem?

 Protektim pikinini long ol piksa doti, ol vidio bilong pasin pamuk, na ol tok pilai nogut. Trenim pikinini long em i mas sakim ol piksa doti, ol vidio bilong pasin pamuk, na ol tok pilai nogut i stap onlain.

•   Stiatok bilong Baibel: “Yupela i no ken larim toktok bilong pasin pamuk na olgeta kain pasin i no klin na gridi pasin i kamap namel long yupela. Na tu, i no stret long mekim ol pasin ol man i sem long en o longlong toktok o tok pilai nogut.”​—Efesus 5:3, 4.

•   Bilong save long rot bilong mekim olsem, ritim dispela atikol “Teaching Your Teenager Social Media Safety.”

 Makim taim. Olsem, makim taim na hamas haptaim pikinini bilong yu inap yusim sosel midia.

•   Stiatok bilong Baibel: “Yupela i mas was gut tru long wokabaut bilong yupela. . . . . Yupela i mas wokabaut olsem ol man i gat savetingting. Yupela i mas yusim gut taim.”​—Efesus 5:15, 16.

•   Yusim waitbot katun Sosel Netwok-Bihainim Savetingting bilong helpim pikinini bilong yu long kliagut long risen na i stret long makim taim na hamas haptaim long yusim sosel midia.