XANA na wena u titwa ku fana na Linda, loyi a twisiweke ku vava swinene hi mupfumerikulobye? Khombo ra kona, van’wana va twisiwe ku vava hi swiendlo swa vanhu van’wana lerova swi khumba ndlela leyi va gandzelaka Yehovha ha yona. Xana swi tano ni le ka wena?

I ntiyiso leswaku swi nga hi tikela swinene ku rivalela mupfumerikulorhi loyi a hi twiseke ku vava. Kambe, Vakreste va fanele va rhandzana. (Yohane 13:34, 35) Loko mupfumerikulorhi a hi dyoherile, swi nga hi twisa ku vava swinene swi tlhela swi hi heta matimba.—Pisalema 55:12.

I ntiyiso leswaku Bibele ya pfumela leswaku ku ta va ni nkarhi lowu Vakreste va nga ta va ni “xivangelo xa ku vilerisiwa” hi un’wana. (Vakolosa 3:13) Loko sweswo swi humelela hina hi ku kongoma, swi nga hi tikela ku langutana na swona. Xana ku ni nchumu lowu nga hi pfunaka? Xiya milawu yinharhu ya le Matsalweni:

Tata wa hina wa le tilweni u vona nchumu wun’wana ni wun’wana. Yehovha u vona swilo hinkwaswo leswi humelelaka, ku katsa ni ndlela yihi ni yihi yo biha leyi hi khomiwaka ha yona swin’we ni ku xaniseka. (Vaheveru 4:13) Ku engetela kwalaho, Yehovha u hi twela vusiwana loko hi xaniseka. (Esaya 63:9) A nge pfuki a pfumelele “nhlomulo kumbe maxangu” kumbe nchumu wihi ni wihi—hambi ku ri nandza un’wana wakwe—swi hi “hambanisa ni rirhandzu ra Xikwembu.” (Varhoma 8:35, 38, 39) Xana a hi susumeteleki ku endla hilaha ku fanaka leswaku hi nga pfumeleli nchumu kumbe munhu wihi na wihi leswaku swi hi hambanisa na Yehovha?

Ku rivalela a swi vuli swona leswaku u pfumelelana ni mhaka yo biha leyi u endliweke yona. Loko hi rivalela lava hi dyoheleke, a swi vuli swona leswaku hi pfumelelana ni leswi va hi endleleke swona. Tsundzuka, ku hava ni siku ni rin’we leri Yehovha a nga ta pfumelelana ni xidyoho, kambe wa rivalela loko ku ri ni xivangelo xo endla tano. (Pisalema 103:12, 13; Habakuku 1:13) Loko Yehovha a hi khutaza leswaku hi rivalela van’wana, u va a hi kombela leswaku hi n’wi tekelela. A nga ‘tshami a karihile.’—Pisalema 103:9; Matewu 6:14.

Loko hi tshika xikhomela, ha pfuneka. Hi ndlela yihi? Anakanya hi xifaniso lexi landzelaka. A hi nge u tlakula ribye, leri kumbexana ri tikaka tikhilogiramu ti nga ri tingani. Swi nga ha ku olovela ku ri tlakula swa xinkarhana. Kambe ku vuriwa yini loko u ri tlakula nkarhi wo leha? Xana u ta ri tlakula nkarhi wo tanihi kwihi—timinete ti nga ri tingani? awara? kumbe ku tlula? A swi kanakanisi leswaku voko ra wena ri ta karhala swinene! I ntiyiso leswaku ndlela leyi ribye  ri tikaka ha yona a yi nge cinci. Kambe loko u ya u ri tlakula nkarhi wo leha, ri ta ya ri ku tika swinene. Swi tano ni hi xikhomela. Loko hi va ni xikhomela—hambi ku ri eka mhaka leyi nga nyawuriki—hi ta ya hi tivavisa swinene. Kutani a swi hlamarisi leswi Yehovha a hi khutazaka leswaku hi tshika xikhomela. Hakunene, loko hi tshika xikhomela ha pfuneka.—Swivuriso 11:17.

I yini lexi pfuneke Linda leswaku a nga vi na xikhomela endzhaku ka loko a twisiwe ku vava hi mupfumerikulorhi? U anakanyisise hi Matsalwa lama vulavulaka hi ku rivalela. (Pisalema 130:3, 4) Linda u tsakisiwe ngopfu hi ku tiva leswaku loko hi rivalela, Yehovha na yena u ta hi rivalela. (Vaefesa 4:32–5:2) Malunghana ni ndlela leyi marito wolawo ma n’wi khumbeke ha yona, u ri: “A ndzi vona onge Yehovha u vulavula na mina.”

Hi ku famba ka nkarhi, Linda u tshike ku va ni xikhomela. U rivalele makwerhu yoloye hi ku ntshunxeka naswona sweswi i vanghana lavakulu. Linda u ya emahlweni a tirhela Yehovha. Tiyiseka leswaku Yehovha u lava u endla leswi fanaka.