U Khomelele Eka Leswi A Pfumelaka Eka Swona
Loko Song Hee a ri ni malembe ya 11, mana wakwe u xiye leswaku nhlana wakwe wu govekilenyana. Dokodela u kume leswaku u ni vuvabyi bya ku lamala ka longo (scoliosis). Xiyimo xa Song Hee xi nyanyile lerova a a fanele a endliwa vuhandzuri. Kambe Song Hee a a nga pfumeli ku pomperiwa ngati. Un’wana wa vatsari va “Xalamuka!,” u burisane na yena hi mhaka leyi.
Xana loko u kamberiwile ro sungula, madokodela ma swi kotile ku ku pfuna?
Ku hundze kwalomu ka malembe manharhu ndzi ri karhi ndzi kamberiwa hi madokodela mambirhi kambe ku lamala ka longo ra mina a ku ya ku nyanya. Xiyimo a xi tika swinene lerova longo ra mina a ri sungula ku tshikilela mbilu ni mahahu ndzi nga ha hefemuli kahle. A swi boha leswaku ndzi endliwa vuhandzuri.
Xana u pfumerile ku endliwa vuhandzuri?
Ina. Kambe ndzi byeriwe leswaku vuhandzuri lebyi byi ta tika swinene. Hi nkarhi wolowo, longo ra mina a ri goveke 116 wa tidigri, naswona sweswo swi komba leswaku se a ri vaviseke ngopfu. Emhakeni leyi, ku endliwa vuhandzuri a swi ta ndzi tikela swinene. Hikwalaho ka ripfumelo ra mina leri sekeriweke eBibeleni, a ndzi nga ta pfumela ku pomperiwa ngati. *
Xana u swi kotile ku kuma dokodela loyi a a ta ku endla vuhandzuri?
Mina ni mana wa mina hi kume dokodela loyi a byi tivaka ngopfu vuvabyi lebyi laha hi tshamaka kona eFlorida, U.S.A. Kambe loko ndzi n’wi byela leswaku a ndzi nge pfumeli ku pomperiwa ngati, u vule leswaku a ku na dokodela loyi a nga ndzi endlaka vuhandzuri handle ko pompela ngati. Lexi twisaka ku vava hileswaku u ndzi byele leswaku handle ka vuhandzuri lebyi, swi nga endleka ndzi nga hanyi ku ya fika eka malembe ya 20. A ndzi ri ni malembe 14 hi nkarhi wolowo.
Xana u n’wi hlamuserile leswaku ha yini u nga pfumeli ku pomperiwa ngati?
Ina. Ndzi n’wi byerile leswaku leswi ndzi pfumelaka eka swona swi huma eBibeleni naswona yi vula leswaku eka Xikwembu ngati ya kwetsima ku nga khathariseki leswaku i ya munhu kumbe xiharhi. * Eka Muisrayele nxupulo wa ku dya ngati a ku ri rifu. * Ndzi tlhele ndzi n’wi komba tsalwa ra Mintirho 15:19, 20. Tsalwa leri hi ku komisa ri lerisa Vakreste ri ku: “Papalatani . . . ngati.” Leswi swi vula leswaku ngati a yi fanelanga yi pomperiwa emirini wa munhu hi ndlela yihi kumbe yihi.
Dokodela u te yini?
U ye mahlweni a vula leswaku ndzi fanele ndzi pomperiwa ngati. Lexi ndzi hlamariseke hileswaku xibedlhele xi vule leswaku loko ndzo pfumela ku cheriwa ngati, a va nge ndzi hakerisi ku endla vuhandzuri.
Swoleswo a swi twala ku ri mhaka ya kahle! Xana mi endle yini?
Hambileswi a swi tikomba ku nga ri na dokodela loyi a lavaka ku ndzi endla vuhandzuri handle ko ndzi pompela ngati, mina na manana hi khomelele swi tiya eka leswi hi pfumelaka swona. Xiyimo xi ye xi nyanya swinene. Hi ku ya hi nawu a ndza ha ri n’wana. Hikokwalaho ka leswi xiyimo xa mina a xi ya xi tika, mhaka ya mina yi yisiwe ehubyeni. Lexi tsakisaka hileswaku gqweta ra muganga wa Florida ri hi nyike masiku ya 30 leswaku hi kuma dokodela loyi a nga ta pfumela ku ndzi pfuna handle ko tirhisa ngati.
Xana mi n’wi kumile?
Ina. Komiti yo Vulavurisana ni Swibedlhele ya Timbhoni ta Yehovha ya laha hi tshamaka kona, yi vulavurisane ni dokodela wa le New York loyi a nga ni vutivi hi vuvabyi bya mina naswona u vule leswaku swi nga koteka kutani a a lava ku ndzi vona. Xisweswo hi swi kotile ku kuma dokodela masiku ya 30 ma nga si hela. *
Xana vuhandzuri byi fambe njhani?
Byi fambe kahle swinene. Dokodela Robert M. Bernstein u vekele swinsimbana leswi govekaka hi ku olova leswaku swi tiyisa longo ra mina. U ndzi endle vuhandzuri lebyi hi swiyenge swimbirhi leswi a swi hambane hi mavhiki mambirhi.
Ha yini byi endliwe hi swiyenge swimbirhi?
A endlela leswaku loko eka vuhandzuri byo sungula ndzo tshuka ndzi hume ngati yo tala, miri wa mina a wu ta kuma nkarhi lowu eneleke wo vuyetela tisele to tshuka ta ngati, a nga si endla xiyenge xa vumbirhi xa vuhandzuri. Eka vuhandzuri lebyi habyimbirhi, a ndzi humanga ngati yo tala naswona ndza wu khensa swinene ntlawa wa madokodela hikwalaho ka ntirho wa wona lowunene, ku tiyimisela ni vutshila lebyi wu nga na byona. Ndzi hatle ndzi hlakarhela, ku nga ri na swiphiqo leswi talaka ku va kona loko munhu a pomperiwe ngati. *
Xana dokodela u titwe njhani hi vuhandzuri bya wena?
A a tsakile swinene! U te: “Mhaka ya vutshunguri a hi ku endla vuhandzuri ntsena.” U tlhela a vula leswaku madokodela ma fanele ma swi tekela enhlokweni leswi vavabyi va vona va swi lavaka ku katsa ni leswi va pfumelaka eka swona. Vanhu vo tala handle ka Timbhoni ta Yehovha, va swi tsakela sweswo.
^ ndzim. 7 Mana wa Song Hee i Mbhoni ya Yehovha. Song Hee u pfumela eka leswi mana wakwe a pfumelaka eka swona naswona u khuvuriwe hi 2012 a ri ni malembe ya 16.
^ ndzim. 17 Komiti yo Vulavurisana ni Swibedlhele yi pfuna vavabyi lava nga Timbhoni leswaku va kuma dokodela la nga ta va tshungula handle pomperiwa ngati.
^ ndzim. 21 Eka xihloko xin’wana lexi vulavulaka hi khombo ra ku pomperiwa ka ngati, ndzawulo leyi vuriwaka Clinical Excellence Commission, eNew South Wales (Australia) Health, yi ri: “Loko munhu a pomperiwa ngati, ku va ku nghenisiwa nchumu lowu hanyaka emirini wakwe. Hi ntumbuluko miri wa munhu wu tala ku humesa nchumu wun’wana ni wun’wana lowu nga humiki eka wona. Xisweswo i swa nkoka ku va ni vuxiyaxiya loko swi ta emhakeni leyi.”
Madokodela ma fanele ma swi tekela enhlokweni leswi vavabyi va vona va swi lavaka
U Nga Ha Tsakela
RIHANYO LERINENE
Ku Ala Ku Pomperiwa Ngati Swi Pfuna Vavabyi Lava Nga Timbhoni Leswaku Va Hlatla Va Hlakarhela
Swiviko swi kombisa leswaku vavabyi lava alaka ku pomperiwa ngati va tala ku pona ni ku tshama nkarhi wutsongo exibedlhele.
