Amukela Hi Ntsako U Tlhela U Nyika Hi Mbilu Hinkwayo

YEHOVHA Tata wa hina wa le matilweni wa hi rhandza. Rito ra Xikwembu ri hi byela leswaku xa ma khathalela malandza ya xona hinkwawo. (1 Pet. 5:7) Ndlela yin’wana leyi Yehovha a kombisaka ha yona leswaku wa hi khathalela i ku hi pfuna hi tindlela to hambana-hambana leswaku hi n’wi tirhela hi ku tshembeka. (Esa. 48:17) Ngopfu-ngopfu loko hi langutane ni swiphiqo leswi hi tshikilelaka, Yehovha u lava leswaku hi tirhisa mpfuno lowu a hi nyikaka wona. Nawu wa Muxe wu veka mhaka leyi erivaleni.

Eka Nawu wolowo, Yehovha a a hlele leswaku “la xanisekaka,” tanihi n’wana la nga riki na vatswari, noni ni muluveri va kuma mpfuno. (Lev. 19:9, 10; Det. 14:29) Wa swi tiva leswaku malandza ya yena ma nga ha lava mpfuno lowu humaka eka vagandzeri-kulobye. (Yak. 1:27) Hikokwalaho, malandza yakwe a ma fanelanga ma ala ku pfuniwa hi vanhu lava susumeteriwaka hi Yehovha leswaku va ma pfuna. Hambiswiritano, loko hi pfuniwa hi fanele hi va lava nkhensaka.

Hi nkarhi lowu fanaka, Rito ra Xikwembu ri kandziyisa leswaku vanhu va xona va nga swi kota ku va lava nyikaka. Tsundzuka mhaka ya “noni leyi pfumalaka,” leyi Yesu a yi voneke etempeleni le Yerusalema. (Luka 21:1-4) Swi nga endleka leswaku a yi vuyeriwa swinene eka lunghiselelo leri Yehovha a ri endleleke tinoni, hilaha ri hlamuseriweke hakona eNawini. Hambileswi noni yoleyo a yi pfumala, hi yi tsundzuka hi munyikelo lowu yi wu nyikeleke. Moya wa yona wa ku nyika wu fanele wu endle leswaku yi tsaka hikuva Yesu u vule leswaku “ku nyika swi tisa ntsako lowukulu ku tlula ku amukela.” (Mint. 20:35) Loko u ri karhi u ehleketa hi mhaka leyi, xana u nga endla yini leswaku u ‘hanya hi ku nyika’ xisweswo u kuma ntsako?—Luka 6:38.

“Xana Ndzi Ta Tlherisela Yini Eka Yehovha?”

Mupisalema u vutisile a ku: “Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?” (Ps. 116:12) Xana u vuyeriwe hi yini? Yehovha u n’wi pfunile hi nkarhi wa “maxangu ni gome.” Ku tlula kwalaho, Yehovha u “ponise moya-xiviri wa [yena] eku feni.” Kutani a a lava ku “tlherisela” Yehovha swo karhi. Xana mupisalema a a ta endla yini? U te: “Switshembiso leswi hlambanyiweke ndzi ta swi hetisisa eka Yehovha.” (Ps. 116:3, 4, 8, 10-14) A a tiyimisele ku hetisisa switshembiso hinkwaswo leswi a swi hlambanyeke eka Yehovha ni ku endla hinkwaswo leswi a a n’wi lerise swona.

Na wena u nga endla hilaha ku fanaka. Hi ndlela yihi? Hi ku hanya hi milawu ya Xikwembu minkarhi hinkwayo. Hikwalaho, tiyiseka leswaku ku gandzela Yehovha i mhaka ya nkoka evuton’wini bya wena naswona u pfumelela moya wakwe leswaku wu ku kongomisa eka swilo hinkwaswo leswi u swi endlaka. (Ekl. 12:13; Gal. 5:16-18) I ntiyiso leswaku a wu nge swi koti hi ku helela ku tlherisela Yehovha hinkwaswo leswi a ku endleleke swona. Hambiswiritano, ‘Yehovha wa tsaka’ loko a vona leswaku u endla ntirho wa yena hi mbilu hinkwayo. (Swiv. 27:11) Hakunene i lunghelo lerikulu ku tsakisa Yehovha hi ndlela leyi!

 Endla Leswaku Vandlha Ri Tshama Ri Tsakile

A swi kanakanisi leswaku vandlha ra Vukreste ri ku pfunile hi tindlela to tala. Yehovha u tirhisa vandlha leswaku a hi nyika rungula leri tiyisaka vuxaka bya hina na yena. U dyondze ntiyiso lowu ku ntshunxeke eka tidyondzo ta vukhongeri bya mavunwa naswona wu endle leswaku u tiva Xikwembu ni xikongomelo xa xona. (Yoh. 8:32) Eminhlanganweni ya vandlha, etinhlengeletanweni ni le mintsombanweni leyi lunghiseleriweke hi “hlonga ro tshembeka ni ro tlhariha,” u kume vutivi lebyi nga ta endla leswaku u kuma vutomi lebyi nga heriki emisaveni leyi nga ta va paradeyisi laha switlhavi ni ku xaniseka swi nga ta va swi nga ha ri kona. (Mat. 24:45-47) Entiyisweni a wu nge swi koti ku hlayela mikateko hinkwayo leyi u yi kumaka hikwalaho ko va xirho xa vandlha ra Xikwembu ni leyi u nga ta yi kuma enkarhini lowu taka. Xana i yini leswi wena u nga swi endlelaka vandlha?

Muapostola Pawulo u tsale a ku: “Miri hinkwawo, hi ku hlanganisiwa swin’we hi vun’we ni ku endliwa leswaku wu tirhisana hi mahlangano hinkwawo lama nyikaka leswi lavekaka, hi ku ya hi matirhelo ya xirho xin’wana ni xin’wana hi mpimo lowu faneleke, wu endla leswaku miri wu kula wu akeka hi rirhandzu.” (Efe. 4:15, 16) Hambileswi tsalwa leri ri vulavulaka hi ku kongoma hi Vakreste lava totiweke, leswi ri swi vulaka swi nga tirha ni le ka Vakreste hinkwavo namuntlha. Ina, xirho xin’wana ni xin’wana xa vandlha xi nga hoxa xandla leswaku vandlha ri tshama ri tsakile naswona ri kula. Xana hi nga swi endlisa ku yini sweswo?

Sweswo hi nga swi endla hi ku va minkarhi hinkwayo hi khutaza ni ku pfuna van’wana leswaku va ya emahlweni va tirhela Xikwembu. (Rhom. 14:19) Nakambe hi nga hoxa xandla leswaku vandlha “ri kula emirini” hi ku kombisa timfanelo ta moya wa Xikwembu loko hi tirhisana ni Vakreste-kulorhi. (Gal. 5:22, 23) Ku tlula kwalaho, hi nga lava tindlela ta ku ‘endlela hinkwavo leswi nga swinene, kambe ngopfu-ngopfu lava nga swin’we na hina eripfumelweni.’ (Gal. 6:10; Hev. 13:16) Un’wana ni un’wana evandlheni—vamakwerhu va xinuna ni va xisati, lavatsongo ni lavakulu—a nga hoxa xandla leswaku vandlha ri ‘kula emirini hi rirhandzu.’

Ku tlula kwalaho, hi nga tirhisa vuswikoti bya hina, matimba ya hina swin’we ni rifuwo ra hina leswaku hi hlanganyela entirhweni wo chumayela lowu endliwaka hi vandlha. Yesu Kreste u te: “Mi amukele mahala.” Xana hi fanele hi endla yini? U engetele a ku: “Nyikani mahala.” (Mat. 10:8) Hikwalaho, hlanganyela hi xitalo entirhweni wo chumayela hi Mfumo ni wa ku endla vadyondzisiwa. (Mat. 24:14; 28:19, 20) Xana swiyimo swa wena swi endla leswaku u nga swi koti ku hlanganyela entirhweni lowu hi xitalo? Tsundzuka noni leyi Yesu a vulavuleke ha yona. Yi nyikele hi mali leyitsongo swinene. Kambe Yesu u vule leswaku yi nyikele ku tlula lavan’wana hinkwavo. Yi nyikele hi swilo hinkwaswo hi ku ya hi swiyimo swa yona.—2 Kor. 8:1-5, 12.

Tlangela Mpfuno Lowu U Nyikiwaka Wona

Nilokoswiritano, swi nga endleka leswaku minkarhi yin’wana u lava mpfuno lowu humaka evandlheni. U nga tshuki u ala ku pfuniwa hi vandlha loko u langutane ni swiphiqo swa mafambiselo lawa ya swilo. Yehovha u veke vavanuna lava fanelekaka ni lava khathalaka leswaku “va risa vandlha”—leswaku va ku pfuna loko u langutane ni miringo ni mahlomulo. (Mint. 20:28) Vakulu ni vanhu van’wana evandlheni va lava ku ku chavelela, ku ku seketela ni ku ku sirhelela loko u langutane ni swiyimo swo tika.—Gal. 6:2; 1 Tes. 5:14.

Kambe tiyiseka leswaku u amukela mpfuno wolowo hi moya lowunene. Minkarhi hinkwayo vana la tlangelaka. Mpfuno lowu humaka eka Vakreste-kuloni wu teke tanihi xikombiso xa musa wa Xikwembu. (1 Pet. 4:10) Ha yini sweswo swi ri swa nkoka? Hikuva a hi lavi ku fana ni vanhu va misava lava nga nkhensiki.

Ringanisela Naswona U Va La Anakanyelaka

Eka papila leri Pawulo a ri tsaleleke vandlha ra le Filipiya, u tsale leswi malunghana na Timotiya: “A ndzi na un’wana la nga ni mboyamelo wo fana ni wa yena loyi a nga ta swi khathalela hakunene  swilo leswi khumbaka n’wina.” Hambiswiritano, u ye mahlweni a ku: “Lavan’wana hinkwavo va lava leswi vuyerisaka vona ntsena, ku nga ri swa Kreste Yesu.” (Filp. 2:20, 21) Loko hi ri karhi hi anakanyisisa hi marito ya Pawulo, xana hina namuntlha hi nga swi papalata njhani ku karhateka ku tlula mpimo hi swilo leswi ‘vuyerisaka hina ntsena’?

A hi fanelanga hi sindzisa van’wana evandlheni loko hi va kombela leswaku va hi pfuna ku lulamisa swiphiqo swa hina. Ha yini? Anakanya hi leswi: A swi kanakanisi leswaku hi nga tsaka loko makwerhu o hi pfuna hi ndlela yo karhi. Kambe, xana hi nga n’wi sindzisa leswaku a hi pfuna? Doo! Hi ndlela leyi fanaka, hambileswi minkarhi hinkwayo vamakwerhu va swi tsakelaka ku hi pfuna, a hi fanelanga hi langutela leswaku va ta hi pfuna minkarhi hinkwayo hambiloko swiyimo swi nga va pfumeleli kambe hi fanele hi va anakanyela hi tlhela hi ringanisela. Kutani swin’wana ni swin’wana leswi vamakwerhu va hi endlelaka swona leswaku va hi pfuna leswaku hi langutana ni swiphiqo, va fanele va swi endla hi ku swi rhandza.

A swi kanakanisi leswaku vamakwerhu lava nga Vakreste va ta tshama va lunghekele ku ku pfuna minkarhi hinkwayo. Kambe minkarhi yin’wana swi nga ha endleka leswaku va nga swi koti ku ku pfuna eka hinkwaswo leswi u swi pfumalaka. Loko sweswo swi endleka, tiyiseka leswaku Yehovha u ta ku pfuna eka swiphiqo hinkwaswo leswi u langutaneke na swona, hilaha a endleke hakona eka mupisalema.—Ps. 116:1, 2; Filp. 4:10-13.

Kutani wu amukele hi mandla mambirhi mpfuno wun’wana ni wun’wana lowu humaka eka Yehovha—ngopfu-ngopfu loko u langutane ni mahlomulo ni swiphiqo. (Ps. 55:22) Yehovha u lava leswaku u endla tano. Hambiswiritano, u lava leswaku u va “munyiki la tsakeke.” Hikwalaho, loko swiyimo swa wena swi ku pfumelela, tiyimisele “hi mbilu hinkwayo” ku nyika hilaha u nga kotaka hakona leswaku u seketela vugandzeri bya ntiyiso. (2 Kor. 9:6, 7) Hi ndlela yoleyo u ta swi kota ku amukela hi ntsako u tlhela u nyika hi mbilu hinkwayo.

[Bokisi/Swifaniso leswi nga eka tluka 31]

“Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?”—Ps. 116:12

▪ Tinyike nkarhi wo ‘endlela hinkwavo leswinene’

▪ Khutaza u tlhela u phyuphyisa van’wana leswaku vuxaka bya vona na Yehovha byi tshama byi tiyile

▪ Hlanganyela hi xitalo entirhweni wo endla vadyondzisiwa hilaha swiyimo swa wena swi ku pfumelelaka hakona