Swa olova ku vula leswaku Sathana loyi hi hlayaka hi yena eBibeleni ko va vuhomboloki hinkwabyo. Xana sweswo hi swona leswi Bibele yi swi dyondzisaka hakunene? Loko swi ri tano, ha yini Bibele yi vula leswaku Sathana u vulavule na Yesu Kreste ni Xikwembu xa Matimba Hinkwawo? Xiya swikombiso swimbirhi swa mabulo wolawo.

Loko Yesu a sungula ntirho wakwe wo chumayela, Diyavulosi u ringete ku n’wi kanganyisa hi miringo yinharhu. Ndzingo wo sungula, Sathana u ringete hi matimba ku ringa Yesu leswaku a tirhisa matimba lawa Xikwembu xi n’wi nyikeke wona hi ndlela ya vutianakanyi leswaku a herisa ndlala leyi a yi n’wi khomile. Wa vumbirhi, Diyavulosi u ringe Yesu leswaku a hoxa vutomi byakwe ekhombyeni hi ndlela ya vuphukuphuku leswaku a ta tikumela ndhuma. Wa vunharhu, Sathana u tshembise Yesu ku n’wi nyika mimfumo hinkwayo ya misava loko ntsena o n’wi gandzela. Yesu u yi hlurile miringo yoleyo yinharhu, minkarhi hinkwayo a a tshaha Matsalwa.—Matewu 4:1-11; Luka 4:1-13.

Yesu a a vulavula na mani? Xana a a vulavula ni vuhomboloki byo karhi lebyi a byi ri endzeni ka yena? Matsalwa ma vula leswaku, Yesu u “[ringiwe] hi tindlela hinkwato ku fana na hina, kambe yena a nga vanga na xidyoho.” (Vaheveru 4:15) Nakambe Bibele yi ri: “A nga xi endlanga xidyoho, hambi vuxisi a byi kumiwanga enon’wini wakwe.” (1 Petro 2:22) Yesu u tshame a hetisekile, a kombisa vutshembeki. A nga kalanga a pfumelela moya ni wun’we wo biha leswaku wu n’wi nghena. Swi le rivaleni leswaku Yesu a a nga vulavuli ni xiphemu xo karhi xo homboloka xa miri wakwe; a a vulavula ni munhu wa xiviri.

Bulo rero ri nyikela vumbhoni bya leswaku Sathana i munhu wa xiviri.

• Tsundzuka leswaku Diyavulosi u tshembise Yesu ku n’wi nyika mimfumo ya misava hinkwayo loko ntsena o n’wi gandzela. (Matewu 4:8, 9) Xitshembiso lexi a xi ta va xa hava loko Sathana a a nga ri munhu wa xiviri. Ku engetela kwalaho, Yesu a nga n’wi kanetanga Sathana loko a n’wi tshembisa mimfumo yoleyo.

• Endzhaku ka loko Yesu a arile loko a ringiwa, Diyavulosi u n’wi “[sukerile] ku fikela nkarhi wun’wana lowu fanelekaka.” (Luka 4:13) Xana emhakeni leyi, Sathana u tikombise a ri vuhomboloki byo karhi kumbe a ri nala loyi a nga ni tihanyi?

• Xiya leswaku ‘tintsumi ti tile kutani ti tirhela’ Yesu. (Matewu 4:11) Xana tintsumi teto a ku ri swivumbiwa swa moya leswi a swi khutaza ni ku nyika Yesu mpfuno lowu a a wu lava? Ina. Kutani, ha yini hi fanele hi ehleketa leswaku Sathana a a nga ri munhu wa xiviri a ko va vuhomboloki byo karhi?

Xikombiso xa vumbirhi xi katsa rungula leri vulavulaka hi wanuna loyi a a chava Xikwembu ku nga  Yobo. Rungula rero ri vulavula hi mimbulavurisano yimbirhi leyi veke kona exikarhi ka Diyavulosi ni Xikwembu. Eka mimbulavurisano yoleyo hinkwayo, Xikwembu xi bumabumele Yobo hikwalaho ko tshembeka kakwe. Sathana u vule leswaku Yobo u tirhela Xikwembu hikwalaho ka leswi a lavaka ku vuyeriwa, u vule leswaku Xikwembu xi xava vutshembeki bya Yobo. Entiyisweni, Diyavulosi a a vula leswaku u tiva Yobo ngopfu ku tlula ndlela leyi Xikwembu xi n’wi tivaka ha yona. Yehovha u pfumelele Sathana leswaku a tekela Yobo rifuwo rakwe, a dlaya vana vakwe ni ku n’wi vangela mavabyi. * Hi ku famba ka nkarhi, swi ve erivaleni leswaku Yehovha a a tiyisile malunghana ni leswi a nga swi vula hi Yobo naswona swi ve erivaleni leswaku Sathana i muhembi. Xikwembu xi katekise Yobo hikwalaho ko tshembeka kakwe.—Yobo 1:6-12; 2:1-7.

Eka mimbulavurisano yoleyo leyi Xikwembu xi veke na yona na Sathana, xana Yehovha a a vulavula ni vuhomboloki byo karhi lebyi a byi ri endzeni ka yena? Bibele yi ri: “Loko ku ri Xikwembu xa ntiyiso, ndlela ya xona yi hetisekile.” (2 Samuwele 22:31) Nakambe, Rito ra Xikwembu ri ri: “Wa kwetsima, wa kwetsima, wa kwetsima Yehovha Xikwembu, lowa Matimba Hinkwawo.” (Nhlavutelo 4:8) Rito leri nge, kwetsima ri vula ku tenga, ku hlawuleka ni ku nga vi na xidyoho. Yehovha u hetisekile naswona a nga na xihoxo. Swi le rivaleni leswaku a nge vi na vuhomboloki endzeni ka yena.

Hambiswiritano, van’wana va nga ha vula leswaku hambi ku ri Yobo a a nga ri munhu wa xiviri, kutani mimbulavurisano yoleyo hinkwawo a ko va ntsheketo. Xana mhaka yoleyo ya twala? Tindzimana tin’wana ta le Bibeleni ti kombisa leswaku Yobo a a ri munhu wa xiviri. Hi xikombiso, eka Yakobo 5:7-11, Yobo u hlamuseriwa tanihi xikombiso lexinene lexi khutazaka Vakreste ku tiyisela loko va langutana ni maxangu ni xitsundzuxo lexi chavelelaka xa leswaku Yehovha wa va katekisa vanhu lava tiyiselaka loko va langutana ni miringo. Xana xikombiso xa Yobo a xi ta va pfunisa ku yini Vakreste loko a ku ri leswaku Yobo a a nga ri munhu wa xiviri naswona swihehlo leswi Sathana a n’wi hehleke ha swona a ko va ntsheketo ntsena? Ku engetela kwalaho, eka Ezekiyele 14:14, 20, Yobo u katsiwe na Nowa na Daniyele eka nxaxamelo wa vavanuna vanharhu vo lulama. Ku fana na Nowa na Daniyele, Yobo a a ri munhu wa xiviri, wanuna loyi a a ri ni ripfumelo leri tiyeke. Loko ku ri leswaku Yobo a a ri munhu wa xiviri, xana a swi twali ku vula leswaku swihehlo leswi a a hehliwa ha swona na swona a swi huma eka munhu wa xiviri?

Handle ko kanakana, Bibele yi hlamusela Sathana tanihi munhu wa xiviri wa moya. Kambe, u nga ha tivutisa u ku, ‘Xana ninamuntlha wa ha ri ni khombo eka mina ni le ka ndyangu wa mina?’

Anakanya hi loko endhawini ya ka n’wina ko nghena ntlawa wa tinsulavoya hi xitshuketa. Swi le rivaleni leswaku vugevenga ni mahanyelo yo biha swi ta andza swinene endhawini ya ka n’wina. Xiya xiendlakalo lexi fanaka: Sathana ni madimona yakwe, ku nga swivumbiwa swa xiviri swa moya leswi ku fana na Sathana swi xandzukeleke Xikwembu, swi lahleriwe emisaveni hi xitshuketa. Xana vuyelo byi ve byihi? Leswaku u kuma nhlamulo, anakanya hi leswi u swi vonaka eka mahungu namuntlha.

• Xana wa ku vona ku andza ka vubihi ni madzolonga hambiloko ku endliwa matshalatshala yo swi sivela?

• Xana wa ku vona ku andza ka vuhungasi lebyi katsaka vungoma hambiloko vatswari vo tala va vilela?

• Xana wa ku vona ku onheteriwa ka mbango hambiloko ku endliwa matshalatshala yo wu sirhelela?

• Xana swi tikomba onge ku na leswi hoxeke hi vanhu—leswaku ku ni moya wo karhi lowu endlaka vanhu va endla swilo swo biha?

Xiya leswaku Bibele yi ri i mani loyi a vangaka swiphiqo leswi nga kona namuntlha: “Dragona leyikulu yi lahleriwa ehansi, nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke; yi lahleriwa ehansi emisaveni, ni tintsumi ta yona ti lahleriwa ehansi na yona. . . . Khombo eka misava ni lwandle, hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.” (Nhlavutelo 12:9, 12) Endzhaku ko xiya vumbhoni, vanhu vo tala va gimete hi ku vula leswaku Sathana i munhu wa moya loyi a nga ni khombo, hi yena loyi a lawulaka misava leyi hi hanyaka eka yona.

U nga ha tivutisa leswaku u nga wu kuma kwihi nsirhelelo. Xexo i xivutiso xa nkoka swinene. Xihloko lexi landzelaka xi ta vulavula hi magoza man’wana lama pfunaka.