NHLOKOMHAKA YA XIFUNENGETO | XANA XIKWEMBU XI RI YINI HI TINYIMPI?
Ndlela Leyi Xikwembu A Xi Ti Languta Ha Yona Tinyimpi eMinkarhini Ya Khale
Vaisrayele, ku nga vanhu va Xikwembu va le minkarhini ya khale, a va tshikileriwa. Va khongele eka Xikwembu hi ku phindhaphindha leswaku xi va pfuna, kambe a va pfuniwanga hi nkarhi wolowo. Vatshikileri va vona a ku ri tiko ra Egipta leri a ri ri ni matimba. (Eksoda 1:13, 14) Ku ringana malembe yo tala, Vaisrayele va rindzele leswaku Xikwembu xi herisa ku tshikileriwa ka vona hi Vaegipta. Eku heteleleni, nkarhi wa Xikwembu wa leswaku xi va ntshunxa wu fikile. (Eksoda 3:7-10) Bibele yi vula leswaku Xikwembu xi lwe ni Vaegipta. Xi hlasele Vaegipta hi makhombo yo hambanahambana ivi endzhaku xi lovisa hosi ya le Egipta ni mavuthu ya yona eLwandle ro Tshwuka. (Pisalema 136:15) Yehovha Xikwembu u ti kombise a ri “nhenha ya nyimpi” eka vanhu va yena.—Eksoda 15:3, 4.
Leswi Xikwembu xi lweke ni Vaegipta swi kombisa leswaku a hi tinyimpi hinkwato leti xi ti vengaka. Minkarhi yin’wana, xi byele Vaisrayele leswaku va lwa nyimpi. Hi xikombiso, xi va lerise leswaku va lwa ni Vakanana, lava a va hombolokile swinene. (Deteronoma 9:5; 20:17, 18) Xi lerise Davhida Hosi ya Vaisrayele leswaku a lwa ni Vafilista lava a va va xanisa. Xikwembu xi tlhele xi byela Davhida ndlela leyi a a ta va hlula ha yona.—2 Samuwele 5:17-25.
Marungula lawa ya le Bibeleni ma kombisa leswaku loko Vaisrayele va tshikileriwa, Xikwembu xi pfumelele leswaku va lwa nyimpi leswaku xi va sirhelela ni ku sirhelela vugandzeri bya ntiyiso. Kambe xiya tinhla letinharhu malunghana ni ku va Xikwembu xi pfumelele tinyimpi teto.
-
I XIKWEMBU NTSENA LEXI NGA NI MFANELO YO VULA LESWAKU I MANI LOYI A NGA TA LWA NYIMPI. Eka xiendlakalo xin’wana, Xikwembu xi byele Vaisrayele xi ku: “Sweswi a mi nge lwi.” Ha yini? Xikwembu a xi ta va lwela. (2 Tikronika 20:17; 32:7, 8) Xi endle tano minkarhi yo tala, ku fana ni leswi hlamuseriweke eku sunguleni ka xihloko lexi. Minkarhi yin’wana Xikwembu xi lerise vanhu va xona ku nga Vaisrayele ku lwa eka tinyimpi leti xi ti pfumeleleke, to fana ni leti a ti katsa ku va va sirhelela ni ku lwela Tiko ra vona leri Tshembisiweke.—Deteronoma 7:1, 2; Yoxuwa 10:40.
-
I XIKWEMBU NTSENA LEXI NGA NI MFANELO YO VULA LESWAKU NYIMPI YI TA LWIWA RINI. Malandza ya Xikwembu a ma fanele ma rindzela nkarhi lowu a xi ta va byela leswaku va lwa ni lava a va va tshikilela ku nga matiko lawa a ma va rhendzerile. A va nga fanelanga va ya enyimpini va nga byeriwanga. Loko va endla tano, a xi nga va seketeli. Kahlekahle, Bibele yi kombisa leswaku loko Vaisrayele va ya enyimpini Xikwembu xi nga va pfumelelanga, a va hluriwa. *
-
Hambileswi Xikwembu xi lweke ni Vakanana, xi ponise van’wana vo fana na Rahava ni ndyangu wakwe
XIKWEMBU A XI KU TSAKELI KU FA KA VANHU, KU KATSA NI LAVO HOMBOLOKA. Yehovha Xikwembu hi yena xihlovo xa vutomi ni Muvumbi wa vanhu. (Pisalema 36:9) Hikokwalaho, a nga tsaki loko vanhu va fa. Kambe, lexi vavaka hileswaku vanhu van’wana vo biha va luka marhengu yo tshikilela ni ku dlaya van’wana. (Pisalema 37:12, 14) Minkarhi yin’wana Xikwembu xi pfumelele tinyimpi leswaku xi herisa vubihi byebyo. Kambe, hambileswi xi pfumeleleke Vaisrayele leswaku va lwa tinyimpi, a xi “hlwela ku hlundzuka,” xi tlhela xi kombisa “musa” eka vatshikileri va vona. (Pisalema 86:15) Hi xikombiso, xi byele Vaisrayele leswaku loko va nga si lwa ni tiko ro karhi, a va fanele va rhanga va “tivisa marito ya ku rhula” leswaku va nyika tiko rero nkarhi wo cinca tindlela ta rona ni leswaku ri nga lwi. (Deteronoma 20:10-13) Hi ndlela yoleyo, Xikwembu xi kombise leswaku ‘ku fa ka lowo homboloka a xi ku tsakeli, kambe xi tsakela leswaku lowo homboloka a tlhela endleleni yakwe, a ya emahlweni a hanya.’—Ezekiyele 33:11, 14-16. *
Se ha swi xiya leswaku eminkarhini ya khale, Xikwembu a xi tirhisa tinyimpi ku herisa vubihi ni lava a va tshikilela van’wana. Kambe Xikwembu hi xona a xi ri ni mfanelo yo vula leswaku nyimpi ya kona yi ta lwiwa rini naswona i vamani lava nga ta katseka eka yona. Kambe, xana Xikwembu xi tsakisiwa hi ku dlayeteriwa ka vanhu? Doo! Entiyisweni, xa ma venga madzolonga. (Pisalema 11:5) Xana langutelo ra Xikwembu hi tinyimpi ri cince loko N’wana wa xona Yesu Kreste a sungula ku chumayela laha misaveni?
^ ndzim. 7 Hi xikombiso, eka xiendlakalo xin’wana, Vaisrayele va hluriwile hi Vaamaleke ni Vakanana hi leswi va nga ya lwa na vona Xikwembu xi nga va pfumelelanga. (Tinhlayo 14:41-45) Eka malembe yo tala lama landzeleke, Hosi Yosiya wo tshembeka u ye enyimpini, Xikwembu xi nga n’wi pfumelelanga naswona sweswo swi endle leswaku a fa.—2 Tikronika 35:20-24.
^ ndzim. 8 Vaisrayele a va ma tivisanga marito ya ku rhula loko va nga si lwa ni Vakanana. Ha yini? Hikuva Vakanana a va nyikiwe malembe ya 400 leswaku va lulamisa tindlela ta vona to biha. Hi nkarhi lowu Vaisrayele va lweke na vona, Vakanana se a va hombolokile. (Genesa 15:13-16) Hikwalaho, a va fanele va lovisiwa. Kambe, loko Mukanana a cinca tindlela takwe a a nga lovisiwi.—Yoxuwa 6:25; 9:3-27.
U Nga Ha Tsakela
BIBELE—YI TAMELE RUNGULA RIHI?
Vaisrayele Va Nghene eTikweni Ra Kanana
Loko Vaisrayele va nghena etikweni ra Kanana, ha yini Yehovha a ponise Rahava ni ndyangu wakwe eYeriko?
XIHONDZO XO RINDZA
Rahava U ‘Vuriwe La Lulameke Hikwalaho Ka Mintirho’
Xana rungula ra Rahava ri swi kombisa njhani leswaku ku hava ni un’we wa hina loyi a nga riki wa nkoka eka Yehovha? Hi nga dyondza yini eka ripfumelo rakwe?
XIHONDZO XO RINDZA
Vuavanyisi Bya Xikwembu—Xana A Byi Kombisa Leswaku Xi Ni Tihanyi?
Leswaku xivutiso lexi xi hlamuleka, xiya swikombiso swimbirhi swa le Bibeleni swa vuavanyisi lebyi tisiweke hi Xikwembu—Ndhambi ya siku ra Nowa ni ku heriseriwa makumu ka Vakanana.
