Ku nga ri khale Mfumo wa Xikwembu wu ta endla leswaku vanhu emisaveni hinkwayo va va ni ku rhula ni vun’we. “Ku rhula ku ta andza,” hilaha swi tshembisiweke hakona eka Pisalema 72:7. Kambe, xana Mfumo wa Xikwembu wu ta sungula rini ku fuma? Wu ta fuma njhani? Naswona wu nga ku vuyerisa njhani?

Bibele yi profete hi swiendlakalo leswi a swi ta kombisa leswaku Mfumo wa Xikwembu wu tshinele. Swiendlakalo sweswo swi katsa tinyimpi, ndlala, mavabyi, ku tsekatseka ka misava ni ku engeteleka ka ku kala nawu.—Matewu 24:3, 7, 12; Luka 21:11; Nhlavutelo 6:2-8.

Vuprofeta byin’wana byi ri: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, varhandzi va mali, . . . lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, . . . lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu.” (2 Timotiya 3:1-4) I khale vanhu va ri karhi va hanya hi ndlela leyi. Kambe sweswi i tshamela maxelo.

Vuprofeta lebyi byi sungule ku hetiseka hi 1914. Entiyisweni, van’wamatimu, van’watipolitiki ni vatsari va vule leswaku swilo swi sungule ku yima hi nhloko endzhaku ka lembe rero. Hi xikombiso, Peter Munch, n’wamatimu wa le Denmark, u tsale leswi: “Nyimpi leyi veke kona hi 1914 yi cince vutomi bya vanhu. Loko lembe rolero ri nga si fika a swi tikomba onge swilo swi famba kahle emisaveni hinkwayo kambe . . . hi lo namba hi nghena hi nhloko eka vutomi lebyi teleke timhangu, madzolonga ni rivengo, kahlekahle misava se yi yime hi nhloko.”

Ku gonya xiganga swi hlola xirhelelo. Swilo leswi swi kombisa leswaku Mfumo wa Xikwembu wu le kusuhi. Loko Yesu a gimeta mhaka ya yena mayelana ni swilo leswi a swi ta kombisa leswaku Mfumo wa Xikwembu wu le kusuhi u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo kutani hi kona makumu ma nga ta fika.”—Matewu 24:14.

Rungula leri Timbhoni ta Yehovha ti ri byelaka vanhu i mahungu lawa lamanene. Buku leyi ti yi tirhisaka ngopfu yi ni nhlokomhaka leyi nge, Xihondzo Xo Rindza Xi Huwelela Mfumo Wa Yehovha. Xihondzo Xo Rindza lexi kumekaka hi tindzimi to tlula 338, Nkarhi ni nkarhi xi vulavula hi swilo swo tsakisa leswi Mfumo wa Xikwembu wu nga ta swi endlela vanhu.

Nhlamulo yi katsa tinhla ta mune ta nkoka:

1. Mfumo wa Xikwembu wu nge fumi hi varhangeri va tipolitiki lava fumaka misava leyi sweswi.

2. Varhangeri va tipolitiki a va nge swi lavi ku tshika swikhundlha swa vona naswona hi vuphukuphuku va ta ringeta ku lwa ni Mfumo wa Xikwembu.—Pisalema 2:2-9.

3. Mfumo wa Xikwembu wu ta boheka ku herisa mimfumo ya tipolitiki leyi lavaka ku ya emahlweni yi fuma vanhu ku vava. (Daniyele 2:44; Nhlavutelo 19:17-21) Nyimpi leyi nga ta va  kona emisaveni hinkwayo yi vuriwa Armagedoni.—Nhlavutelo 16:14, 16.

4. Hinkwavo lava titsongahatelaka Mfumo wa Xikwembu va ta ponisiwa eka Armagedoni va hanya emisaveni leyi nga ni ku rhula. Bibele yi va vula “ntshungu lowukulu,” ku nga nhlayo leyi endlaka timiliyoni.—Nhlavutelo 7:9, 10, 13, 14.

Goza ro sungula leri nga ku pfunaka leswaku u fumiwa hi Mfumo wa Xikwembu i ku dyondza. Loko Yesu a khongela eka Xikwembu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Loko vanhu va tiva Yehovha Xikwembu tanihi munghana wa vona, va katekisiwa hi tindlela to tala. A hi buleni hi timbirhi: Yo sungula, va va ni ripfumelo leri tiyeke eka Yehovha. Ripfumelo rolero leri titshegeke hi vumbhoni, ri endla va swi xiya leswaku Mfumo wa Xikwembu i wa xiviri naswona wu tshinele. (Vaheveru 11:1) Ya vumbirhi, ndlela leyi va rhandzaka Xikwembu ni vaakelani va vona ha yona ya kula. Ndlela leyi va rhandzaka Xikwembu ha yona yi endla leswaku va xi yingisa hi mbilu hinkwayo. Leswi va rhandzaka vaakelani va vona va susumeteleka ku tirhisa marito ya Yesu, lama vuriwaka nawu lowu Dumeke Wa Mahanyelo. Ma hlayeka hi ndlela leyi: “Leswi mi lavaka vanhu va swi endla eka n’wina, swi endleni eka vona hilaha ku fanaka.”—Luka 6:31.

Ku fana ni tatana la nga ni rirhandzu, Muvumbi wa hina u hi navelela leswinene. U lava leswaku hi kuma leswi Bibele yi swi vulaka ‘vutomi bya xiviri.’ (1 Timotiya 6:19) Vutomi bya namuntlha a hi ‘vutomi bya xiviri.’ Vanhu va timiliyoni namuntlha va cina rhuvurhuvu. Leswaku u vona ndlela leyi ‘vutomi bya xiviri’ byi nga ta va ha yona, xiya swin’wana swa swilo swo tsakisa leswi Mfumo wa Xikwembu wu nga ta swi endlela vanhu.