LESWI BIBELE YI SWI VULAKA

Loko Xikwembu xi nga si vumba vuako hinkwabyo ni vanhu vo sungula, se a xi endle swivumbiwa swa xiyimo xa le henhla leswi tlhariheke. Swi ni matimba ku tlula vanhu, naswona swi tshama swin’we na Xikwembu, ku nga ndhawu leyi vanhu va nga kotiki ku fika hambi ku ri ku yi vona. (Yobo 38:4, 7) Bibele yi vitana swivumbiwa sweswo “mimoya” ni “tintsumi.”—Pisalema 104:4. *

Xana ku ni tintsumi tingani? Ti tele ngopfu. Nhlayo ya tintsumi leti rhendzeleke xiluvelo xa Xikwembu i “timiriyadi ta timiriyadi,” kumbe “magidi ya magidi.” (Nhlavutelo 5:11) Hi marito man’wana, ku ni madzana ya timiliyoni ya tintsumi!

“Ndzi [vone] . . .  tintsumi to tala leti rhendzeleke xiluvelo . . . , nhlayo ya tona a yi ri timiriyadi ta timiriyadi ni magidi ya magidi.”—Nhlavutelo 5:11.

LESWI BIBELE YI SWI VULAKA

Hakanyingi tintsumi a ti ri vavulavuleri va Xikwembu kumbe varhumiwa va xona. * EBibeleni ti tlhela ti hlamuseriwa tanihi leti endlaka mintirho ya Xikwembu ya matimba. Xikwembu xi tshame xi rhumela ntsumi leswaku yi ya katekisa Abrahama ni ku n’wi sivela ku endla gandzelo hi Isaka n’wana wakwe. (Genesa 22:11-18) Ntsumi yi humelele eka Muxe yi ri exikarhi ka xihlahla lexi pfurhaka yi n’wi byela rungula ra nkoka. (Eksoda 3:1, 2) Loko muprofeta Daniyele a hoxiwe ekheleni ra tinghala, “Xikwembu . . .  xi rhumele ntsumi ya xona, yi pfala nomu wa tinghala.”—Daniyele 6:22.

“Kutani ntsumi ya Yehovha yi humelela eka [Muxe] yi ri elangavini ra ndzilo exikarhi ka xihlahla xa mitwa.”—Eksoda 3:2.

LESWI BIBELE YI SWI VULAKA

A hi nge swi tivi hinkwaswo leswi tintsumi ti swi endlaka namuntlha. Hambiswiritano, Bibele yi hlamusela leswaku ta katseka eku pfuneni ka vanhu lava lavaka ku tiva swo tala hi Xikwembu.—Mintirho 8:26-35; 10:1-22; Nhlavutelo 14:6, 7.

Yehovha u kombe Yakobo norho lowu eka wona a voneke tintsumi ti tlhandluka ni ku rhelela hi “xitepisi” exikarhi ka matilo ni misava. (Genesa 28:10-12) Kumbexana Yakobo u gimete hileswi na hina hi gimetaka ha swona enorhweni wakwe, leswaku Yehovha u rhumela tintsumi takwe emisaveni leswaku ti ta seketela vanhu vakwe lavo tshembeka lava lavaka mpfuno wakwe.—Genesa 24:40; Eksoda 14:19; Pisalema 34:7.

“A ku ri ni xitepisi xi yimisiwe emisaveni, makumu ya xona ma fika ematilweni; kutani waswivo, a ku ri ni tintsumi ta Xikwembu ti tlhandluka ni ku rhelela hi xona.”—Genesa 28:12.