RICECE ri lava ku sirheleriwa swinene. Loko haha ku velekiwa, vuhlayiseki bya hina a a byi titshege hi vatswari va hina hi ku helela. Loko ha ha dyondza ku famba, hi hlangane ni vanhu lava hi nga va tiviki lava a va ri vakulu eka hina ku fana ni swihontlovila. A va hi chavisa kambe a hi nga chavi loko hi ri ekusuhi ni vatswari. A hi titwa hi hlayisekile loko tatana kumbe manana a hi khome hi voko.

Loko ha ha ri vatsongo, leswaku hi tsaka ni ku va ni rihanyo lerinene a swi titshege hi ku va vatswari va hina va hi rhandza ni ku hi khutaza. Loko hi xiya leswaku vatswari va hi rhandza, swi endle leswaku hi titwa hi sirhelelekile. Loko va hi tiyisekisa leswaku hi swi endla kahle swilo, swi endle leswaku hi titshemba hi tlhela hi endla nhluvuko.

Loko hi ya hi kula, vanghana va hina lavakulu na vona va endle leswaku hi titwa hi sirhelelekile. Loko va ri kona a hi titwa hi ntshunxekile naswona swi endle leswaku xikolo xi nga hi chavisi ngopfu.

Entiyisweni, sweswo swi kombisa leswaku u kurisiwe kahle. Vantshwa van’wana va kuma vanghana vatsongo va xiviri naswona vana vo tala a va seketeriwi ngopfu hi vatswari va vona. Melissa * u ri: “Loko ndzi vona swifaniso swa mindyangu leyi nga ni vun’we, yi ri eku tiphineni hi ku endla swilo swin’we, ndzi namba ndzi ku, ‘Ndzi navela onge loko na mina a ndzi tiphine ku fana na vona loko ndza ha ri ntsongo.’” Kumbexana na wena u titwa hi ndlela yoleyo.

Kumbexana a wu nga titshembi loko wa ha ri muntshwa. Kumbe a wu nga rhandziwi naswona a wu nga khutaziwi ngopfu. Swi nga endleka, u tsundzuka vatswari va wena lava a va tshamela ku holova, leswi endleke leswaku va dlaya vukati naswona hi xihoxo swi nga ha va swi endle leswaku u titwa nandzu. Kumbexana un’wana wa vatswari va wena a a ku rhukana kumbe a ku bukutela.

N’wana la nga sirhelelekangiki a nga angula njhani? Van’wana va tirhisa swidzidziharisi kumbe va nwa ku tlula mpimo loko va ha ri vantshwa. Van’wana va tihlanganisa ni ntlawa wa swigevenga leswaku va ta amukeleka. Vantshwa lava nga sirhelelekangiki va nga sungula ku rhandzana ni van’wana, leswaku va ta titwa va rhandziwa. Kambe vuxaka bya vona a swi talanga leswaku byi heta nkarhi wo leha, hakanyingi sweswo swi va endla va titwa va nga sirhelelekanga.

Vantshwa lava nga sirhelelekangiki lava honisaka swilo sweswo leswi nga ha vangaka swiphiqo leswikulu, va nga  ha kula va titeka va nga ri va nkoka. Ana u ri: “A ndzi khorwiseka leswaku a ndzi pfuni nchumu, hileswi manana a a tshamela ku ndzi byela sweswo. A ndzi tsundzuki a a tshame a ndzi khutaza kumbe a ndzi kombisa rirhandzu.”

Ndlela leyi hi kurisiweke ha yona a hi yona ntsena leyi vangaka leswaku hi titwa hi nga sirhelelekanga. Swi nga ha vangiwa hi ku thariwa hi nga swi rindzelanga, hi swiphiqo swa ku dyuhala hambi ku ri ku vilela hi ndlela leyi hi langutekaka ha yona. Ku nga khathariseki leswaku swi vangiwa hi yini, ku titwa hi nga sirhelelekanga swi nga hi hetela ntsako swi tlhela swi onha vuxaka bya hina ni van’wana. Hi nga endla yini leswaku hi hlula ku titwa hi ndlela yoleyo?

Hi fanele hi tsundzuka leswaku u kona loyi a lavaka ku hi pfuna hinkwerhu, ku nga Xikwembu.

Leri i rungula leri Xikwembu xi ri vuleke hi ku tirhisa muprofeta Esaya: “U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.” (Esaya 41:10, 13) Hakunene swa chavelela ku tiva leswaku Xikwembu xi lava ku hi sirhelela xi tlhela xi hi ponisa! A hi na xivangelo xo vilela!

Bibele yi vulavula hi vagandzeri va Xikwembu lava a va vilela kambe va dyondzeke ku tshemba leswaku Xikwembu xi ta va sirhelela xi tlhela xi va ponisa. Hana mana wa Samuwele, a a titwa a nga pfuni nchumu, hileswi a a ri mhika. Hikwalaho ka sweswo, a a hlekuriwa nkarhi ni nkarhi. Hana a a nga dyi naswona a a tshamela ku rila. (1 Samuwele 1:6, 8) Kambe endzhaku ka loko a phofulele Xikwembu hi leswi a a titwisa xiswona, a nga ha tlhelanga a vilela.—1 Samuwele 1:18.

Mupisalema Davhida na yena minkarhi yin’wana a a titwa a nga sirhelelekanga. Ku ringana malembe yo hlayanyana, Hosi Sawulo u ringete ku n’wi hlota. Davhida u ponile eka miringo yo hlayanyana naswona minkarhi yin’wana a a titwa a tshikilelekile hi swiphiqo swakwe. (Pisalema 55:3-5; 69:1) Hambiswiritano, u tsarile: “Ndzi ta pavalala ni ku etlela hi ku rhula, hikuva wena u ri wexe, Wena Yehovha, u endla leswaku ndzi tshama ndzi sirhelelekile.”—Pisalema 4:8.

Hana na Davhida va phofulele Yehovha swiphiqo swa vona leswi a swi va karhata naswona u va tiyisile. (Pisalema 55:22) Hi nga swi endla njhani sweswo namuntlha?

1. Dyondza ku tshemba Yehovha tanihi Tatana.

Yesu u hi khutaze leswaku hi tiva Tata wakwe, “Xikwembu xi ri xin’we xa ntiyiso.” (Yohane 17:3) Muapostola Pawulo u hi tiyisekise leswaku ‘A xi le kule ngopfu ni un’wana ni un’wana wa hina.’ (Mintirho 17:27) Yakobo u tsarile: “Tshinelani eka Xikwembu, kutani xi ta tshinela eka n’wina.”—Yakobo 4:8.

Ku tiva leswaku hi ni Tatana wa le tilweni loyi a hi rhandzaka ni loyi a khathalaka hi hina i goza ra nkoka ro hlula ku vilela. I ntiyiso leswaku swi nga ha teka nkarhi ku swi tshemba, kambe vo tala va kume leswaku ku endla tano swa pfuna hakunene. Caroline u ri: “Loko Yehovha a ve Tata wa mina, ndzi hetelele ndzi kume loyi ndzi nga ta n’wi phofulela leswi ndzi titwisaka xiswona. Leswi swi endle leswaku ndzi titwa ndzi phyuphyile!”

Rachel u ri: “Yehovha u ndzi pfunile leswaku ndzi titwa ndzi sirhelelekile loko ndzi siyiwe hi vatswari va mina. A ndzi vulavula na yena ndzi tlhela ndzi n’wi kombela leswaku a ndzi pfuna hi swiphiqo swa mina naswona u ndzi pfunile.” *

2. Tikumele ndyangu wa moya.

Yesu u dyondzise vadyondzisiwa vakwe leswaku va anakanya hi van’wana tanihi vamakwavo. U te: “Hinkwenu mi vamakwavo.” (Matewu 23:8) A a lava leswaku vadyondzisiwa vakwe va ntiyiso va rhandzana va tlhela va va ndyangu lowukulu wa moya.—Matewu 12:48-50; Yohane 13:35.

Timbhoni ta Yehovha ti ringeta hi matimba leswaku emavandlheni ya tona ti kombisana rirhandzu ni nchavelelo wa xiviri tanihi ndyangu wa moya. (Vaheveru 10:24, 25) Vo tala va kume leswaku minhlangano ya vandlha yi nga fana ni mafurha lama verhamisaka, lama horisaka switlhavi leswi vangiwaka hi ku vaviseka emintlhavekweni.

Eva u ri: “Evandlheni ra laha ndzi tshamaka kona a ndzi ri ni munghana wo hlawuleka, loyi a a twisisa xiphiqo lexi a xi ndzi karhata. A a ndzi yingisela, a hlaya na mina a tlhela a khongela na mina. A a tiyiseka leswaku a ndzi vi ndzexe. A a ndzi pfumelela ndzi tiphofula ndzi tlhela ndzi n’wi byela leswi ndzi vilerisaka. Hikwalaho ka leswi a ndzi seketeleke, ndzi sungule ku titwa ndzi sirhelelekile. U tlhela a ku, ndzi kume vatatana na vamanana evandlheni. Va ndzi endle ndzi titwa ndzi rhandziwa ndzi tlhela ndzi sirheleleka.”

 3. Kombisa van’wana rirhandzu ni musa.

Ku kombisa van’wana rirhandzu ni musa swi endla leswaku vuxaka byi tiya. Yesu u te: “Ku nyika swi tisa ntsako lowukulu ku tlula ku amukela.” (Mintirho 20:35) Nakambe, hi ta kuma leswaku loko hi kombisa rirhandzu, hi ta rhandziwa. Yesu u byele vadyondzisiwa vakwe a ku: “Hanyani hi ku nyika, kutani vanhu va ta mi nyika.”—Luka 6:38.

Loko hi rhandza van’wana, hi titwa hi sirhelelekile loko na vona va hi rhandza. Hilaha Bibele yi swi kombisaka hakona, “rirhandzu a ri heli.” (1 Vakorinto 13:8) María u ri: “Ndza swi tiva leswaku ndlela leyi a ndzi tilanguta ha yona a yi hoxile. Ndzi hlule ku va ni langutelo leri hoxeke hi ku pfuna van’wana kutani ndzi rivala hi swa mina. Minkarhi hinkwayo ndzi titwa ndzi enerisekile loko ndzi pfuna van’wana.”

Leswi hlamuseriweke laha henhla a swi nge endleki hi nkarhi wun’we hi ku helela. Kambe swona swa pfuna swinene. Hi ku pfumelelana ni mhaka leyi, Caroline u ri: “Ndza ha titwa ndzi nga sirhelelekanga. Kambe sweswi ndzi tivona ndzi ri wa nkoka swinene. Ndza swi tiva leswaku Xikwembu xa khathala hi mina naswona ndzi ni vanghana lavakulu vo tala, lava na vona va ndzi endlaka ndzi titwa ndzi sirhelelekile.” Rachel na yena u titwa hi ndlela leyi fanaka. U ri: “Ndzi va ni gome, nkarhi ni nkarhi. Kambe ndzi ni vamakwerhu lava nga ni vuxaka ni Xikwembu naswona ndzi nga ya eka vona loko ndzi lava mpfuno, va ndzi pfuna leswaku ndzi languta swilo hi ndlela leyinene. Ku tlula kwalaho, ndzi ni Tatana la nga le tilweni loyi ndzi vulavulaka na yena siku ni siku. Sweswo hi swona leswi ndzi pfunaka.”

Xiphiqo lexi xi ta lulamisiwa hi ku helela. Bibele yi hlamusela leswi misava leyintshwa yi nga ta va xiswona. Laha eka yona un’wana ni un’wana wa hina a nga ta titwa a sirhelelekile. Rito ra Xikwembu ra hi tshembisa: “Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.” (Mikiya 4:4) Hi nkarhi wolowo, a nga kona munhu loyi a nga ta endla leswaku hi titwa hi nga sirhelelekanga, kumbe loyi a nga ta hi vavisa. Hambi ku ri swilo swo chavisa leswi humeleleke khale “a swi nge tsundzukiwi.” (Esaya 65:17, 25) Xikwembu ni N’wana wa xona, Yesu Kreste, va ta simeka “ku lulama ka ntiyiso.” Vuyelo “byi ta va ku miyela ni nsirhelelo hilaha ku nga riki na makumu.”—Esaya 32:17.