Vito ra buku ya Bibele ya Nhlavutelo leri hi Xigriki ku nga A·po·kaʹly·psis (apokalipsi) ri vula “Ku paluxa” kumbe “Ku humesela erivaleni.” Vito leri ri hlamusela leswi buku ya Nhlavutelo yi vulavulaka ha swona—yi paluxa timhaka ni swiendlakalo leswi a swi ta endleka endzhaku ka nkarhi wo leha yi tsariwile. Vuprofeta byo tala bya yona bya ha ta hetiseka.

Nkatsakanyo wa buku ya Nhlavutelo

•   Xingheniso.—Nhlavutelo 1:1-9.

•   Marungula ya Yesu lama yaka emavandlheni ya nkombo.—Nhlavutelo 1:10–3:22.

•   Xivono lexi kombisaka Xikwembu xi tshame exiluvelweni xa xona etilweni.—Nhlavutelo 4:1-11.

•   Swivono leswi landzelelanaka:

  •   Swilemo swa nkombo.—Nhlavutelo 5:1–8:6.

  •   Timhalamhala ta nkombo, tinharhu ta tona to hetelela ti tivisa makhombo manharhu.—Nhlavutelo 8:7–14:20.

  •   Minkambana ya nkombo, ha wun’we wu ni khombo leri fanekiselaka ku avanyisa ka Xikwembu loku nga ta chululeriwa emisaveni.—Nhlavutelo 15:1–16:21.

  •   Swivono swa ku lovisiwa ka valala va Xikwembu.—Nhlavutelo 17:1–20:10.

  •   Swivono swa mikateko leyi Xikwembu xi nga ta yi tisela lava nga etilweni ni laha misaveni.—Nhlavutelo 20:11–22:5.

•   Mahetelelo.—Nhlavutelo 22:6-21.

Leswi nga ku pfunaka ku twisisa buku ya Nhlavutelo

1.   Nhlamuselo ya yona ya tsakisa, a yi va chavisi vanhu lava tirhelaka Xikwembu. Vanhu vo tala va ehleketa leswaku “apokalipsi” i ndzoviso lowukulu, kambe buku ya Nhlavutelo yi sungula yi tlhela yi gimeta hi ku vula leswaku lava va yi hlayaka, va yi twisisa va tlhela va hanya hi ku pfumelelana ni rungula ra yona va ta tsaka.—Nhlavutelo 1:3; 22:7.

2.   Nhlavutelo yi tirhisa “swikombiso” kumbe swifanekiselo leswi nga fanelangiki swi tekiwa hi ndlela ya xiviri.—Nhlavutelo 1:1.

3.   Vanhu lava ku vulavuriwaka ngopfu ha vona ni swifanekiselo leswi nga ebukwini ya Nhlavutelo ku vulavuriweke ha swona etibukwini letin’wana ta Bibele:

   •   Yehovha​—“Xikwembu xa ntiyiso lexi nga ematilweni” ni Mutumbuluxi wa swilo hinkwaswo.—Deteronoma 4:39; Pisalema 103:19; Nhlavutelo 4:11; 15:3.

   •   Yesu Kreste​—“Xinyimpfana xa Xikwembu.”—Yohane 1:29; Nhlavutelo 5:6; 14:1.

   •   Sathana Diyavulosi—nala wa Xikwembu.—Genesa 3:14, 15; Yohane 8:44; Nhlavutelo 12:9.

   •   Babilona Lonkulu​—ku fana ni Babilona wa khale (Babele), i nala wa Yehovha Xikwembu ni vanhu va xona tlhelo xihlovo xa vukhongeri bya mavunwa.—Genesa 11:2-9; Esaya 13:1, 11; Nhlavutelo 17:4-6; 18:4, 20.

   •   “Lwandle,”—vanhu vo homboloka lava lwisanaka ni Xikwembu.—Esaya 57:20; Nhlavutelo 13:1; 21:1.

   •   Swilo leswi yelanaka ni leswi a swi tirhisiwa etabernakeleni ya khale leswi a swi tirhisiwa evugandzerini bya Xikwembu—swi katsa areka ya ntwanano, lwandle ro kota nghilazi (xihlambelo), timboni, magandzelo ya murhi wa risuna ni alitari ya gandzelo.—Eksoda 25:10, 17, 18; 40:24-32; Nhlavutelo 4:5, 6; 5:8; 8:3; 11:19.

   •   Swivandzana—swi fanekisela tihulumendhe ta vanhu.—Daniyele 7:1-8, 17-26; Nhlavutelo 13:2, 11; 17:3.

   •   Tinomboro ti tirhisiwa hi ndlela yo fanekisela.—Nhlavutelo 1:20; 8:13; 13:18; 21:16.

4.   Swivono swi fambisana ni ‘siku ra Hosi,’ leri sunguleke loko Mfumo wa Xikwembu wu simekiwa hi 1914 niloko Yesu a sungula ku fuma tanihi Hosi. (Nhlavutelo 1:10) Hikwalaho hi nga langutela ku hetiseka lokukulu ka Nhlavutelo enkarhini wa hina.

5.   Leswaku hi twisisa buku ya Nhlavutelo, hi lava swilo leswi fanaka ni leswi hi pfunaka ku twisisa Bibele hinkwayo, leswi katsaka vutlhari lebyi humaka eka Xikwembu ni mpfuno wa lava se va yi twisisaka.—Mintirho 8:26-39; Yakobo 1:5.