Emisaveni hinkwayo, vanhu va timiliyoni va hlaya minkandziyiso ya Timbhoni ta Yehovha naswona van’wana va yi hlaya eka web site ya hina, hilaha na wena u endlaka hakona sweswi. Hambiswiritano, swi nga ku hlamarisa ku tiva ndlela leyi ntirho wa hina wo kandziyisa wu kuleke ha yona. Ku sukela hi 2013, hi kandziyise minkandziyiso leyi sekeriweke eBibeleni hi tindzimi ta kwalomu ka 700 ivi hi ti fambisela vanhu ematikweni ya 239.

Emahlweni ka 1920, ntirho wa hina wo gandlisa a wu endliwa hi tikhampani to gandlisa leti a hi ti hakela. Hi lembe rero, hi sungule ku kandziyisa tin’wana ta timagazini ni swibukwana swa hina emuakweni lowutsongo lowu a hi wu hirhile eBrooklyn, le New York. Ku sukela hi nkarhi wolowo ntirho wa hina wu ye wu kula naswona sweswi hi ni tindhawu to kandziyisela eka tona ta 15 eAfrika, Amerika Dzonga, Amerika N’walungu, Asia, Australia ni le Yuropa.

Buku ya nkoka swinene leyi hi yi kandziyisaka i Bibele. Hi 1942, hi kandziyise Bibele yo sungula leyi heleleke ya King James Version ya Xinghezi emichinini ya hina. Ku sukela hi 1961, Timbhoni ta Yehovha ti hundzuluxele ni ku kandziyisa Bibele leyi heleleke ya Vuhundzuluxeri Bya Misava Leyintshwa Bya Matsalwa Yo Kwetsima. Hi 2013, hi kandziyise tikopi to tlula 184 wa timiliyoni ta Bibele leyi hi tindzimi ta 121.

Tinhlayo teto a hi hinkwaswo leswi ti swi hlamuselaka. Tibibele leti hi ti kandziyisaka ti tiye swinene. Matluka ya tona ma kandziyisiwa hi maphepha lama nga riki na asidi leyi endlaka leswaku ma hundzuka ya xitshopana naswona matluka ya tona ma hlanganisiwa ma tiya. Hikwalaho ka sweswo, Bibele leyi a yi hlakali hi ku olova hambiloko yi tirhisiwa siku ni siku.

Hi tlhela hi kandziyisa minkandziyiso leyi pfunaka vanhu va twisisa Bibele. Xiya tinhlayo tin’wana ta 2013:

• Xihondzo xo Rindza, ku nga magazini lowu hi wu tirhisaka swinene, wu kandziyisiwa hi tindzimi leti tlulaka 210 naswona hi wona lowu fambisiwaka swinene emisaveni hinkwayo. Nkandziyiso ha wun’we wa matluka ya 16 wu kandziyisiwa hi tikopi ta kwalomu ka 45 000 000.

• Xalamuka! ku nga magazini lowu fambaka swin’we ni wa Xihondzo xo Rindza, naswona wu nga endhawini ya vumbirhi hi ku fambisiwa, wu kandziyisiwa hi tindzimi ta 99. Nkandziyiso ha wun’we wu kandziyisiwa hi tikopi ta kwalomu ka 44 000 000.

• Buku leyi nge Xana Bibele Yi Dyondzisa Yini Hakunene? yi ni matluka ya 224 naswona yi endleriwe ku pfuna vahlayi leswaku va twisisa tidyondzo ta xisekelo leti nga eBibeleni. Ku sukela hi 2005, ku kandziyisiwe tikopi to tlula 214 wa timiliyoni hi tindzimi to tlula 240.

• Broxara ya matluka ya 32 leyi nge Yingisa Xikwembu yi endleriwe ku pfuna lava nga swi kotiki kahle ku hlaya. Yi hlamusela ntiyiso wa xisekelo wa le Bibeleni hi ku tirhisa swifaniso swo saseka leswi nga ni marito lama swi hlamuselaka. Ku kandziyisiwe tikopi to tlula 42 wa timiliyoni hi tindzimi leti tlulaka 400.

Ku engetela eka minkandziyiso leyi, Timbhoni ta Yehovha ti kandziyisa tibuku, tibroxara ni swiphephana swo hambana-hambana leswi pfunaka swichudeni swa Bibele leswaku swi kota ku endla ndzavisiso wa swivutiso swa swona swa le Bibeleni, ku langutana ni swiphiqo swa vutomi ni ndlela yo va ni ndyangu lowu tsakeke. Hi 2012, eka tindhawu to kandziyisela ta Timbhoni ta Yehovha ku kandziyisiwe timagazini to tlula 1,3 wa tibiliyoni ni tibuku swin’we ni Tibibele ta 80 wa timiliyoni.

Hakanyingi vaendzi lava valangaka tindhawu ta hina to kandziyisela va hlamala ku vona vanhu lava gingiritekaka va kandziyisa minkandziyiso leyi. Vavanuna swin’we ni vavasati volavo va nyikela hi nkarhi ni matimba ya vona. Loko va ta eBethele, leswi vulaka “Yindlu ya Xikwembu,” vo tala va vona va va va nga ri na ntokoto entirhweni wo kandziyisa. Hambiswiritano, ndzetelo lowu va wu kumaka kwalaho swin’we ni lowu va wu kumaka loko va ri karhi va tirha wu endla leswaku ku va ni vuyelo lebyinene. Hi xikombiso, swi tolovelekile ku vona majaha lama nga emalembeni ya va-20 ma ri karhi ma tirhisa muchini wa rivilo lerikulu lowu kotaka ku kandziyisa timagazini ta matluka ya 16 ta 200 000 hi awara.

Emisaveni hinkwayo, ntirho wa Timbhoni ta Yehovha wu seketeriwa hi minyikelo ya ku tirhandzela. Nkandziyiso wa August 1879 wa Zion’s Watch Tower lowu sweswi wu vuriwaka Xihondzo xo Rindza, wu te: “Hi pfumela leswaku museketeri wa magazini lowu wa ‘Zion’s Watch Tower’ i YEHOVHA, xisweswo wu nga ka wu nga kombeli kumbe wu rilela vanhu leswaku va wu seketela.” Ninamuntlha ha ha pfumela sweswo.

Ha yini hi tirhisa nkarhi, mali ni matimba ya hina yo tala entirhweni lowu? Hikuva hi tshemba leswaku ku nga khathariseki leswaku u hlaya yin’wana ya tibuku ni Tibibele ta timiliyoni leti gandlisiwaka eka vugandliselo bya hina kumbe u hlaya minkandziyiso leyi eka web site ya hina, yi ta ku pfuna leswaku u tshinela eka Xikwembu.