Tikronika Ta Wumbirhi 2:1-18
-
Malulamiselo ya ku yaka tempele (1-18)
2 Se Solomoni a humesa nawu wa leswaku ku yakiwa yindlo leyi a ku ta dzunisiwa vito la Yehovha+ ka yona ku tlhela ku yakiwa ni yindlo ya yena ya wuhosi.+
2 Solomoni a langa 70.000 wa vavanuna lava a va rhwalela minchumu, 80.000 wa vavanuna lava a va tsema maribye atintshaveni+ ni 3.600 wa varhangeli lava a va vonelela vatirhi lava.+
3 Kutani Solomoni a rhuma vanhu va ya ka Hirami+ hosi ya Tiru va fika va ku: “Ni kombela u ni rhumela timhandzi ta minsinya ya mikedari ku fana ni leswi u nga swi yendla ka papayi wa mina Davhida nkama a nga yaka yindlo ya yena.+
4 Swoswi ni yaka yindlo leyi ku nga ta dzunisiwa vito la Yehovha Xikwembu xa mina ka yona. Ni ta yi kwetsimisela yena, ni tlhela ni hisa swinun’hwelisu,*+ ni veka mapawu ya ku kwetsima+ ni ku nyikela magandzelo ya ku hisiwa ya nimixo ni ya nimadlambu,+ hi Tisavata,+ loko ku huma n’weti+ ni hi minkama ya mafexta*+ ya Yehovha Xikwembu xa hina. Leswi swi fanele swi yendliwa hi Vayisrayele hi nkama wa ku kala wu nga heli.
5 Yindlo leyi ni nga ta yi yaka yi ta va yikulu, hikusa Xikwembu xa hina i xikulu ku tlula swikwembu leswin’wani hinkwaswu.
6 A nga kona lweyi a nga kotaka ku xi yakela yindlo. Hikusa hambi matilo lawa ma nga henhla ka matilo, a ma xi yeneli,+ se mina no va mani swaku ni nga xi yakela yindlo? Lexi ni nga xi kotaka i ku yaka ndhawu ya ku hi xi yendlela magandzelo ntsena.
7 Swoswi ni kombela u ni rhumela munhu lweyi a swi kotaka ku tirha hi woru, prata, kobre,+ nsimbi, voya la kori ya ku pshuka, linya la azuli ni la ku pshuka, a tlhela a tiva ni ku vatla.* A ta tirha aYuda ni le Yerusalema ni vanhu va mina lava swi kotaka ku wu yendla kahle ntirho, lava Davhida papayi wa mina a nga va langa.+
8 Ni rhumeli ni timhandzi ta minsinya ya mikedari, ya yunipa+ ni ya algama+ leyi nga aLebanoni,+ hikusa na swi tiva swaku vatirhi va wena va swi kota ku tsema kahle minsinya ya Lebanoni. Vatirhi va mina va ta tirha ni vatirhi va wena+
9 swaku va ni lulamisela timhandzi ta tinyingi hikusa yindlo leyi ni nga ta yi yaka yi ta va yikulu ngopfu.
10 Ni ta va nyika swakudla vatirhi va wena+ lava tsemaka minsinya. Ni ta va nyika 3.200.000* wa makilu ya trigu,* 2.600.000* wa makilu* ya maxalani,* 440.000 wa malitru ya vhinyu* ni 440.000 wa malitru ya mafurha.”
11 Se Hirami hosi ya Tiru a tsalela Solomoni karta* a ku: “Yehovha a ku veke swaku u va hosi hi mhaka ya leswi u rhandzaka vanhu va yena.”
12 Hirami a tlhele a ku: “A ku dzunisiwe Yehovha Xikwembu xa Israyele lweyi a nga yendla matilo ni misava, hikusa a nyike Hosi Davhida n’wana+ wa ku tlhariha ni wa ku twisisa,+ lweyi a nga ta yakela Yehovha yindlo a tlhela a tiyakela yindlo ya wuhosi.
13 Swoswi ni rhumela Iramabi+ lweyi a nga ni ku twisisa a tlhela a swi kota kahle ku yendla ntirho.
14 Yena i n’wana wa wansati mun’wani wa le Dani kasi papayi wa yena i wa le Tiru; wa swi kota ku hamba* minchumu hi woru, prata, kobre, nsimbi, maribye, timhandzi, mavoya ya kori ya ku pshuka, linya la azuli, panu ya ku vevuka ni panu ya ku pshuka.+ A kota ku hamba xin’wani ni xin’wani lexi a rhumiwaka xona.+ A ta tirha ni vatirhi va wena a tlhela a tirha ni vatirhi va hosi ya mina Davhida papayi wa wena, lava va swi kotaka ku wu yendla kahle ntirho.
15 Ni kombela swaku wena hosi ya mina u rhumela trigu, maxalani, mafurha ni vhinyu leswi u nga tshembisa swaku u ta hi nyika.+
16 Hina hi ta tsema minsinya leyi u yi lavaka aLebanoni+ hi gama hi ku tisela yona aYopa+ hi le lwandle, wena u ta gama u yi teka u yi yisa aYerusalema.”+
17 Se hosi Solomoni a tlhela a konta vavanuna hinkwavu lava a va ta hi ka matiko man’wani, lava a va tshama ka tiko la Israyele+ lava Davhida papayi wa yena+ a a va kontile; hinkwavu ka vona a va li 153.600.
18 Ka vona a lange 70.000 wa vatirhi lava a va rhwalela minchumu, 80.000 swaku va va vatirhi lava a va tsema maribye+ atintshaveni ni 3.600 wa varhangeli lava a va ta vonelela vatirhi.+
Tinhlamunselu ta le hansi
^ Kumbe: “minkhuvu”.
^ Vona Ntlhamuselo.
^ Kumbe: “ku dezenyara minchumu ka swigodo, maribye ni tinsimbi.”
^ Kumbe: “três milhões e duzentos mil”.
^ Hi Xiheberu: “20.000 wa tikoro”. Vona Xiyengetelo B14.
^ Kumbe: “dois milhões e seiscentos mil”.
^ Hi Xiheberu: “20.000 wa tikoro”. Vona Xiyengetelo B14.
^ Kumbe: “sevhada”.
^ Hi Xiheberu: “20.000 wa tibati”. Vona Xiyengetelo B14.
^ Kumbe: “papila”.
^ Lani hi vulavula hi ku hamba madezenyu ka tinsimbi, maribye kumbe swigodo.
