Mahungu Ya Ku Tsakisa Ya Ku Tsaliwa Hi Luka 24:1-53
24 Kambe hi siku la ku sungula* la vhiki, va ye ka sirha nimpundzu na va tamelile mafurha ya ku nun’hwela lawa a va ma lunghiselile.+
2 Kutani va kuma swaku a ribye li wumbulutiwile li susiwa ka sirha,+
3 naswona nkama va nga nghena, a va wu kumanga ntsumbu wa Hosi Yesu.+
4 Na va ha hlamala hi mhaka leyi, ku ta vavanuna vambirhi lava a va yambale mpahla ya ku phatima.
5 Se vavasati va chava va gama va txuvuka hansi, kutani vavanuna volavo va ku: “Hi mhaka muni mi lava lweyi a hanyaka xikarhi ka vafi ke?+
6 A nga kona lani se a pfuxiwile. Khumbukani leswi a nga mi byela swona na a ha li Galileya,
7 nkama a nga hlaya swaku N’wana wa munhu a fanele a nyikeliwa ka mavoko ya vadjohi, a dlayiwa ka mhandzi a gama a pfuxiwa hi siku la wunharhu.”+
8 Se va khumbuka marito ya yena+
9 va gama va suka ka sirha va ya byela lava 11 ni vadjondzisiwa lavan’wani minchumu leyi hinkwayu.+
10 Vavasati lava a ku li Mariya Madalena, Jowana na Mariya mamani wa Yakobe. Naswona vavasati lavan’wani lava a va li na vona a va byela vapostolo minchumu leyi.
11 Kambe a va nga kholwi ka vavasati lava naswona a va pimisa swaku vo djamuka.
12 Kambe Pedru a tsutsuma a ya sirheni. Se nkama a nga fika a hlomela, a yo vona malensoli ntsena. Se a famba, na a tivutisa swaku ku nga va ku humelele yini.
13 Kambe hi siku lolelo, vadjondzisiwa vambirhi a va ya ka xidoropani lexi vitaniwaka Emawusi, lexi nga ka mpfhuka wa kolomuyani ka 11 wa makilometru* ku sukela Yerusalema,
14 naswona a va vulavula hi minchumu hinkwayu leyi nga yendleka.
15 Na va ha khuluma hi minchumu leyi, Yesu a humelela, a sungula ku longoloka na vona,
16 kambe a va swi tsumbulanga swaku hi yena.+
17 Se a va vutisa a ku: “Mi bula hi yini?” Se va nyima va ku whii, na va xukuvalile.
18 Se Kleyopasi a mu hlamula a ku: “Swi kotekisa ku yini swaku ku va wena ntsena lweyi a kalaka a nga swi tivi* leswi nga yendleka ka masiku lawa aYerusalema?”
19 A va vutisa a ku: “Ku yendleke yini?” Va ku: “A wu yi tivi minchumu leyi nga yendleka ka Yesu wa le Nazareta?+ A a li muprofeta naswona a vulavulile a tlhela a yendla minchumu ya ku hlamalisa ka Xikwembu ni ka vanhu;+
20 vaprista va hina vavakulu ni vafumi va mu nyikelile leswaku a yavanyiseliwa lifu+ va gama va mu gongondzela ka mhandzi.
21 Kambe a hi tshemba swaku hi yena lweyi a nga langiwa swaku a ponisa Israyele.+ Naswona leli i siku la wunharhu na minchumu leyi se yi humelelile.
22 Vavasati van’wani a xikarhi ka hina na vona va hi hlamalisile, hikusa va ye sirheni nimpundzu+
23 kambe loko va nga wu kumi ntsumbu wa yena, va vuyile va fika va vula swaku va vone tintsumi, leti nga va byela swaku Yesu wa hanya.
24 Se van’wani lava a va li na hina va ye sirheni, kambe va li kume na li nga na nchumu,+ hi ku ya hi leswi vavasati a va swi hlaya; kambe a va mu vonanga Yesu.”
25 Kutani Yesu a ku: “N’wina vanhu lava kalaka va nga twisisi ni lava hlwelaka ku kholwa leswi nga vuliwa hi vaprofeta!
26 Kreste a a nga fanelanga a humeleliwa hi minchumu leyi+ a tlhela a tlakusiwa?”+
27 Kutani a va tlhamusela swilo hinkwaswu leswi Matsalwa ma swi vulaka hi yena. A va tlhamusele ku sukela ka leswi nga tsaliwa hi Moxe ku fikela ka Vaprofeta+ hinkwavu.
28 Se va fika kusuhi ni xidoropani lexi a va ya ka xona, kutani a yendla ingaku o hundza a ya phambheni.
29 Kambe va mu kombela swaku a nga hundzi va ku: “Tshama na hina hikusa se li chonile.” Kutani a nghena ndlwini a tshama na vona.
30 Se nkama a nga tshama na vona mezeni, a teke pawu, a khongela, a li khema, a gama a va nyika.+
31 Se va sungula ku swi vona swaku hi yena; kambe a nyamalala.+
32 Kutani va byelana va ku: “A ti nga pfurhi timbilu ndzeni ka hina na a vulavula na hina ndleleni, na a hi tlhamusela Matsalwa hi ndlela ya ku twisiseka?”
33 Hi nkama wolowo va suka, va tlhelela Yerusalema, kutani va kuma lava 11 ni lava a va tlhangane na vona
34 na va khuluma va ku: “I ntiyiso! Hosi yi pfuxiwile naswona yi humelelile ka Simoni!”+
35 Kutani vadjondzisiwa lavambirhi va vula leswi nga va humelela ndleleni ni leswi va nga mu tivisa xiswona loko a khema pawu.+
36 Na va ha khuluma minchumu leyi, Yesu a humelela xikarhi ka vona a ku: “Ku rhula a ku ve na n’wina.”+
37 Kambe leswi a va chava hintamu, a va pimisa swaku i ntsumi.*
38 Se a ku: “Mi karhateka hi yini naswona i yini lexi mi yendlaka mi kanakana timbilwini ta n’wina?
39 Vonani mavoko ya mina ni minenge ya mina. Phela hi mina ni khumbeni, hikusa ntsumi* a yi na marhambu ni nyama kambe mina ni na swona.”
40 A vule leswo na a va komba mavoko ni minenge ya yena.
41 Kambe na va ha kanakana hi mhaka ya leswi a va tsake hintamu va tlhela va hlamala, a ku: “Mi ni swakudla ke?”
42 Se va mu nyika hlampfi ya ku woxiwa,
43 kutani a yi teka a yi dla na va mu txuvukile.
44 Kutani a ku: “Nkama a na ha li na n’wina,+ ni mi byelile marito lama nge: ‘Swilo hinkwaswu leswi nga tsaliwa ka Nawu wa Moxe, ka Vaprofeta ni ka Tipisalema hi mina swi fanele swi hetiseka.’”+
45 Se a va pfuna ku twisisa ntsutsu wa Matsalwa,+
46 kutani a ku: “Ku tsaliwe leswi: Kreste a ta hluphiwa a tlhela a pfuxiwa ku feni hi siku la wunharhu,+
47 naswona hi vito la yena, a mhaka leyi vulaka swaku vanhu va fanele va tisola swaku va rivaleliwa swidjoho swa vona,+ yi ta chumayeliwa ku sukela Yerusalema+ anze yi fika ka matiko hinkwawu.+
48 Mi ta va timboni ta swilo leswi+
49 naswona ni ta mi rhumela leswi Papayi wa mina a nga swi tshembisa. Kutani tshamani Yerusalema anze mi kuma matimba lama taka hi le tilweni.”+
50 Se a famba na vona anze a ya fika Betaniya, kutani a tlakusa mavoko a va katekisa.
51 Na a ha va katekisa, Xikwembu xi mu teka a ya tilweni.+
52 Kutani va khizama va mu dzunisa va gama va tlhelela Yerusalema na va tsake hintamu.+
53 Naswona a va tshamela tempeleni, va dzunisa Xikwembu.+
Tinhlamunselu ta le hansi
^ Ku nga siku leli hi li vitanaka Domingo. Ka Vayuda a vhiki a li sungula hi siku leli.
^ Hi Xigriki: “60 wa switadiyu”. Xitadiyu xin’we a xi ni 185 wa mametru. Vona Xiyengetelo B14.
^ Kumbexana: “Ko va wena ntsena mupfhumba lani Yerusalema lweyi a kalaka a nga ti tivi timhaka leti?”
^ Hi Xigriki: “moya.”
^ Hi Xigriki: “moya”.
