Wutomi la Ndjangu ni Vanghanu
Vanhu votala swava karhatela kutshama na va twanana ni maxaka kumbe vanghanu va vona. Ahi voneni swin’wani leswi Bibele liswi vulaka akuva lihi pfuna kuyampsisa wuxaka la hina ni vanhu van’wani.
UNGA PIMISI HI WENA NTSENA
LESWI BIBELE LISWI DJONDZISAKA: ‘Mun’wana ni mun’wana wa n’wina angatshuki atikarhatela leswi swinga swa yena ntsena, kambe aatikarhatele ni leswi swinga swa van’wana.’ — Vafilipiya 2:4.
LESWI VULAKA SWONA: Hingava ni wuxaka la kahle ni vanhu van’wani loko hi pimisa hileswi hina hingava yendlelaka swona, kungali leswi vona vangahi yendlelaka swona. Loko u tshamela kupimisa hi wena ntsena, uta wonha wuxaka la wena ni vanhu van’wani. Hi xikombiso, loko u chadile, awungata tshembeka ka lweyi unga chada na yena. Xin’wani, hileswaku vanhu avaswi tsakeli kuva ni munghanu lweyi a gwiraka hileswi anga na swona kumbe a tshamelaka kutibuma hi wutivi la yena. Hi mhaka leyo, buku lin’wani la manguva lawa li li: “Vanhu lava kalaka vangana mhaka ni vanhu van’wani va talisa kuva ni swikarhatu swotala.”
LESWI UNGASWI YENDLAKA:
-
Pfuna van’wani. Vanghanu va ntiyiso va tshembana funtshi minkama hinkwayu va tinyimisela kupfunana. Nkambisiso wun’wani wu vula swaku vanhu lava pfunaka van’wani ava talisi kukarhateka moyeni naswona va titwa na va hlonipheka.
-
Kombisa ntwelawusiwana. Kukombisa ntwelawisiwana swi vula kutwa kuvava loku twiwaka hi munhu mun’wani. Loko u ni ntwelawusiwana awunge vuli marito ya kuhlekisa hi xikongomelo xa kupoyila vanhu van’wani kumbe kuva twisa kuvava.
Loko u ni ntwelawusiwana utaswi kota kuva lehisela mbilu vanhu van’wani. Hi mhaka leyo, ntwelawusiwana wungaku pfuna leswaku ungavi ni xikheto naswona uva ni vanghanu lava humaka ka tindhawu ta ku hambanahambana.
-
Heta nkama ni vanhu van’wani. Loko u heta nkama wotala ni vanhu van’wani utava tiva kuyampsa. Leswaku uva ni wunghanu la kahle ni munhu wokarhi, u fanele u bula na yena hi swilo leswi aswi rhandzaka ni leswinga swa lisima ka yena. Muyingiseli kahle loko a vulavula u tlhela u kombisa swaku uni mhaka na yena. Nkambisiso wun’wani wa swoswi nyana wu vule swaku “mabulu lama yakaka ma yendla swaku vanhu va tsaka.”
LANGA VANGHANU HI WUTLHARHI
LESWI BIBELE LISWI DJONDZISAKA: “Vanghanu lava vobiha vawonha mikhuva leyinene.” — 1 Vakorinto 15:33.
LESWI VULAKA SWONA: Vanhu lava u tlangaka na vona vangaku pfuna kuyendla swa swinene kumbe va kuxenga leswaku u yendla swobiha. Vanhu lava djondzaka hita mahanyelo ya vanhu va vula swaku vanghanu lava munhu angana vona vangamu khumba hi tindlela totala awuton’wini. Hi xikombiso munhu angaha sungula kudzaha kumbi a lava kutshikana ni lweyi anga chada nayena loko a tlanga ni vanhu lava dzahaka kumbe lava tshikeke lava vanga chada na vona.
LESWI UNGASWI YENDLAKA: Tlanga ni vanhu lava vangani wumunhu leli u li rhandzaka naswona u lavaka kuva tekelela. Hi xikombiso, ungaha tlanga ni vanhu lava tivaka kumbe vanga ni mapimu, vanga ni xihloniphu, va rhandza kunyika naswona va rhandzaka kuyamukela vapfhumba.
SWIN’WANI LESWI BIBELE LISWI DJONDZISAKA
Vona mavhidiyu lawa ma sekeliweke Bibeleni, lama yendleliweke kupfuna vatekani, vampsha ni swivanani leswaku va yampsisa wutomi la vona andjangwini
UNGA TLHAVI VANHU VAN’WANI HI MARITO.
“Marito lamanga pimisiwangiki kahle mafana ni xipada lexi tlhavaka”. — SWIVURISO 12:18.
RHANDZA KUNYIKA.
“Lweyi ahananaka atakuluka”. — SWIVURISO 11:25.
KHOMA VAN’WANI HI NDLELA LEYI AWUTA NAVELA KUKHOMIWA HI YONA.
‘Hinkwaswu leswi milavaka leswaku vanhu vamiyendlela swona, vayendlelani swona na n’wina.’ — MATEWU 7:12.
