AMINKAMENI ya Bibele, mulanguteli wa munti hi lweyi a ahlayisa munti kumbe swilo swa munhu mun’wani.

Nkama lowu Yosefa, n’wana wa Yakobe a ali xikarhawa aGibita, a game ava mulanguteli wa munti wa Potifaro. Kuvula ntiyiso Potifaro a “atshika hinkwaswu swa yena amavokweni ya Yosefa”. (Gen. 39: 2-6) Hi kufamba ka nkama, loko se Yosefa a langiwile kuva hosi aGibita, a lange munhu mun’wana leswaku ava mulanguteli wa munti. — Gen. 44:4.

Aminkameni ya Yesu, n’winyi wa masimu a atalisa kutshama kule ni masimu ya yena. Hi mhaka leyo, a afanele a veka mulanguteli leswaku ata langutela ntirho lowu awu yendliwa masin’wini siku ni siku.

I mani lweyi a afaneleka leswaku ava mulanguteli wa munti? Hi nkama wa vapostola, mutsali mun’wana wa Murhoma kunga Columella a vule leswaku xikarawa axi langiwa kuva mulanguteli “loko se xidjondzisiwile naswona xiwu yendla kahle ntirho”. A kufanele kuli munhu lweyi “a yendlaka leswaku vatirhi va yendla ntirho wa vona kambe na angava khomi hi tihanyi.” A tlhele a ku: “Xalisima kutlula hinkwaswu hi leswaku mulanguteli aanga fanelanga a pimisa swaku a tiva swilo hinkwaswu naswona a afanele a tama a djondza swilo swin’wana.”

Bibele li fanisa ntirho lowu awu yendliwa hi mulanguteli wa munti ni mintirho leyi yendliwaka abandleni. Hi xikombiso mupostola Pedro, a byele Vakreste leswaku va tirhisa wuswikoti leli vanyikiweke hi Xikwembu akuva ‘vapfunana ha lona, vava valanguteli lavanene va tinyiko ta Xikwembu ta tinxakaxaka’. — 1 Pet. 4:10.

Yesu a tirhise xikombiso xa mulanguteli ka mhaka leyinga tsaliwa ka Luka 16:1-8. Naswona loko a vulavula hi nkama lowu aata sungula kufuma ha wona a byele vadjondzisiwa va yena swaku aata veka “mutirhi lweyi atshembekeke, ni kutlhariha” kumbe “mulanguteli lweyi atshembekeke”. Ntirho wa mulanguteli lweyi akuli kuphamela valandzeli va Kreste swakudla swa moya ka masiku lawa ya wugamu. (Mat. 24:45-47; Luk. 12:42) Hi khensa swinene hileswi hi yamukelaka mabuku lamahi tiyisaka lipfumelo lawa mulanguteli wotshembeka ahi lunghiselelaka wona amisaveni hinkwayu.